Génesis 48:1-22
48 Maʼ sen úuch tiʼ leloʼ tiʼ Joséeʼ aʼalaʼab lelaʼ: «A papáeʼ jach tsʼoʼok u kʼojaʼantal». Le ka tu yuʼubeʼ tu chʼaʼaj Manasés yéetel Efraín,+ u kaʼatúul hijoʼobeʼ, ka bin u yil u papá.
2 Tiʼ Jacob túuneʼ aʼalaʼab lelaʼ: «Tsʼoʼok u taal u yilech a hijo José». Le ka tu yuʼubaj Israeleʼ, kex istikyajeʼ, líikʼeʼ ka kulaj tu cama.
3 Jacob túuneʼ tu yaʼalaj tiʼ José:
«Le Dios jach táaj yaan u poderoʼ chíikpajten teʼ lugar ku kʼaabaʼtik Luz, teʼ tu luʼumil Canaánoʼ, ka tu bendecirten.+
4 Ka tsʼoʼokeʼ tu yaʼalajten: ‹Yaan in beetik u yaʼabtal a paalal yéetel yaan in beetik u jóokʼol yaʼab múuchʼ kaajoʼob tiʼ teech.+ Tsʼoʼoleʼ le luʼumaʼ yaan in tsʼáaik tiʼ a paalal kun antaloʼ, yéetel yaan u tiaʼalintikoʼob utiaʼal mantatsʼ›.+
5 Le a kaʼatúul hijoʼob síijoʼob way tu luʼumil Egipto antes tiʼ in kʼuchleʼ in tiaʼaloʼob.+ Beoraaʼ Efraín yéetel Manaséseʼ in hijoʼob jeʼex Rubén yéetel Simeón in hijoʼobeʼ.+
6 Chéen baʼaleʼ le uláakʼ a paalal kun antaloʼ a tiaʼaloʼob, u herenciaʼobeʼ+ yaan u jóokʼol tiʼ le kun tsʼaabil tiʼ Efraín yéetel Manasés, u kaʼatúul sukuʼunoʼoboʼ.
7 Kʼajaʼanteneʼ le ka lukʼen tu luʼumil Padáneʼ joʼopʼ in bíin tak tu luʼumil Canaán. Le tiaʼanen tu luʼumil Canaánoʼ kíim+ Raquel a maama. Lelaʼ úuch le chan náach yanilen tiʼ u kaajil Efratoʼ.+ Le oʼolaleʼ tin mukaj tu bejil Efrat wa Belén».+
8 Israel túuneʼ le ka tu yilaj u hijoʼob Joséeʼ, tu kʼáataj: «¿Máax leloʼobaʼ?».
9 José túuneʼ tu yaʼalaj tiʼ u papá: «Letiʼe in hijoʼob tsʼoʼok u tsʼáaikten Dios way tu luʼumil Egiptoaʼ».+ Israeleʼ tu yaʼalajtiʼ: «Beet uts a natsʼkoʼob tin wiknal utiaʼal ka in bendecirtoʼob».+
10 Israel kaʼacheʼ tsʼoʼok u chan chʼíijil, le oʼolaleʼ tsʼoʼok u pʼáatal maʼ sáasil u paakatiʼ. Le beetik Joséeʼ tu natsʼaj u hijoʼob tu yiknal u papá. Israel túuneʼ tu méekʼoʼobeʼ ka tu tsʼuʼutsʼoʼob.
11 Ka tsʼoʼokeʼ Israeleʼ tu yaʼalaj tiʼ José: «Mix juntéen tin tuklaj wa yaan in kaʼa ilkech,+ chéen baʼaleʼ ile, Dioseʼ tsʼoʼok tak u chaʼik in wilik a paalal».
12 U paalal Joséeʼ tiaʼanoʼob kaʼach naatsʼ tiʼ u píix Israeleʼ. José túuneʼ tu luʼsoʼobiʼ, ka tsʼoʼokeʼ letiʼeʼ xolajeʼ ka chinlaj tu táan u papá.
13 José túuneʼ yéetel u x-noʼoj kʼabeʼ tu machaj Efraíneʼ+ ka tu tsʼáaj tu x-tsʼíik u papá. Ka tsʼoʼokeʼ yéetel u x-tsʼíik kʼabeʼ tu machaj Manaséseʼ+ ka tu tsʼáaj tu x-noʼoj kʼab u papá.
