Génesis 34:1-31
34 Dina, le u hija Jacob yanchajtiʼ yéetel Leaoʼ,+ suuk kaʼach u bin u xíimbalt* le x-chʼúupalaloʼob cananeaʼoboʼ.+
2 Juntéenjeakil túuneʼ Sikemeʼ tu yilaj Dina, tu chʼaʼajeʼ ka tu violartaj. Le xiʼipal kaʼachaʼ u hijo Amor le eveooʼ,+ juntúul u nojchil le luʼumoʼ.
3 Letiʼeʼ jach utschaj tu yich Dina u hija Jacobeʼ ka kʼuch u yaabilte. Ka joʼopʼ u convencertik de ke u yaabiltmaj.
4 Sikem túuneʼ tu yaʼalaj tiʼ Amor,+ u papá: «Kaxt u formail u tsʼoʼokol in beel yéetel le x-chʼúupalaʼ».
5 Le ka tu yuʼubaj Jacob baʼax tsʼoʼok u beetaʼal tiʼ Dina tumen Sikemeʼ, tu chʼaʼtuklaj maʼ u yaʼalik tiʼ mix máak hasta ken suunak u hijoʼob, tumen letiʼobeʼ táan kaʼach u kanáantkoʼob u yalakʼ baʼalcheʼob teʼ kʼáaxoʼ.
6 Ka tsʼoʼokeʼ Amor, u papá Sikemeʼ, bin tʼaan yéetel Jacob.
7 Chéen baʼaleʼ u hijoʼob Jacobeʼ le ka tu yojéeltoʼob baʼax úucheʼ suunajoʼob tu séebaʼanil. Letiʼobeʼ jach yaachajaʼan u yóoloʼob yéetel pʼujaʼanoʼob, tumen suʼtsil tiʼ Israel wa Jacob úuchik u violartaʼal u hija tumen Sikem,+ junpʼéel baʼax maʼ unaj u yúuchul kaʼachiʼ.+
8 Amoreʼ tʼaanaj tu yéeteloʼobeʼ ka tu yaʼalajtiʼob: «In hijo Sikemeʼ uts tu yich a wíitsʼineʼex. Beeteʼex uts a chaʼikeʼex u tsʼoʼokol u beel tu yéetel.
9 Koʼox chʼaʼik xan le acuerdoaʼ: tsʼáaʼextoʼon a hijaʼex yéetel toʼoneʼ yaan k-tsʼáaikteʼex k-hijaʼob utiaʼal ka tsʼoʼokok a beeleʼex tu yéeteloʼob.+
10 Teʼexeʼ jeʼel u páajtal a kajtaleʼex t-éeteleʼ, yéetel le luʼumaʼ yaan a tiaʼalintkeʼex xan. Pʼáatkeʼex wayeʼ, jeʼel u páajtal a maaneʼex yéetel a koonoleʼex xaneʼ».
11 Sikem túuneʼ tu yaʼalaj tiʼ Jacob yéetel tiʼ u sukuʼunoʼob Dina: «Utiaʼal in lúubul utsil ta táaneʼexeʼ jeʼel baʼalak ka a kʼáateʼexeʼ jeʼel in tsʼáaikteʼexeʼ.
12 Kex wa sen koʼoj u tojol le baʼax ken a kʼáateʼexten yoʼolal le x-chʼúupaloʼ jeʼel in tsʼáaikeʼ.+ Chéen baʼax kin kʼáatikteʼexeʼ ka a chaʼex u tsʼoʼokol in beel tu yéetel».
13 U hijoʼob Jacob túuneʼ tu chʼaʼtukloʼob u tuskoʼob Sikem yéetel Amor, tumen Sikemeʼ tu violartaj Dina, le u yíitsʼinoʼoboʼ.
14 Letiʼobeʼ tu yaʼaloʼobtiʼob: «Maʼ tu páajtal k-beetik le baʼax ka kʼáatkeʼexoʼ, maʼ tu páajtal k-tsʼáaik k-íitsʼin tiʼ juntúul máax maʼ circuncidartaʼaniʼ,*+ tumen suʼtsil k-tiaʼalte.
15 Chéen jeʼel k-óotik wa ka beetkeʼex lelaʼ: beeteʼex jeʼex toʼoneʼ, u circuncidartuba tuláakal le xiiboʼob yanoʼob ta wéeteleʼexoʼ.+
16 Toʼon túuneʼ yaan k-tsʼáaikteʼex k-hijaʼob, yéetel yaan k-chʼaʼik a hijaʼex utiaʼal ka tsʼoʼokok k-beel tu yéeteloʼob, yaan xan k-kajtal ta wéeteleʼex, yéetel beyoʼ yaan k-pʼáatal junpʼéeliliʼ kaaj.
17 Pero wa maʼ ta beetkeʼex le baʼax k-aʼalikteʼex yéetel maʼ ta circuncidarkabaʼexeʼ yaan k-tokikteʼex k-íitsʼin yéetel yaan k-lukʼul wayeʼ».
