Génesis 20:1-18
-
Saraeʼ ku salvartaʼal tiʼ Abimélek (1-18)
20 Ka tsʼoʼokeʼ Abraháneʼ lukʼ teʼeloʼ+ ka bin tu luʼumil Négueb, ka kajlaj entre Cadés+ yéetel Sur.+ Mientras kajaʼan* kaʼach Guerareʼ,+
2 Abraháneʼ tu yaʼalaj tu kaʼatéen yoʼolal Sara, u yatan: «Letiʼeʼ in wíitsʼin».+ Abimélek túun, u reyil Guerareʼ tu túuxtaj chʼaʼabil Saraeʼ ka tu beetaj u taasaʼal tu yiknal.+
3 Junpʼéel áakʼab túuneʼ ichil junpʼéel wayakʼeʼ* Dioseʼ tu yaʼalaj tiʼ Abimélek: «Seguro yaan a kíimil yoʼolal le koʼolel ta chʼaʼajoʼ,+ tumen letiʼeʼ tsʼokaʼan u beel, yaan u yíicham».+
4 Chéen baʼaleʼ Abimélek kaʼacheʼ maʼ yanak baʼal u yil yéetel Saraiʼ. Le oʼolal tu yaʼalajtiʼ: «Jéeoba, ¿yaan wa a kíimsik junpʼéel nación kex mix baʼal kʼaas u beetmaj?
5 Si u yíichameʼ tu yaʼalajten: ‹Letiʼeʼ in wíitsʼin›, le koʼolel xanoʼ tu yaʼalajten: ‹Letiʼeʼ in sukuʼun›. Le ka tin beetaj lelaʼ teneʼ mix baʼal kʼaas yaan tin tuukul yéetel maʼ in wojel wa kʼaas le baʼax kin beetkoʼ».
6 Dios túuneʼ ichil le wayakʼoʼ tu yaʼalajtiʼ: «Teneʼ in wojel mix baʼal kʼaas yaan ta tuukul le ka ta beetaj leloʼ. Le oʼolal maʼ tin chaʼaj a wantal tu yéeteliʼ utiaʼal maʼ a kʼebantal tin contra.
7 Sut u yatan le máakoʼ, tumen letiʼeʼ profeta.+ Letiʼ túuneʼ yaan u orar ta woʼolal+ utiaʼal maʼ a kíimil. Chéen baʼaleʼ wa maʼ ta sutik u yataneʼ techeʼ yaan a kíimil bey xan tuláakal le máaxoʼob yanoʼob ta wotochoʼ».
8 Abimélek túuneʼ líikʼ tempranoeʼ ka tu tʼanaj tuláakal u sirvienteʼob ka tu yaʼalajtiʼob baʼax tsʼoʼok u yúuchul. Letiʼob túuneʼ jach sajakchajoʼob.
9 Abimélekeʼ tu túuxtaj tʼanbil Abraháneʼ ka tu yaʼalajtiʼ: «¿Baʼax le tsʼoʼok a beetiktoʼon beyaʼ? ¿Baʼax kʼaasil tsʼoʼok in beetiktech utiaʼal ka a taas le nojoch kʼeban tin wóokʼol yéetel tu yóokʼol in kaajalaʼ? Maʼ maʼalob le baʼax tsʼoʼok a beetiktenaʼ».
10 Abimélekeʼ tu yaʼalaj xan tiʼ Abrahán: «¿Baʼax a tukultmaj kaʼach le ka ta beetaj leloʼ?».+
11 Abraháneʼ tu yaʼalaj: «Es ke tin tuklaj lelaʼ: ‹Le máakoʼob kajaʼanoʼob wayeʼ seguro maʼatech u beetkoʼob baʼax u kʼáat Dios, yéetel jeʼel in kíimsaʼal tu yoʼolal in wataneʼ›.+
12 Tsʼoʼoleʼ jach tu jaajileʼ letiʼeʼ in wíitsʼin, tumen letiʼeʼ u hija in papá, pero maʼ u hija in maamaiʼ. Ka máan tiempoeʼ kʼuch u beetuba in watan.+
13 Le ka tu yaʼalajten Dios ka lukʼken tu yotoch in papá+ utiaʼal ka máanken kajtal yaanal tuʼuxoʼobeʼ, tin waʼalaj tiʼ in watan: ‹Lelaʼ letiʼe baʼax jeʼel a beetik utiaʼal a weʼesikten le nojoch yaabilaj ka wuʼuyik tin woʼolaloʼ: jeʼel tuʼuxak ka xiʼikoʼoneʼ aʼal lelaʼ: «Letiʼeʼ in sukuʼun»›».+
14 Abimélek túuneʼ tu tsʼáaj tiʼ Abrahán tamanoʼob, wakaxoʼob, sirvienteʼob yéetel sirvientaʼob, tsʼoʼoleʼ tu sutaj xan Sara tiʼ.
15 Abimélekeʼ tu yaʼalaj xan tiʼ: «Ilawile, le luʼumaʼ in tiaʼal. Kajlen jeʼel tuʼuxak a kʼáateʼ».
16 Tiʼ Saraeʼ tu yaʼalaj: «Tiʼ a sukuʼuneʼ kin tsʼáaik 1,000 u pʼéelel baʼaloʼob de plata.+ Leloʼ junpʼéel señal tu táan le máaxoʼob yanoʼob ta wéeteloʼ bey xan tu táan tuláakal máak de ke techeʼ maʼ ta beetaj mix baʼal kʼaasiʼ, beyoʼ maʼ kun aʼalbil mix baʼal kʼaas ta woʼolal».
17 Abrahán túuneʼ káaj u orar tiʼ le u jaajil Diosoʼ, Dios túuneʼ tu tsʼakaj Abimélek, tu tsʼakaj xan u yatan yéetel u esclavaʼob utiaʼal ka páajchajak u yantal u paalaloʼob.
18 Tumen tu yoʼolal Sara, u yatan Abraháneʼ,+ Jéeobaeʼ tu beetaj kaʼach maʼ u páajtal u yantal u paalal tuláakal le koʼoleloʼob yanoʼob tu yotoch Abimélekoʼ.
