Génesis 35:1-29
35 Le ka tsʼoʼok leloʼ, Dioseʼ tu yaʼalaj tiʼ Jacob: «Líiʼkech, xeen Betel+ ka kajlakechiʼ, yéetel teʼeloʼ beet junpʼéel altar tiʼ teen, le u jaajil Diosoʼ, le máax chíikpajtech le táan a púutsʼul tiʼ a sukuʼun Esaúoʼ».+
2 Jacob túuneʼ tu yaʼalaj tiʼ tuláakal le máaxoʼob yanoʼob tu yotochoʼ bey xan tiʼ tuláakal le máaxoʼob yanoʼob tu yéeteloʼ: «Juntarteʼex tuláakal le imagenoʼob yaanteʼexoʼ,+ ichkíilneneʼex yéetel kʼex a nookʼeʼex.
3 Líikʼeneʼex utiaʼal ka xiʼikoʼon Betel. Teʼeloʼ yaan in beetik junpʼéel altar tiʼ le u jaajil Diosoʼ, le máax tu núukaj in oración teʼ kʼiinoʼob jach táan in muʼyajoʼ, yéetel le máax tsʼoʼok u yantal tin wéetel tak bejlaʼoʼ».+
4 Letiʼob túuneʼ tu tsʼáajoʼob tiʼ Jacob tuláakal le imagenoʼob yaantiʼoboʼ bey xan le tuupoʼob yaan tu xiknoʼoboʼ. Jacob túuneʼ tu chʼaʼaj tuláakal le baʼaloʼobaʼ ka tu mukaj yáanal junkúul nojoch cheʼ yaan naatsʼ tiʼ u kaajil Sikem.
5 Le táan u viajaroʼoboʼ Dioseʼ tu beetaj u sen sajaktal le máakoʼob yanoʼob teʼ kaajoʼob tuʼux ku máanoʼoboʼ. Le oʼolal maʼ tu chʼaʼpachtoʼob u paalal Jacobiʼ.
6 Ka máan kʼiineʼ Jacob yéetel tuláakal le máaxoʼob yanoʼob tu yéeteloʼ kʼuchoʼob tu kaajil Luz+ wa Betel, tu luʼumil Canaán.
7 Teʼeloʼ tu beetaj junpʼéel altareʼ ka tu tsʼáaj u kʼaabaʼt El-betel,* tumen le u jaajil Diosoʼ tiʼ tu chíikbesuba tiʼ letiʼ le táan u púutsʼul kaʼach tiʼ u sukuʼunoʼ.+
8 Ka máan kʼiineʼ kíim Débora,+ le máax kanáant Rebeca desde tu chichniloʼ. Ka túun muʼuk yáanal junkúul nojoch cheʼ* yaan naatsʼ tiʼ u kaajil Betel. Jacob túuneʼ tu tsʼáaj u kʼaabaʼt Alón-bacut* tiʼ le cheʼoʼ.
9 Le táan u suut Jacob desde tu luʼumil Padán-aramoʼ, Dioseʼ tu chíikbesuba tu kaʼatéen tiʼ letiʼeʼ ka tu bendecirtaj.
10 Dioseʼ tu yaʼalajtiʼ: «A kʼaabaʼeʼ Jacob,+ chéen baʼaleʼ maʼ kun kaʼa aʼalbiltech Jacob, desde bejlaʼeʼ a kʼaabaʼeʼ Israel». Letiʼ túuneʼ káaj u yaʼalik Israel tiʼ Jacob.+
11 Dioseʼ tu yaʼalaj xan tiʼ: «Teen le Dios jach táaj yaan u poderoʼ.+ Yanak a paalal, yaʼabchajkeʼex. Tiʼ techeʼ yaan u jóokʼol naciónoʼob, yaʼab naciónoʼob.+ Tiʼ teech xaneʼ yaan u jóokʼol reyoʼob.+
12 Le luʼum tin tsʼáaj tiʼ Abrahán yéetel tiʼ Isaakoʼ tiʼ teech ken in tsʼáae yéetel yaan xan in tsʼáaik tiʼ a paalal kun antaloʼ».+
13 Dios túuneʼ lukʼ teʼ tuʼux táan u tʼaan kaʼach yéetel Jacoboʼ.
14 Jacob túuneʼ tu waʼakúuntaj junpʼéel tuunich bey señal teʼ tuʼux tʼaanaj yéetel Diosoʼ, ka tsʼoʼokeʼ tu wekaj vino yéetel aceite bey junpʼéel ofrenda utiaʼal Dios tu yóokʼol le tuunichoʼ.+
15 Jacob túuneʼ tu kaʼa tsʼáaj u kʼaabaʼt Betel+ tiʼ le lugar tuʼux tʼaʼan tumen Diosoʼ.
16 Letiʼob túuneʼ lukʼoʼob Betel. Chéen baʼaleʼ le náach yanikoʼob tiʼ u kaajil Efratoʼ Raqueleʼ kʼuch u yorail u síijil u chaambal,* le táan túun u síijiloʼ complicarnajtiʼ.