14 Chéen baʼaleʼ Israeleʼ tu tsʼáaj u x-noʼoj kʼab tu yóokʼol u pool Efraín, kex letiʼ u maas chichnil, ka tsʼoʼokeʼ tu tsʼáaj u x-tsʼíik kʼab tu yóokʼol u pool Manasés. Israeleʼ u yóoliliʼ úuchik u tsʼáaik u kʼab beyoʼ, kex tumen Manaséseʼ letiʼ le yáax hijooʼ.+
15 Letiʼ túuneʼ tu bendecirtaj José yéetel le tʼaanoʼobaʼ:+
«Le u jaajil Dios adorartaʼab tumen Isaak in papá, yéetel tumen Abrahán in abueloeʼ,+le u jaajil Dios kanáanten tuláakal u kʼiiniloʼob in kuxtal tak bejlaʼeʼ,+
16 yéetel le máax tu túuxtaj u ángel utiaʼal u yáantken tiʼ jeʼel baʼalak problemaileʼ,+ letiʼ xan ka u bendecirt le paalaloʼobaʼ.+
Yéetel tu yoʼolal le paalaloʼobaʼ le máakoʼoboʼ ka u kʼaʼajsoʼob in kʼaabaʼ, u kʼaabaʼ in abuelo Abrahán yéetel u kʼaabaʼ in papá Isaak.
Yanchajak u paalaloʼob hasta u sen yaʼabtaloʼob yóokʼol le luʼumoʼ».+
17 Le ka tu yilaj José maʼ tu luʼsik u x-noʼoj kʼab u papá tu pool Efraíneʼ, maʼ utschaj tu tʼaaniʼ, le oʼolal tu machaj u kʼab u papáeʼ ka tu yóotaj u luʼs yóokʼol u pool Efraín utiaʼal ka u tsʼáa yóokʼol u pool Manasés.
18 José túuneʼ tu yaʼalaj tiʼ u papá: «Maʼ papá, maʼ beyiʼ. Lelaʼ letiʼe in yáax hijoaʼ,+ tsʼáa a x-noʼoj kʼab tu yóokʼol u pool».
19 Chéen baʼaleʼ u papáeʼ maʼ tu yóotaj u beet beyoʼ, baʼaxeʼ tu yaʼalajtiʼ: «Hijo, in wojel, leloʼ in wojel. Letiʼ xaneʼ yaan u kʼuchul u beetuba junpʼéel nojoch kaaj, le kaajaʼ jach yaan u kʼaj óoltaʼal xan. Chéen baʼaleʼ le íitsʼintsiloʼ yaan u kʼuchul u beetuba junpʼéel kaaj maas nojoch+ yéetel yaan u sen yaʼabtal u paalal, jeʼel tak u formarkoʼob yaʼab naciónoʼobeʼ».+
20 Teʼ kʼiin jeʼeloʼ Israeleʼ seguernaj u bendecirkoʼob+ táan u yaʼalik:
«Jeʼel máaxak tiʼ Israel ka u yaʼal junpʼéel bendicióneʼ yaan u meyajtiʼ a kʼaabaʼ yéetel yaan u yaʼalik:
‹Ka u bendecirtech Dios jeʼex tu bendecirtil Efraín yéetel Manaséseʼ›».
Israel túuneʼ seguernaj u maas bendecirtik Efraín ke Manasés.
21 Ka tsʼoʼokeʼ Israeleʼ tu yaʼalaj tiʼ José: «Ilawile, taʼaytak in kíimil,+ chéen baʼaleʼ Dioseʼ maʼ ken u pʼateʼex ta juunaleʼex, yéetel yaan u beetik a suuteʼex tu luʼum a úuchben láakʼtsileʼexoʼ.+
22 Teneʼ kin tsʼáaiktech uláakʼ junxóotʼ luʼum, junxóotʼ maas ke tiʼ a sukuʼunoʼoboʼ. Lelaʼ letiʼe tin chʼaʼaj tiʼ le amorreoʼob yéetel in espada bey xan yéetel in arco le ka baʼatelnajen tu yéeteloʼoboʼ».
