Josué 2:1-24
2 Josué, u hijo Nuneʼ, tu x-mukul túuxtaj kaʼatúul máakoʼob desde Sitim+ utiaʼal ka xiʼik u chʼúuktoʼob le luʼumoʼ. Letiʼeʼ tu yaʼalajtiʼob: «Xeeneʼex a wileʼex bix le luʼumoʼ, maases u kaajil Jericó». Le máakoʼob túunoʼ binoʼobeʼ ka kʼuchoʼob tu yotoch juntúul x-prostituta ku kʼaabaʼtik Rahab,+ teʼeloʼ tiʼ pʼáatoʼobiʼ.
2 Chéen baʼaleʼ aʼalaʼab tiʼ u reyil Jericó: «¡Ilawile! Teʼ áakʼabaʼ yaan israelitaʼob tsʼoʼok u taaloʼob u chʼúuktoʼob le luʼumaʼ».
3 U reyil Jericó túuneʼ tu túuxtaj aʼalbil tiʼ Rahab: «Jóoʼs le máakoʼob taaloʼob way kaaj yéetel táan u pʼáatloʼob ta wotochoʼ, tumen letiʼobeʼ taal u chʼúuktoʼob tuláakal le luʼumaʼ».
4 Pero le koʼoleloʼ tu taʼakaj le kaʼatúul israelitaʼoboʼ. Letiʼ túuneʼ tu yaʼalaj: «U jaajileʼ le máakoʼoboʼ taaloʼob tin wiknal pero maʼ in wojel tuʼux u taaloʼobiʼ.
5 Le táan u yéeʼsameʼental yéetel le jach taʼaytak u kʼaʼalal u joonajil le kaajoʼ le máakoʼoboʼ jóokʼoʼobeʼ ka binoʼob. Chéen baʼaleʼ maʼ in wojel tuʼux binoʼobiʼ, pero wa ka bineʼex tu séebaʼanil tu paachoʼobeʼ jeʼel a chukpachtikeʼexoʼobeʼ».
6 (Chéen baʼaleʼ letiʼeʼ tsʼokaʼaniliʼ kaʼach u biskoʼob tu techoil u yotocheʼ, yéetel tsʼokaʼaniliʼ u taʼakikoʼob ichil le lino* tsolkíintaʼan teʼ techooʼ).
7 Le máakoʼob túunoʼ jóokʼ u yáalkaboʼob tu paachoʼob tu tojil le Jordánoʼ, teʼ tuʼux maʼ taam u jaʼiloʼ,+ le ka tsʼoʼok u jóokʼloʼobeʼ kʼaʼal u joonajil le kaajoʼ.
8 Antes u chital wenel le kaʼatúul israelitaʼoboʼ naʼak Rahab teʼ techooʼ,
9 ka tu yaʼalajtiʼob: «Teneʼ jach in wojel yaan u tsʼáaikteʼex Jéeoba le luʼumaʼ,+ yéetel ta woʼolaleʼexeʼ tsʼoʼok u taal t-óokʼol junpʼéel nojoch saajkilil.+ Ta woʼolaleʼexeʼ tuláakal u kajnáaliloʼob le luʼumaʼ tsʼoʼok u lúubul u yóoloʼob,+
10 tumen tsʼoʼok k-uʼuyikeʼ le ka lukʼeʼex Egiptoeʼ+ tikinkúuntaʼab ta táaneʼex u jaʼil le Mar Rojo tumen Jéeobaoʼ. Tsʼoʼok k-uʼuyik xan bix úuchik a xuʼulskeʼex tiʼ Seón+ yéetel tiʼ Og,+ le kaʼatúul rey amorreoʼob yanoʼob tuláakʼ u tséel* le Jordánoʼ.
11 Jach lúub k-óol* ka t-uʼuyaj lelaʼ, yéetel tuláakal máak sen sajak ta woʼolaleʼex tumen Jéeoba a Dioseʼexeʼ, Dios teʼ kaʼanoʼ yéetel Dios way luʼumeʼ.+
12 Beoraaʼ beet uts a jurarkeʼex tu yoʼolal Jéeobaeʼ, tumen tin weʼesajteʼex nojoch yaabilajeʼ teʼex xaneʼ yaan a weʼeskeʼex nojoch yaabilaj tiʼ tuláakal le máaxoʼob yanoʼob tu yotoch in papáoʼ, yéetel unaj a tsʼáaikeʼexten junpʼéel señal ku yeʼesik jeʼel u páajtal in confiar tiʼ teʼexeʼ.
