Eclesiastés 2:1-26
2 Teen túuneʼ tin waʼalaj ichil in puksiʼikʼal: «Koʼoten, chaʼa in túuntik baʼax le kiʼimak óolaloʼ utiaʼal in wilik baʼax utsil ku taasik». Chéen baʼaleʼ tin wileʼ leloʼ chéen kunel xan.
2 Tu yoʼolal le cheʼejoʼ tin waʼalaj: «¡Chéen choko poolal!».
Tu yoʼolal le kiʼimak óolaloʼ tin waʼalaj: «¡Mix baʼal u biilal!».
3 Yéetel in puksiʼikʼaleʼ tin jach ilaj baʼax jeʼel u yúuchul kéen in kiʼimakkúunt in wóol yéetel vinoeʼ,+ tuláakal le tiempo jeʼeloʼ maʼ saʼat in wóoliʼ. Kʼuchen tak in beetinba j-maʼ naʼatil utiaʼal in wojéeltik baʼax maas maʼalob ka u beet máak ichil le junpʼíit kʼiinoʼob kuxaʼan way luʼumeʼ.
4 Tin beetaj nukuch meyajoʼob.+ Tin beetaj yaʼab najoʼob,+ tin pakʼaj uva tiʼ yaʼabkach lugaroʼob.+
5 Tin beetaj nukuch jardínoʼob yéetel nukuch parqueʼob, ka tin pakʼaj tuláakal u jejeláasil cheʼ ku tsʼáaik u yichoʼobiʼ.
6 Tin beetaj nukuch tanqueʼob utiaʼal in jóoyabtik le yaʼab mejen cheʼob in pakʼmoʼoboʼ.
7 Yanchajten sirvienteʼob yéetel sirvientaʼob,+ yaan tiʼ letiʼobeʼ tiʼ síijoʼob tin wotocheʼ. Yanchajten xan yaʼab in walakʼ baʼalcheʼob, yaʼab wakaxoʼob yéetel tamanoʼob,+ maas ke tiʼ jeʼel máaxak yanchaj antes tiʼ teen tu kaajil Jerusaléneʼ.
8 Tin juntartaj xan yaʼab plata yéetel yaʼab oro,+ u ayikʼalil* reyoʼob yéetel luʼumiloʼob.+ Tin muchʼkíintaj xiiboʼob yéetel koʼoleloʼob u yojloʼob kʼaay, bey xan le baʼax taasik yaʼab kiʼimak óolal tiʼ le xiiboʼoboʼ, yanchajten yaʼabkach koʼoleloʼob.
9 Teneʼ jach yaʼab baʼaloʼob yanchajten, maas ke tiʼ jeʼel máaxak yanchaj antes tiʼ teen tu kaajil Jerusaléneʼ.+ Tsʼoʼoleʼ le bukaʼaj naʼat yaantenoʼ mix juntéen tu pʼaten.
10 Tuláakal baʼax tin tsʼíibolteʼ* tin wilaj u yantalten.+ Tuláakal baʼax tu tsʼíiboltaj in puksiʼikʼaleʼ tin wilaj in tsʼáaiktiʼ, in puksiʼikʼaleʼ jach kiʼimak kaʼach u yóol yoʼolal le bukaʼaj meyaj kin beetkoʼ, letiʼe baʼax tin náajaltaj* úuchik in jach tsʼáaik in wóol meyajoʼ.+
11 Pero ka jach tuukulnajen tiʼ tuláakal le baʼaxoʼob tsʼoʼok in beetik bey xan tiʼ tuláakal le meyajoʼob jach tin tsʼáaj in wóol in beetoʼ+ tin wileʼ chéen kuneloʼob, bey jeʼex ka u chʼaʼpacht máak le iikʼoʼ.+ Tuláakal le baʼaloʼob yaan way luʼumeʼ minaʼan u biilaloʼob.+
12 Ka tsʼoʼokeʼ teneʼ joʼopʼ in jach tuukul tiʼ le naʼat, tiʼ le choko poolil yéetel tiʼ le j-maʼ naʼatiloʼ.+ (Tumen ¿baʼax jeʼel u páajtal u beetik le máax kun taal después tiʼ le reyoʼ? Chéen le baʼax tsʼoʼok u yáax beetaʼaloʼ).
13 Tin wileʼ maas maʼalob le naʼat ke le j-maʼ naʼatiloʼ+ jeʼex maas maʼalobil le sáasil tiʼ le éeʼjochʼeʼeniloʼ.
14 Le máax yaan u naʼatoʼ u pʼilmaj u yich,+ pero le máax minaʼan u naʼatoʼ ku máan ich éeʼjochʼeʼenil.+ Teneʼ tsʼoʼok xan in tsʼáaik cuentaeʼ junpʼéeliliʼ bix u tsʼoʼokol* tuláakal máak.+
15 Teen túuneʼ tin waʼalaj ichil in puksiʼikʼal: «Jeʼex kun tsʼoʼokol le j-maʼ naʼatoʼ bey xan kin tsʼoʼokoloʼ».+ ¿Baʼax túun tin náajaltaj úuchik u sen antal in naʼat? Le oʼolal tin waʼalaj ichil in puksiʼikʼal: «Leloʼ chéen kunel xan».
