Génesis 38:1-30
-
Judá yéetel Tamar (1-30)
38 Teʼ kʼiinoʼob jeʼeloʼ Judáeʼ lukʼ tu yiknal u láakʼtsiloʼobeʼ ka bin u armart junpʼéel naj de nookʼ naatsʼ tiʼ juntúul adulamita ku kʼaabaʼtik Jirá.
2 Teʼeloʼ Judáeʼ tu kʼaj óoltaj u hija Suja, juntúul cananeo,+ ka tu chʼaʼaj u yatante, tsʼoʼoleʼ yanchaj baʼal u yil tu yéetel.
3 Letiʼ túuneʼ pʼáat embarazadail. Ka máan tiempoeʼ le koʼoleloʼ síij u chaambal,* ka tu tsʼáaj u kʼaabaʼt Er.+
4 Pʼáat embarazadail tu kaʼatéeneʼ, ka yanchaj uláakʼ u hijo, ka tu tsʼáaj u kʼaabaʼt Onán.
5 Ka tsʼoʼokeʼ yanchaj uláakʼ u hijo, ka tu tsʼáaj u kʼaabaʼt Sela. Letiʼobeʼ tiʼ yanoʼob kaʼach tu kaajil Akzib+ ka síij Selaeʼ.
6 Ka máan tiempoeʼ Judáeʼ tu kaxtaj u yatan Er, u yáax hijo, u kʼaabaʼ le koʼolelaʼ Tamar.+
7 Chéen baʼaleʼ Er, u yáax hijo Judáeʼ, táan kaʼach u beetik baʼax kʼaas tu táan Jéeoba, le oʼolal Jéeobaeʼ tu beetaj u kíimil.
8 Yoʼolal leloʼ Judáeʼ tu yaʼalaj tiʼ Onán: «Tsʼoʼokok a beel yéetel u yatan a sukuʼun, tsʼoʼoleʼ yanak baʼal a wil tu yéetel utiaʼal u yantal u paalal a sukuʼun».+
9 Chéen baʼaleʼ Onáneʼ u yojliliʼ le u paal kun antaloʼ maʼ kun aʼalbil wa u tiaʼal.+ Le oʼolal le táan u yantal baʼal u yil yéetel u yatan kaʼach u sukuʼunoʼ tu chaʼaj u wéekel u semen luʼum, utiaʼal maʼ u yantal u paalal u sukuʼun.+
10 Le baʼax tu beetoʼ jach kʼaas tu yilil Jéeoba, le oʼolal tu beetaj xan u kíimil.+
11 Judáeʼ tu yaʼalaj tiʼ Tamar, u yilib: «Maʼ u kaʼa tsʼoʼokol a beel tak ken nojochchajak in hijo Sela, mientraseʼ pʼáaten tu yotoch a papá». Tu yaʼalaj beyoʼ tumen ku tuklik kaʼach lelaʼ: ‹Bik kíimik xan Sela jeʼex u sukuʼunoʼobeʼ›.+ Tamar túuneʼ bin tu yotoch u papáeʼ ka pʼáat tu yiknal.
12 Ka máan kʼiineʼ kíim u yatan Judá, le u hija Sujaoʼ.+ Judá túuneʼ le ka máan u kʼiiniloʼob u sen yaatal u yóoleʼ bin tak Timna+ teʼ tuʼux ku kʼoʼosol u tsoʼotsel u yalakʼ tamanoʼob tumen u j-meyajoʼoboʼ. Letiʼeʼ láakʼintaʼab tumen Jirá, le adulamitaoʼ.+
13 Tiʼ Tamareʼ aʼalaʼab lelaʼ: «A suegroeʼ táan u bin Timna utiaʼal u kʼosik u tsoʼotsel u yalakʼ tamanoʼob».
14 Le ka tu yuʼubaj leloʼ tu luʼsaj le nookʼ eʼesik de ke viudaoʼ, tu bóochʼintaj junpʼéel nookʼeʼ, ka tsʼoʼokeʼ tu pixaj xan u yich yéetel junpʼéel jaajay nookʼ. Tsʼoʼoleʼ bin kutal tu entradail Enaim, junpʼéel lugar yaan tu bejil Timna. Tu beetaj lelaʼ tumen tu yileʼ kex tsʼoʼok u nojochtal Selaeʼ maʼ tsʼoʼoksaʼak u beel tu yéeteliʼ.+
15 Judá túuneʼ le ka tu yileʼ tu séebaʼanil tu tuklaj juntúul x-prostituta tumen u pixmaj kaʼach u yich.
16 Letiʼ túuneʼ tséeleʼ ka náatsʼ tu yiknal, ka tu yaʼalajtiʼ: «Beet uts a chaʼik ka yanak baʼax in wil ta wéetel». Tu yaʼalajtiʼ lelaʼ tumen maʼ u yojel kaʼach wa u yilibiʼ.+ Chéen baʼaleʼ u yilibeʼ tu yaʼalajtiʼ: «¿Baʼax ken a tsʼáaten utiaʼal ka yanak baʼal in wil ta wéetel?».