13 Maʼ unaj a kíimskeʼex in papá, in maama, in sukuʼunoʼob, in kiikoʼob mix tuláakal le máaxoʼob kajaʼanoʼob tu yotochoʼoboʼ, unaj a salvarkoʼoneʼex tiʼ le kíimiloʼ».+
14 Le máakoʼob túunoʼ tu yaʼaloʼobtiʼ: «¡Yaan k-tsʼáaik k-kuxtal ta woʼolaleʼex!, chéen baʼaleʼ maʼ a tsikbaltikeʼex tiʼ mix máak baʼax taaloʼon k-beete, beyoʼ yaan k-eʼesikteʼex nojoch yaabilaj le kéen u tsʼáatoʼon Jéeoba le luʼumaʼ».
15 Ka tsʼoʼokeʼ le koʼoleloʼ tu tsʼáaj junpʼéel suum teʼ ventana utiaʼal u yéemloʼoboʼ, tumen u yotocheʼ taakʼal yanil tiʼ le pakʼ baʼpachtmil le kaajoʼ, maas u jaajileʼ tiaʼan tu yóokʼol le pakʼoʼ.+
16 Le koʼolel túunoʼ tu yaʼalajtiʼob: «Xeeneʼex teʼ tuʼux yaan le montañaʼoboʼ, tiʼ ka a taʼakabaʼex ichil óoxpʼéel kʼiiniʼ, beyoʼ le máaxoʼob ku máan u kaxteʼexoʼoboʼ maʼ ken u kaxteʼexoʼob. Le kéen suunak túun le máakoʼoboʼ jeʼel u páajtal a seguertik a beeleʼexeʼ».
17 Le máakoʼob túunoʼ tu yaʼaloʼob: «Toʼoneʼ yaan k-pʼáatal libreil tiʼ le baʼax ta beetaj k-jurartiktech+
18 wa le kéen ookkoʼon teʼ luʼumaʼ techeʼ maʼ ta kʼaxik le chak suum teʼ ventana tuʼux táan k-éemlaʼ. Way ta wotocheʼ unaj a taasik a papá, a maama, a sukuʼunoʼob, a kiikoʼob yéetel tuláakal le máaxoʼob yanoʼob tu yotoch a papáoʼ.+
19 Bey túunoʼ wa yaan máax ku jóokʼol ta wotoch yéetel ku kíimsaʼaleʼ, tiʼ letiʼ yaan u culpail,* maʼ tiʼ toʼoniʼ. Pero wa ku kíimsaʼal juntúul máax yaan ichil a wotocheʼ tiʼ toʼon yaan u culpail úuchik u kíimil.
20 Chéen baʼaleʼ wa ka tsikbaltik baʼax taaloʼon k-beeteʼ,+ toʼoneʼ yaan k-pʼáatal libreil tiʼ le baʼax ta beetaj k-jurartiktechoʼ».
21 Le koʼoleloʼ tu yaʼalaj: «Úuchuk le baʼax tsʼoʼok a waʼalikeʼexoʼ».
Ka tsʼoʼok u yaʼalik lelaʼ, letiʼobeʼ tu chʼaʼaj u beeloʼobeʼ ka binoʼob. Le koʼoleloʼ tu kʼaxaj le chak suum teʼ ventana jeʼex aʼalaʼabiktiʼoʼ.
22 Le kaʼatúul israelitaʼoboʼ binoʼob teʼ tuʼux yaan le montañaʼoboʼ, tiʼ pʼáatoʼob óoxpʼéel kʼiiniʼ, tu páaʼtoʼob u suut le máaxoʼob bin kaxtikoʼoboʼ. Le máakoʼoboʼ binoʼob tiʼ tuláakal le bejoʼob utiaʼal u kaxtikoʼob le kaʼatúul israelitaʼoboʼ pero maʼ tu kaxtoʼobiʼ.
23 Le kaʼatúul máakoʼob túunoʼ éemoʼob tiʼ le montañaʼoboʼ ka tu kʼáatmáansoʼob le Jordánoʼ ka kʼuchoʼob yiknal Josué, u hijo Nun. Letiʼob túuneʼ tu tsikbaltoʼob tiʼ Josué tuláakal le baʼax úuchtiʼoboʼ.
24 Letiʼobeʼ tu yaʼaloʼob tiʼ Josué: «Jéeobaeʼ tsʼoʼok u tsʼáaiktoʼon tuláakal le luʼumaʼ.+ U jaajileʼ tuláakal u kajnáaliloʼob le luʼumaʼ tsʼoʼok k-beetik u jach lúubul u yóoloʼob».+
Notas
^ Lelaʼ junkúul xíiw suuk u paʼakʼal tu luʼumil Egipto utiaʼal u beetaʼal nookʼ.
^ Le u tséel ku yaʼalikoʼ tiaʼan lakʼineʼ.
^ Ich hebreoeʼ ku yaʼalaʼal kaʼach «yíib k-puksiʼikʼal».
^ Ich hebreoeʼ ku yaʼalaʼal kaʼach «u kʼiʼikʼeleʼ yaan u yantal yóokʼol u pool».