18 Le baʼax tu yaʼaloʼoboʼ utschaj tu tʼaan Amor+ yéetel Sikem.+
19 Sikemeʼ tu séebaʼanil tu beetaj le baʼax tu yaʼaloʼoboʼ,+ tumen jach uts tu yich kaʼach u hija Jacob yéetel tumen letiʼe máax maas respetartaʼan tu yotoch u papáoʼ.
20 Ka tsʼoʼokeʼ Amor yéetel Sikem, u hijoeʼ, binoʼob tʼaan yéetel le máakoʼob yanoʼob tu joonajil u kaajaloʼoboʼ+ ka tu yaʼaloʼobtiʼob:
21 «Le máakoʼoboʼ u kʼáat u bisubaʼob maʼalob t-éetel. Chaʼex u pʼáatloʼob kajtal teʼ luʼumaʼ yéetel chaʼex u maanoʼob yéetel u koonoloʼobiʼ, tumen yaan suficiente luʼum utiaʼal u pʼáatloʼob. Jeʼel u páajtal u tsʼoʼokol k-beel yéetel u hijaʼobeʼ yéetel toʼoneʼ jeʼel u páajtal k-tsʼáaik k-hijaʼob tiʼ letiʼobeʼ.+
22 Chéen baʼaleʼ utiaʼal ka pʼáatkoʼob kajtal t-éetel yéetel ka pʼáatkoʼon junpʼéeliliʼ kaajeʼ unaj k-beetik lelaʼ: tuláakal xiib kajaʼan t-éeteleʼ unaj u circuncidartaʼal jeʼex u beetmil letiʼobeʼ.+
23 Bey túunoʼ tuláakal le baʼaxoʼob yaantiʼob bey xan u yalakʼ baʼalcheʼobeʼ yaan k-tiaʼalintikoʼob. Le oʼolaleʼ koʼoneʼex chaʼik u pʼáatloʼob kajtal t-éetel».
24 Tuláakal túun le máaxoʼob yanoʼob tu joonajil le kaajoʼ tu yuʼuboʼob u tʼaan Amor yéetel Sikem, u hijoeʼ, ka tu circuncidartubaʼob. Bey túun úuchik u circuncidartaʼal tuláakal le xiiboʼob teʼ kaajoʼ.
25 Tu tres días túuneʼ le máakoʼob teʼ kaajoʼ láayliʼ yaj yaniloʼob kaʼacheʼ. U hijoʼob túun Jacob: Simeón yéetel Leví, u sukuʼunoʼob Dinaeʼ,+ tu chʼaʼaj u espadaʼobeʼ ka binoʼob teʼ kaaj utiaʼal u kíimskoʼob tuláakal le xiiboʼoboʼ.+ Mix máak tukult wa letiʼe baʼax bin u beetoʼoboʼ.
26 Letiʼobeʼ tu kíimsoʼob Amor bey xan Sikem yéetel espada. Ka tsʼoʼokeʼ tu jóoʼsoʼob Dina tu yotoch Sikemeʼ ka lukʼoʼobiʼ.
27 Uláakʼ u hijoʼob Jacobeʼ binoʼob teʼ kaajoʼ ka tu yiloʼob le máakoʼob kíimsaʼanoʼoboʼ, ka túun joʼopʼ u chʼaʼikoʼob tuláakal le baʼax yaan teʼ kaajoʼ, tu beetoʼob leloʼ tumen Sikemeʼ tu violartaj u yíitsʼinoʼob.+
28 Tu chʼaʼajoʼob u yalakʼ tamanoʼob, u yalakʼ chivoʼob, u yalakʼ wakaxoʼob, u yalakʼ burroʼob, yéetel tuláakal baʼax yaan teʼ kaaj bey xan tuláakal baʼax yaan teʼ kʼáaxoʼ.
29 Tu chʼaʼajoʼob tuláakal baʼax yaan tiʼ le máakoʼoboʼ, tu chʼaʼajoʼob le mejen paalaloʼoboʼ bey xan u yatanoʼob, tu chʼaʼajoʼob xan tuláakal le baʼax yaan ichil le najoʼoboʼ.
30 Jacob túuneʼ tu yaʼalaj tiʼ Simeón yéetel tiʼ Leví:+ «Tsʼoʼok a woksikeneʼex tiʼ junpʼéel nojoch problema, yaan a beetkeʼex in pʼektaʼal tumen le cananeoʼob yéetel le perizitaʼoboʼ, le máaxoʼob kajaʼanoʼob teʼ luʼumaʼ. Toʼoneʼ maʼ yaʼaboʼoniʼ, letiʼob túuneʼ yaan u muchʼkubaʼob utiaʼal u atacarkenoʼob yéetel yaan u xuʼulskenoʼob paʼteʼ yéetel le máaxoʼob yanoʼob tin wotochoʼ».
31 Chéen baʼaleʼ letiʼobeʼ tu yaʼaloʼob: «Toʼoneʼ maʼ tu páajtal k-chaʼik u tratartaʼal k-íitsʼin jeʼex juntúul x-prostitutaeʼ».
