Génesis 13:1-18
13 Abrán túuneʼ jóokʼ tu luʼumil Egipto yéetel u yatan bey xan yéetel Lot. Tu chʼaʼaj xan tuláakal le baʼaxoʼob yaantiʼoʼ ka bin tu desiertoil Négueb.+
2 Abrán kaʼacheʼ jach ayikʼal, yaʼab u waakaxoʼob, tsʼoʼoleʼ yaʼab plata yéetel oro yaantiʼ.+
3 Le táan u viajar desde tu desiertoil Négueb tak tu kaajil Beteloʼ jejeláas tuʼux pʼáati, tak ka kʼuch teʼ tuʼux u yáax armarmaj le naj de nookʼ entre Betel yéetel Ayoʼ.+
4 Teʼ lugaraʼ Abráneʼ tiʼ u beetmaj kaʼach le altareʼ, yéetel tiʼ tu alabartaj u kʼaabaʼ Jéeobaiʼ.
5 Lot, le máax táan u viajar kaʼach yéetel Abránoʼ, yaan xan u yalakʼ tamanoʼob, u waakaxoʼob yéetel yaan xan najoʼob de nookʼ tiʼ.
6 Le oʼolaleʼ le luʼumoʼ pʼáat maʼ suficiente utiaʼal u yantaloʼobiʼ. Jach yaʼabchaj le baʼaxoʼob yaantiʼoboʼ ka pʼáat minaʼan tuʼux u múul antaloʼob.
7 Juntéenjeakileʼ le máaxoʼob kanáantik u yalakʼ baʼalcheʼob Abrán bey xan le máaxoʼob kanáantik u yalakʼ baʼalcheʼob Lotoʼ discutirnajoʼob. (Teʼ kʼiinoʼob jeʼeloʼ le cananeoʼob yéetel le perizitaʼoboʼ tiʼ kajaʼanoʼob teʼ luʼumoʼ).+
8 Abrán túuneʼ yéetel respetoeʼ tu yaʼalaj tiʼ Lot:+ «Maʼ maʼalob ka yanak problemas ichiloʼoniʼ mix xan ichil le máaxoʼob kanáantik k-alakʼ baʼalcheʼoboʼ, tumen láakʼtsiloʼon.
9 Ilawile, jeʼel u páajtal a bin jeʼel tuʼuxak a kʼáat teʼ luʼumaʼ. Le beetkeʼ beet uts a bin yaanal tuʼux. Wa ka bin teʼ x-tsʼíikoʼ, teneʼ kin bin teʼ x-noʼojoʼ. Pero wa ka bin teʼ x-noʼojoʼ, teneʼ kin bin teʼ x-tsʼíikoʼ».
10 Lot túuneʼ tu líiʼsaj u paakateʼ ka tu yilaj tuláakal u táax luʼumil le Jordánoʼ+ tak tu kaajil Zóar.+ Letiʼeʼ tu yileʼ tuláakal le luʼum jeʼeloʼ mantatsʼ yaan u jaʼil, bey jeʼex le jardín* tu beetaj Jéeobaoʼ+ yéetel bey jeʼex u luʼumil Egiptoeʼ (u táax luʼumil Jordáneʼ bey yanil kaʼach antes u xuʼulsaʼal Sodoma yéetel Gomorra tumen Jéeobaoʼ).
11 Lot túuneʼ tu yéeyaj tuláakal u táax luʼumil le Jordánoʼ ka túun bin kajtal lakʼin. Bey úuchik túun u separarkuba Lot tiʼ Abránoʼ.
12 Abráneʼ kajlaj tu luʼumil Canaán, chéen baʼaleʼ Loteʼ kajlaj teʼ kaajoʼob yanoʼob tu táax luʼumil le Jordánoʼ.+ Tu tsʼook túuneʼ tu armartaj u yotoch de nookʼ naatsʼ tiʼ u kaajil Sodoma.
13 U kajnáaliloʼob Sodoma kaʼacheʼ jach kʼasaʼanoʼob yéetel jach tsʼoʼok u píitmáan u kʼebantaloʼob tu contra Jéeoba.+
14 Le ka tsʼoʼok u bin Loteʼ, Jéeobaeʼ tu yaʼalaj tiʼ Abrán: «Beet uts a líiʼsik a paakat. Desde teʼ tuʼux yanechoʼ paakatnen xaman,* noojol,* lakʼin bey xan chikʼin,
15 tumen tuláakal le luʼum ka wilkaʼ tiʼ teech yéetel tiʼ a chʼiʼibal* ken in tsʼáa utiaʼal kʼiinoʼob minaʼan u xuul.+
16 Teen túuneʼ yaan in beetik u yaʼabtal a chʼiʼibal bey jeʼex u polvoil le luʼumoʼ. Jeʼex u polvoil le luʼum maʼ tu páajtal u xoʼokloʼ, a chʼiʼibal xaneʼ maʼ kun páajtal u xoʼokol.+
17 Líiʼkech, xeen tu chowakil yéetel tu kóochil le luʼumaʼ, tumen tiʼ teech ken in tsʼáae».
18 Abrán túuneʼ seguernaj u kajtal tiʼ najoʼob de nookʼ. Ka máan kʼiineʼ bin kajtal teʼ tuʼux yaan u nukuch cheʼiloʼob Mamréoʼ,+ naatsʼ tiʼ Hebrón.+ Teʼeloʼ tu beetaj junpʼéel altar tiʼ Jéeobaiʼ.+