17 Letiʼeʼ tu núukajtiʼ: «Jeʼel in túuxtiktech juntúul tiʼ le chan chivoʼob yaantenoʼ». Le koʼolel túunoʼ tu núukaj: «¿Baʼax ken a tsʼáaten utiaʼal in wojéeltik wa jach tu jaajil yaan a túuxtik?».
18 Ka túun tu yaʼalajtiʼ: «¿Baʼax túun a kʼáat ka in tsʼáatech?». Le koʼolel túunoʼ tu yaʼalaj: «Tsʼáaten u anilloil a sellar+ paʼteʼ yéetel u cordóniloʼ, bey xan le xóotʼ cheʼ a machmoʼ». Letiʼ túuneʼ tu tsʼáaj tuláakal le baʼaloʼob tiʼaʼ ka yanchaj baʼal u yil tu yéetel, ka máan kʼiineʼ le koʼoleloʼ pʼáat embarazadail.
19 Tamar túuneʼ líikʼeʼ ka bini, tsʼoʼoleʼ tu luʼsaj le nookʼ u bóochʼintmoʼ ka tu tsʼáaj le nookʼ eʼesik de ke viudaoʼ.
20 Judá túuneʼ tu tsʼáaj le chan chivo tiʼ u amigo adulamita+ utiaʼal ka u bis tiʼ le koʼoleloʼ yéetel utiaʼal ka suʼutuktiʼ le baʼaxoʼob tu pʼatajtiʼoʼ. Chéen baʼaleʼ le adulamitaoʼ maʼ tu kaxtaj le koʼoleloʼ.
21 Letiʼeʼ tu kʼáataj tiʼ u máakiloʼob le lugaroʼ: «¿Tuʼux yaan le u x-prostitutail templo yaan kaʼach tu jáal u bejil Enaimoʼ?». Chéen baʼaleʼ letiʼobeʼ tu núukoʼob: «Mix juntéen yanak juntúul u x-prostitutail templo wayeʼ».
22 Letiʼ túuneʼ suunaj tu yiknal Judáeʼ ka tu yaʼalajtiʼ: «Maʼ tin kaxtaj le koʼoleloʼ. Tsʼoʼoleʼ u máakiloʼob le lugaroʼ tu yaʼaloʼobten: ‹Mix juntéen yanak juntúul u x-prostitutail templo wayeʼ›».
23 Judá túuneʼ tu yaʼalaj: «Pʼáataktiʼ le baʼaloʼoboʼ, wa maʼeʼ suʼtsil táan k-máan kaxte. Jeʼel bixakeʼ teneʼ tin túuxtaj le chan chivo tiʼoʼ, chéen baʼaleʼ maʼ ta kaxtiʼ».
24 Le ka máan tres meseseʼ aʼalaʼab tiʼ Judá: «A wilib Tamareʼ tsʼoʼok u prostituirkuba, le oʼolal embarazada». Judá túuneʼ tu yaʼalaj: «Jóoʼseʼex utiaʼal ka tóokaʼak».+
25 Le táan u bisaʼal Tamaroʼ tu túuxtaj aʼalbil tiʼ u suegro: «U yuumil le baʼaloʼobaʼ u papá le paal kin páaʼtikoʼ». Tu yaʼalaj xan: «Beet uts a waʼalikten máax tiaʼal le anillo utiaʼal sellar yéetel u cordónilaʼ bey xan le xóotʼ cheʼaʼ».+
26 Judá túuneʼ tu jach ilaj le baʼaloʼobaʼ ka tu yaʼalaj: «Le koʼolelaʼ maʼalob baʼax tu beetaj, teen maʼ tin beetaj baʼax maʼalobiʼ. Tumen maʼ tin tsʼoʼoksaj u beel yéetel in hijo Selaiʼ».+ Letiʼ túuneʼ maʼ kaʼa anchaj baʼal u yil yéetel Tamariʼ.
27 Le ka kʼuch u kʼiinileʼ yanchaj gemeloʼob tiʼ.
28 Tu yorail táan u síijil le chaambaloʼoboʼ, juntúul tiʼ letiʼobeʼ tu jóoʼsaj u kʼab. Tu séebaʼanil túuneʼ le parteraoʼ tu kʼaxaj junxóotʼ chak hilo tu kʼab le chaambaloʼ ka tu yaʼalaj: «Lelaʼ letiʼe yáax jóokʼaʼ».
29 Pero chéen pʼelak tu yoksil u kʼab le chaambaloʼ jóokʼ u gemelo. Le oʼolal le parteraoʼ tu yaʼalaj: «¿Bix páajchajik a yáax jóokʼol teech beyaʼ?». Le beetik tsʼaʼab u kʼaabaʼt Pérez.+
30 Ka tsʼoʼokeʼ jóokʼ le uláakʼ chaambaloʼ, le kʼaxaʼan chak hilo tu kʼaboʼ, ka tsʼaʼab u kʼaabaʼt Zera.+
Notas
^ Tuláakʼ tuʼuxeʼ ku yaʼalaʼal «chaanpal».