16 Tumen le máax yaan u naʼat yéetel le máax minaʼan u naʼatoʼ maʼ mantatsʼ kun kʼaʼajsbiloʼobiʼ,+ kéen máanak kʼiineʼ yaan u tuʼubsaʼaloʼob. ¿Bix kun kíimil le máax yaan u naʼatoʼ? Jeʼex u kíimil le máax minaʼan u naʼatoʼ.+
17 Le oʼolal joʼopʼ in pʼektik le kuxtaloʼ,+ tumen tuláakal baʼax ku beetaʼal way yóokʼol kaabeʼ kin wuʼuyik chéen ku taasikten chiʼibal poolal, tumen tuláakal baʼaleʼ chéen kunel,+ bey jeʼex ka u chʼaʼpacht máak le iikʼoʼ.+
18 Teneʼ kʼuchen in pʼekt tuláakal le baʼaxoʼob yanchajten úuchik in sen tsʼáaik in wóol meyaj way yóokʼol kaabeʼ,+ tumen unaj in pʼatik tiʼ le máax kun taal después tiʼ tenoʼ.+
19 Teneʼ maʼ in wojel wa yaan u yantal u naʼatiʼ mix wa yaan u pʼáatal j-maʼ naʼatiliʼ,+ chéen baʼaleʼ tu kʼab kun pʼáatal tuláakal le baʼaxoʼob tin tsʼáaj in wóol in kaxt way yóokʼol kaaboʼ, le baʼaxoʼob tin náajaltaj yéetel le naʼat yaantenoʼ. Leloʼ chéen kunel xan.
20 Le oʼolal pʼáat maʼ tranquilo in puksiʼikʼal yoʼolal le bukaʼaj meyaj tin tsʼáaj in wóol in beet way yóokʼol kaabeʼ.
21 Juntúul máax yaan u naʼat, yaʼab baʼax u kanmaj yéetel yaʼab baʼax u yojleʼ jeʼel u tsʼáaik u yóol meyajeʼ, pero tu tsʼookeʼ yaan u kʼubik tuláakal tiʼ juntúul máax maʼ tu tsʼáaj u yóol meyaj tu yoʼolaliʼ.+ Leloʼ chéen kunel xan yéetel chéen chiʼibal poolal.
22 ¿Baʼax ku náajaltik juntúul máak ikil u tsʼáaik u yóol meyaj bey xan ikil u kíimskuba* meyaj way yóokʼol kaabeʼ?+
23 Le baʼax ku beetik máak tuláakal u kʼiiniloʼob u kuxtaleʼ chéen ku taasik yaayaj óolal yéetel chiʼibal poolal tiʼ,+ tak de áakʼabeʼ u puksiʼikʼaleʼ maʼ tu xuʼulul u tuukul.+ Leloʼ chéen kunel xan.
24 Le baʼax maas maʼalob jeʼel u beetik máakoʼ u janal yéetel u yukʼul bey xan u kiʼimakkúuntik u yóol yéetel le meyaj ku beetkoʼ.+ Tsʼoʼok in wilkeʼ leloʼ tiʼ u jaajil Dios xan u taal,+
25 tumen ¿máax maas maʼalob baʼax ku jaantik yéetel ku yukʼik ke teen?+
26 U jaajil Dioseʼ ku tsʼáaik naʼat tiʼ le máax ku lúubul utsil tiʼoʼ, ku beetik xan u kanik yaʼab baʼaloʼob yéetel ku beetik u kiʼimaktal u yóol,+ pero le máax ku kʼebantaloʼ, ku beetaʼal u líiʼsik yéetel u muchʼkíintik baʼaloʼob utiaʼal u tsʼáa tiʼ le máax ku lúubul utsil tiʼ Diosoʼ.+ Leloʼ chéen kunel xan, bey jeʼex ka u chʼaʼpacht máak le iikʼoʼ.
Notas
^ Wa «le baʼax ku yantal tiʼ».
^ Wa «tocarnajten».
^ Ich hebreoeʼ ku yaʼalaʼal kaʼach «tu kʼáataj in wichoʼobeʼ».
^ Wa «jeʼel u jáan úuchul wa baʼax tiʼ».
^ Ich hebreoeʼ ku yaʼalaʼal kaʼach «u tsʼáaik u yóol u puksiʼikʼal».
