Génesis 49:1-33
49 Jacob túuneʼ tu tʼanaj u hijoʼobeʼ ka tu yaʼalajtiʼob: «Natsʼabaʼex utiaʼal ka in waʼalteʼex baʼax ku taal u kʼiin u yúuchul.
2 U hijoʼex Jacob, muchʼabaʼex utiaʼal ka a wuʼuyeʼex baʼax ken u yaʼalteʼex Israel a papáʼex.
3 Rubén,+ teech le in yáax hijo+ yanchajten teʼ kʼiinoʼob jach yaan in muukʼoʼ, techeʼ jach ka respetartaʼal yéetel jach nojoch a páajtalil.
4 Pero desde bejlaʼeʼ maʼ kan maastal tiʼ a sukuʼunoʼob tumen beyech jeʼex le jaʼ ku woʼoltikuba maʼ tu páajtal u controlartaʼaloʼ, chilajech yéetel u yatan a papá.+ Jach beyoʼ techeʼ chilajech yéetel u yatan a papá. ¡Letiʼe baʼax ta beetoʼ!
5 Simeón yéetel Levíeʼ sukuʼuntsiloʼob.+ U espadaʼobeʼ ku meyajtiʼob chéen utiaʼal u beetkoʼob loob.+
6 Israel, maʼ a biskaba tu yéeteloʼob mix a wantal teʼ tuʼux ku muchʼkubaʼoboʼ. Tumen yoʼolal u pʼujaʼaniloʼobeʼ tu kíimsoʼob yaʼabkach máakoʼob,+ tsʼoʼoleʼ chéen tumen uts tu tʼaanoʼobeʼ tu xotʼoʼob u xiichʼel u yook wakaxoʼob.
7 Maldecirtaʼak le bix u kʼuuxiloʼoboʼ, tumen jach táaj kʼaas. Maldecirtaʼak le bix u pʼuʼujuloʼoboʼ tumen maʼ tu chʼaʼikoʼob óotsilil.+ Yaan in kʼiʼitbeskoʼob tiʼ tuláakal u luʼumil Jacob wa Israel.+
8 Chéen baʼaleʼ, techeʼ Judá,+ yaan a bendecirtaʼal tumen a sukuʼunoʼob.+ Techeʼ yaan a ganartik a enemigoʼob,+ yéetel a láakʼtsiloʼobeʼ yaan u chintaloʼob ta táan.+
9 Judá, techeʼ beyech jeʼex u mejnil leóneʼ.+ Tumen juntúul leóneʼ le kéen tsʼoʼokok u janaleʼ ku líikʼleʼ ku bin, tsʼoʼoleʼ ku chital yéetel ku satsʼkuba, ¿máax túun jeʼel u atrever u líiʼseʼ?
10 U xóolteʼ le reyoʼ+ maʼ kun lukʼul tiʼ Judá, u xóolteʼ le máax ku nuʼuktajoʼ mantatsʼ kun antal tu yook, hasta u taal Silóeʼ.*+ Tuláakal túun le kaajoʼoboʼ yaan u yuʼubikoʼob u tʼaan.+
11 Letiʼeʼ yaan u kʼaxik u yalakʼ burro tiʼ junpʼéel mata uva, yéetel u táankelem burroeʼ yaan u kʼaxik tiʼ junpʼéel mata uva ku tsʼáaik maʼalob ich. Letiʼ xaneʼ yaan u pʼoʼik u nookʼ yéetel vino bey xan yéetel u jugo uva.
12 U yichoʼobeʼ chaktak bey jeʼex le vinooʼ, yéetel u kojoʼobeʼ saktak bey jeʼex le lecheoʼ.
13 Zabulóneʼ+ yaan u kajtal teʼ jáal kʼáaʼnáaboʼ, tiʼ kun pʼáatal teʼ jáal jaʼ tuʼux ku anclartaʼal le barcoʼoboʼ,+ yéetel u kʼaaxeʼ yaan u kʼuchul tak Sidón.+
14 Isacareʼ+ bey jeʼex juntúul burro jach yaan u muukʼ ku páajtal u chital kex kʼaxaʼan u kuuch tu kaʼatséel u puʼucheʼ.*
15 Letiʼeʼ yaan u tsʼáaik cuentaeʼ le lugar tuʼux kun pʼáatal jeʼeleloʼ jach maʼalob, yéetel jach jatsʼuts u luʼumil. Le oʼolal yaan u yóotik u yéems u hombro utiaʼal u kuchik baʼaloʼob aaltak yéetel yaan u yóotik sen meyaj jeʼex juntúul esclavoeʼ.