17 Teʼ súutuk jach táan u muʼyajoʼ le parteraoʼ tu yaʼalajtiʼ: «Maʼ a tuklik, le uláakʼ a chan hijoaʼ yaan xan u síijil».+
18 Raquel túuneʼ táan kaʼach u kíimil. Le táan u chʼaʼik u tsʼook u yiikʼoʼ tu yaʼaleʼ Ben-oní* ken u kʼaabaʼt le chan xiʼipaloʼ, chéen baʼaleʼ Jacobeʼ tu tsʼáaj u kʼaabaʼt Benjamín.*+
19 Bey túun úuchik u kíimil Raqueloʼ, ka muʼuk tu bejil Efrat wa Belén.+
20 Jacobeʼ tu waʼakúuntaj junpʼéel nojoch tuunich bey señal teʼ tuʼux muʼuk Raqueloʼ. Tak bejlaʼeʼ le tuunichaʼ u señalil le tuʼux muʼuk Raqueloʼ.
21 Ka tsʼoʼokeʼ Israeleʼ lukʼ teʼeloʼ ka tu armartaj junpʼéel naj de nookʼ chan náach tiʼ u torreil Éder.
22 Juntéenjeak le kajaʼan kaʼach Israel teʼ luʼumoʼ, Rubéneʼ yanchaj baʼal u yil yéetel Bilá, le uláakʼ u yatan* u papáoʼ. Israel túuneʼ kʼuch u yojéelte.+
U hijoʼob Jacobeʼ tu chukaj 12 u túulal.
23 U hijoʼob Leaeʼ: Rubén,+ le yáax hijo yanchajtiʼ yéetel Jacoboʼ, ka tsʼoʼokeʼ síij Simeón, Leví, Judá, Isacar yéetel Zabulón.
24 U hijoʼob Raqueleʼ letiʼe jeʼeloʼobaʼ: José yéetel Benjamín.
25 U hijoʼob Bilá, u sirvienta Raqueleʼ, letiʼe jeʼeloʼobaʼ: Dan yéetel Neftalí.
26 U hijoʼob Zilpá, u sirvienta Leaeʼ, letiʼe jeʼeloʼobaʼ: Gad yéetel Aser. Leloʼobaʼ letiʼe u hijoʼob Jacob síijoʼob tu luʼumil Padán-aramoʼ.
27 Ka máan kʼiineʼ Jacobeʼ kʼuch Mamré, le tuʼux yaan kaʼach Isaak, u papáoʼ.+ Mamré kaʼacheʼ tiaʼan naatsʼ tiʼ Kiriat-arbá wa Hebrón, le lugar tuʼux kajlajoʼob Abrahán yéetel Isaak bey j-táanxel luʼumiloʼobeʼ.+
28 Tuláakal túun u kʼiiniloʼob u kuxtal Isaakeʼ tu chukaj 180 años.+
29 Isaakeʼ xáanchaj u kuxtal, kuxlaj ich kiʼimak óolal. Le ka tsʼoʼokeʼ kíimeʼ ka muʼuk tumen Esaú yéetel Jacob, u hijoʼob, jeʼex úuchik u muʼukul u yúuchben láakʼtsiloʼobeʼ.+
Notas
^ U kʼáat u yaʼal «U Diosil Betel».
^ U kʼaabaʼ le cheʼaʼ «encino».
^ U kʼáat u yaʼal «Nojoch Cheʼ Tuʼux ku Yúuchul Okʼol».
^ Tuláakʼ tuʼuxeʼ ku yaʼalaʼal «chaanpal».
^ U kʼáat u yaʼal «Le Hijo tu Sen Beetaj in Muʼyaj ka Síijoʼ».
^ U kʼáat u yaʼal «Le Hijo Yaan Tin x-Noʼoj Kʼaboʼ».
^ Ich hebreoeʼ ku yaʼalaʼal kaʼach «concubina».
