Génesis 17:1-27
17 Le yaan kaʼach 99 años tiʼ Abránoʼ, Jéeobaeʼ tu chíikbesuba tiʼ letiʼeʼ ka tu yaʼalajtiʼ: «Teen le Dios jach táaj yaan u poderoʼ. Kuxlen jeʼex uts tin tʼaaneʼ yéetel bis junpʼéel toj kuxtal.
2 Yaan in béeykuntik le pacto in beetmaj ta wéeteloʼ,+ yéetel yaan in beetik u sen yaʼabtal a paalal».+
3 Abráneʼ xolajeʼ ka chinlaji, Dios túuneʼ seguernaj u yaʼaliktiʼ:
4 «Ilawile, láayliʼ yaantoʼon junpʼéel pactoeʼ,+ tiʼ techeʼ yaan u jóokʼol yaʼabkach naciónoʼob.*+
5 Desde bejlaʼeʼ maʼ Abrán* a kʼaabaʼiʼ, baʼaxeʼ Abrahán,* tumen teneʼ yaan in beetik ka jóokʼok yaʼabkach naciónoʼob* tiʼ teech.
6 Teneʼ jach tu jaajil yaan in beetik ka sen yaʼabchajak a paalal, tiʼ teech túuneʼ yaan u jóokʼol naciónoʼob bey xan reyoʼob.+
7 Le pacto in beetmaj ta wéetel+ yéetel a chʼiʼibal* kun antaloʼ utiaʼal tuláakal u generaciónoʼob bey xan utiaʼal kʼiinoʼob minaʼan u xuul. Le pactoaʼ utiaʼal ka in beetinba a Dios bey xan u Dios a chʼiʼibal kun antaloʼ.
8 Jach tu jaajileʼ tiʼ teech yéetel tiʼ a paalal ken in tsʼáa tuláakal u luʼumil Canaán, le luʼum tuʼux kajlajech bey j-táanxel luʼumiloʼ.+ Le luʼumaʼ yaan a tiaʼalintkeʼex utiaʼal kʼiinoʼob minaʼan u xuul, yéetel teneʼ yaan in beetkinba a Dioseʼex».+
9 Tsʼoʼoleʼ Dioseʼ tu yaʼalaj xan tiʼ Abrahán: «Chéen baʼaleʼ techeʼ kʼaʼabéet a tsʼoʼokbesik le pacto in beetmaj ta wéeteloʼ, kʼaʼabéet u tsʼoʼokbesaʼal tumen le a paalal kun antaloʼ bey xan tumen tuláakal u generaciónoʼob.
10 Lelaʼ letiʼe pacto kin beetik ta wéeteleʼexaʼ, yéetel lelaʼ letiʼe baʼax kʼaʼabéet a tsʼoʼokbesik teech bey xan a paalal kun antaloʼ: tuláakal xiib yaan ta wéeteleʼexeʼ kʼaʼabéet u circuncidartaʼal.*+
11 Kʼaʼabéet a circuncidarkabaʼex, lelaʼ letiʼe baʼax ken u yeʼes yaan junpʼéel pacto in beetmaj ta wéeteleʼexoʼ.+
12 Leloʼ mantatsʼ bey unaj a beetkeʼexoʼ. Tuláakal xiib ocho días síijikeʼ unaj u circuncidartaʼal,+ bey unaj u beetaʼal tiʼ jeʼel máaxak ka síijik ta wotocheʼ bey xan tiʼ jeʼel máaxak maʼ tiʼ a paalal u taaliʼ, baʼaxeʼ manbil úuchik a beetik tiʼ juntúul j-táanxel luʼumil.
13 Kʼaʼabéet u circuncidartaʼal tuláakal máax sijnáal ta wotoch bey xan tuláakal máax manbil a beetmil.+ Le circuncisiónoʼ junpʼéel señal kun eʼesikeʼ le pacto in beetmaj ta wéeteloʼ utiaʼal kʼiinoʼob minaʼan u xuul.
14 Wa juntúul xiib maʼ tu circuncidarkubaeʼ kʼaʼabéet u kíimsaʼal, tumen maʼ tu beetaj le baʼax ku yaʼalik le pactooʼ».
15 Ka tsʼoʼokeʼ Dioseʼ tu yaʼalaj xan tiʼ Abrahán: «Maʼ ken a kaʼa aʼal Sarai*+ tiʼ a watan, tumen desde bejlaʼeʼ u kʼaabaʼeʼ Sara.*
16 Yaan in bendecirtik yéetel yaan in beetik u yantal juntúul a hijo tu yéetel,+ yaan in bendecirtik Sara utiaʼal ka kʼuchuk u beetuba maamatsil tiʼ yaʼabkach naciónoʼob yéetel reyoʼob».