16 Dan,+ juntúul tiʼ u tribuʼob Israeleʼ,+ yaan u juzgartik tuláakal le kaajoʼ.
17 Daneʼ bey jeʼex juntúul kaan yaan teʼ jáal bejoʼ, bey jeʼex juntúul kaan jach venenoso yaan tu jáal le bejoʼ, letiʼeʼ ku chiʼik u yook le tsíimin utiaʼal ka jawkʼajak le máax natʼmiloʼ.+
18 Kiʼichkelem Yuum Jéeoba, teneʼ yaan in páaʼtik u kʼuchul u kʼiinil a salvarken.
19 U luʼumil Gadeʼ+ yaan u atacartaʼal tumen junmúuchʼ maleanteʼob, chéen baʼaleʼ letiʼeʼ yaan u jóoʼskoʼob yéetel yaan u chʼaʼpachtikoʼob.+
20 Asereʼ+ yaan u yantal yaʼab baʼal utiaʼal u jaante. Tu luʼumeʼ yaan u yantal u clasesil baʼal utiaʼal jaantbil, bey jeʼex le ku bisaʼal tiʼ juntúul reyoʼ.+
21 Neftalíeʼ+ jach jatsʼuts bix u tʼaan,+ tsʼoʼoleʼ bey jeʼex juntúul x-chʼupul kéej jach chich u yáalkabeʼ.
22 Joséeʼ+ bey jeʼex u kʼuʼukʼ junkúul cheʼ ku sen tsʼáaik u yicheʼ. Letiʼeʼ bey jeʼex junkúul cheʼ tiaʼan naatsʼ tiʼ jaʼeʼ, yéetel u gajosileʼ ku naʼakal yóoʼ pakʼ.
23 Chéen baʼaleʼ le arqueroʼoboʼ maʼ xuʼul u náaksikoʼob u yóoliʼ, baʼaxeʼ káaj u chʼinikoʼob yéetel u flechaʼob, yéetel maʼ xuʼul u pʼektikoʼobiʼ.+
24 Pero letiʼeʼ u machmaj tubeel u arco+ utiaʼal u chʼinik u flechaʼob, tumen u kʼaboʼobeʼ jach yaan u muukʼ.+ Lelaʼ úuch yoʼolal le máax áant Jacoboʼ, le máax nojoch u poderoʼ, letiʼeʼ u j-kanan taman yéetel u tuunichil Israel.
25 Joséeʼ túuxtaʼab tumen u Dios u papá yéetel letiʼ kun áantik. Letiʼeʼ tiaʼan yéetel le Dios jach táaj yaan u poderoʼ. Dioseʼ yaan u bendecirkech yéetel le baʼaloʼob ku taaloʼob teʼ kaʼanoʼ, yaan u bendecirkech yéetel le baʼaloʼob yaan teʼ luʼumoʼ,+ yéetel yaan u bendecirkech utiaʼal ka yaʼabchajak a paalal bey xan utiaʼal ka yaʼabchajak a walakʼ baʼalcheʼob.
26 Le baʼaloʼob maʼalobtak ku tsʼáaiktech a papáoʼ maas maʼalobtak tiʼ le maʼalob baʼaloʼob ku tsʼáaik le montañaʼob mix bikʼin kun xuʼululoʼoboʼ, yéetel maas maʼalobtak xan tiʼ le maʼalob baʼaloʼob ku tsʼáaik le puʼukoʼob* mix bikʼin kun péekoʼoboʼ.+ Le baʼaloʼobaʼ mantatsʼ tiʼ kun antal yóokʼol u pool José, le máax yéeyaʼan ichil u sukuʼunoʼoboʼ.+
27 Benjamíneʼ+ yaan u xeʼexetʼik le bakʼ bey jeʼex juntúul loboeʼ.+ De tempranoeʼ yaan u jaantik u bakʼel le baʼalcheʼ tu kíimsoʼ, yéetel de tardeeʼ yaan u tʼoxik le baʼax ken u tok tiʼ u enemigoʼoboʼ».+
28 Tuláakal le jeʼeloʼobaʼ letiʼe u 12 tribuʼob Israeloʼ, yéetel letiʼe baʼax aʼalaʼabtiʼob tumen u papáʼob le táan u bendecirtaʼaloʼoboʼ. Israeleʼ tu bendecirtaj cada juntúul jeʼel bix ku merecerkeʼ.+
29 Le ka tsʼoʼokeʼ Israeleʼ tu yaʼalaj tiʼ u hijoʼob: «Kin wuʼuyik jach taʼaytak in kíimil.+ Le kéen kíimkeneʼ mukeneʼex teʼ tuʼux mukaʼan in papáʼoboʼ, teʼ sajkab yaan tu kʼaax Efrón le ititaoʼ,+
30 le sajkab yaan tu kʼáaxil Makpelá naatsʼ tiʼ Mamréoʼ, lelaʼ tiaʼan teʼ tu luʼumil Canaánoʼ. Le kʼáaxaʼ letiʼe tu manaj Abrahán tiʼ Efrón le itita utiaʼal u mukik u láakʼtsiloʼob kun kíimloʼoboʼ.
31 Teʼeloʼ tiʼ muʼuk Abrahán yéetel Sara,+ u yataniʼ. Tiʼ muʼuk xan Isaak+ yéetel Rebeca, u yataniʼ, yéetel tiʼ xan tin mukaj Leaiʼ.
32 Le kʼáax yéetel u sajkabiloʼ maʼanoʼob tiʼ u hijoʼob Et».+
33 Jacobeʼ bey tsʼoʼokik u yaʼalik tiʼ u hijoʼob baʼax ken u beetoʼoboʼ. Le ka tsʼoʼokeʼ tu naʼaksaj u yook tu cama, tu chʼaʼaj u tsʼook u yiikʼeʼ ka kíimi.+
Notas
^ U kʼáat u yaʼal «U tiaʼal Letiʼ; Tiʼ Letiʼ ku Pertenecer».
^ Tuláakʼ tuʼuxeʼ ku yaʼalaʼal «paach».
^ Wa «cerroʼob».