17 Abrahán túuneʼ xolajeʼ ka chinlaji, ka joʼopʼ túun u cheʼej yéetel joʼopʼ u máansik tu tuukul:+ «Juntúul máak de 100 añoseʼ, ¿jeʼel wa u yantal u hijoeʼ? Yéetel Sara, juntúul koʼolel de 90 añoseʼ, ¿jeʼel wa xan u páajtal u yantal u hijoeʼ?».+
18 Abrahán túuneʼ tu yaʼalaj tiʼ le u jaajil Diosoʼ: «¡Bukaʼaj maʼalobil wa ka a bendecirt Ismaeleʼ!».+
19 Dios túuneʼ tu yaʼalajtiʼ: «Sara a wataneʼ jach tu jaajil yaan u yantal u chaambal,* teech túuneʼ yaan a tsʼáaik u kʼaabaʼt Isaak.*+ Teen túuneʼ yaan xan in beetik junpʼéel pacto tu yéetel bey xan yéetel le u paalal kun antaloʼ,+ le pactoaʼ utiaʼal kʼiinoʼob minaʼan u xuul.
20 Chéen baʼaleʼ tsʼoʼok xan in wuʼuyik baʼax ta waʼalaj tu yoʼolal Ismael. ¡Ilawile!, yaan in bendecirtik yéetel yaan in beetik ka sen yaʼabchajak u paalal. Letiʼeʼ yaan u yantal 12 u hijoʼob, letiʼobeʼ yaan u beetkubaʼob u nojchiloʼob tiʼ u familiaʼob, yéetel tiʼ Ismaeleʼ yaan u jóokʼol junpʼéel nojoch nación.+
21 Chéen baʼaleʼ le pactooʼ chéen yéetel Isaak+ ken in beete, le a hijo kun antaltech yéetel Sara teʼ tuláakʼ añooʼ».+
22 Le ka tsʼoʼok u tʼaan Dioseʼ lukʼ tu yiknal Abrahán.
23 Ka tsʼoʼok leloʼ, teʼ mismo díaoʼ Abraháneʼ tu circuncidartaj Ismael, u hijo. Tu circuncidartaj xan tuláakal le xiiboʼob sijnáaloʼob tu yotochoʼ bey xan tuláakal le máaxoʼob u manmajoʼ. Bey úuchik u circuncidartik tuláakal le xiiboʼob kajaʼanoʼob tu yotochoʼ, tu beetaj jach jeʼel bix aʼalaʼabiktiʼ tumen Diosoʼ.+
24 Abraháneʼ 99 años yaantiʼ ka circuncidartaʼabi.+
25 Yéetel Ismael, u hijoeʼ, 13 años yaantiʼ ka circuncidartaʼabi.+
26 Abrahán bey xan Ismael, u hijoeʼ, circuncidartaʼaboʼob túun teʼ mismo díaoʼ.
27 Teʼ mismo díaoʼ circuncidartaʼab xan tuláakal le máaxoʼob kajaʼanoʼob tu yotochoʼ, tuláakal le máaxoʼob sijnáaloʼob tu yotochoʼ bey xan tuláakal le máaxoʼob u manmaj tiʼ le j-táanxel luʼumiloʼoboʼ.
Notas
^ Ich hebreoeʼ ku yaʼalaʼal kaʼach «yaan a kʼuchul a beetaba u papá yaʼabkach naciónoʼob».
^ U kʼáat u yaʼal «Le Papá Jach Bendecirtaʼanoʼ».
^ U kʼáat u yaʼal «U Papá Yaʼabkach Máakoʼob».
^ Ich hebreoeʼ ku yaʼalaʼal kaʼach «yaan a kʼuchul a beetaba u papá yaʼabkach naciónoʼob».
^ Wa «descendencia».
^ Ilawil página 2559.
^ Maʼ xaaneʼ u kʼáat u yaʼal «Ku Tsʼáaikuba Baʼateʼel».
^ U kʼáat u yaʼal «Princesa».
^ U kʼáat u yaʼal «Cheʼej».
^ Tuláakʼ tuʼuxeʼ ku yaʼalaʼal «chaanpal».
