Levítico 22:1-33
22 Jéeobaeʼ tʼaanaj tu kaʼatéen yéetel Moiséseʼ ka tu yaʼalajtiʼ:
2 «Aʼal tiʼ Aarón yéetel tiʼ u hijoʼobeʼ wa maʼ limpio yaniloʼobeʼ maʼ unaj u machkoʼob le baʼaloʼob santoʼob ku kʼuʼubul tumen le israelitaʼoboʼ,+ beyoʼ letiʼobeʼ maʼ ken u taasoʼob suʼtsilil tiʼ in kʼaabaʼ.+ Teneʼ Jéeobaen, teen a Dioseʼex.
3 Aʼal xan tiʼob lelaʼ: ‹Jeʼel máaxak tiʼ a paalaleʼex maʼ limpio yanil tu táan Dioseʼ, maʼ unaj u machik le baʼaloʼob santoʼob ku taasik u kʼub le israelitaʼob tiʼ Jéeobaoʼ. Le máax kun beetkeʼ yaan u kíimsaʼal.+ Le baʼax tsʼoʼok in waʼalikaʼ utiaʼal tuláakal a generacióneʼex. Teneʼ Jéeobaen, teen a Dioseʼex.
4 Mix juntúul xiib tiʼ u paalal Aarón kun páajtal u jaantik le baʼaloʼob santoʼob wa yaan lepra*+ tiʼ bey xan wa ku chʼaaj wa baʼax tu xiibil.+ Chéen yaan u páajtal u jaantik le kéen pʼáatak limpioiloʼ.+ Le baʼaloʼob santoʼoboʼ maʼ unaj xan u jaantaʼal tumen juntúul xiib tsʼoʼok u machik juntúul máak sucio yanil úuchik u machik juntúul kimeniʼ,+ juntúul máak tsʼoʼok u jóokʼol u semen,+
5 juntúul máak tsʼoʼok u machik jeʼel baʼalak mejen baʼalcheʼil maʼ limpio yanil tu táan Dioseʼ,+ bey xan le máax tsʼoʼok u machik juntúul máak maʼ limpio yanil tu táan Dios yoʼolal wa baʼaxoʼ.+
6 Jeʼel máaxak ka u mach le máaxoʼob tsʼoʼok in waʼalikaʼ maʼ kun páajtal u jaantik le baʼaloʼob santoʼoboʼ, yaan u pʼáatal maʼ limpio yanil tak ken tʼúubuk le kʼiinoʼ yéetel unaj u yichkíil.+
7 Yaan u pʼáatal limpioil le kéen tʼúubuk le kʼiinoʼ yéetel yaan u páajtal u jaantik le baʼaloʼob santoʼoboʼ tumen leloʼ u yoʼoch.+
8 Letiʼeʼ maʼ kun páajtal u jaantik juntúul baʼalcheʼ kimeniliʼ ka kaxtaʼabeʼ, maʼ kun páajtal xan u jaantik juntúul baʼalcheʼ kíimsaʼab tumen uláakʼ baʼalcheʼ. Tumen wa maʼeʼ yaan u pʼáatal maʼ limpio yanil tin táaniʼ.+ Teneʼ Jéeobaen, teen a Dioseʼex.
9 Letiʼobeʼ unaj u beetkoʼob le baʼax kin waʼalikaʼ. Tumen wa maʼ tu beetkoʼobeʼ yaan u kʼebantaloʼob, yéetel wa ku kʼebantaloʼob tu contra le baʼaloʼob santoʼoboʼ yaan u kíimloʼob. Teneʼ Jéeobaen, le máax táan u santificarkoʼoboʼ.
10 Wa juntúul máak maʼ tsʼaʼan permiso tiʼeʼ* maʼ kun páajtal u jaantik le baʼaloʼob santoʼoboʼ.+ Maʼ kun páajtal xan u jaantaʼal tumen mix juntúul j-táanxel luʼumil kajaʼan tu yotoch le sacerdoteoʼ mix tumen le máax ku meyaj tu yotochoʼ.
11 Chéen baʼaleʼ wa le sacerdote manbil úuchik u beetik wa máaxoʼ, le máak maʼanoʼ jeʼel u páajtal u jaantik le baʼaloʼob santoʼoboʼ. Jeʼel u páajtal xan u jaantaʼal tumen u esclavoʼob le sacerdote síijoʼob tu yotochoʼ.+
12 Wa u hija le sacerdote ku tsʼoʼokol u beel yéetel juntúul máax maʼ sacerdoteeʼ, le x-chʼúupaloʼ maʼ kun páajtal u jaantik le baʼaloʼob santoʼoboʼ.
13 Chéen baʼaleʼ wa u hija le sacerdote ku kaʼa suut tu yotoch u papá, tumen pʼáat viudail wa tumen tu divorciartuba yéetel maʼ yanchaj u paalaleʼ, letiʼeʼ jeʼel u páajtal u jaantik le baʼaloʼob santoʼob ku jaantik u papáoʼ.+ Jeʼel u páajtal u jaantik jeʼex u beetik kaʼach tu x-lóoʼbayanileʼ. Pero le máax maʼ tsʼaʼan permiso tiʼoʼ maʼ kun páajtal u jaantik le baʼaloʼob santoʼoboʼ.
14 Wa juntúul máak ku jaantik le baʼaloʼob santoʼob, pero maʼ u yóoliliʼ kaʼacheʼ, le máakoʼ kʼaʼabéet u sutik uláakʼ ofrenda tiʼ le sacerdoteoʼ yéetel unaj u tsʼáaik 20 por ciento maas.+
15 Le oʼolal le sacerdoteʼoboʼ maʼ unaj u chaʼikoʼob tiʼ le israelitaʼob u mixbaʼalkúuntikoʼob le baʼaloʼob ku kʼubkoʼob tiʼ Jéeobaoʼ+ tumen santoʼob.
16 Wa ku chaʼikoʼob u jaantaʼal tumen jeʼel máaxakeʼ, le israelitaʼoboʼ yaan u kʼebantaloʼob tu contra Dios yéetel yaan u castigartaʼaloʼob ikil u jaantikoʼob junpʼéel baʼal santo. Teneʼ Jéeobaen, le máax táan u santificarkeʼexoʼ›».
17 Jéeoba túuneʼ seguernaj u yaʼalik tiʼ Moisés:
18 «Aʼal tiʼ Aarón, tiʼ u hijoʼob yéetel tiʼ tuláakal le israelitaʼoboʼ: ‹Wa juntúul israelita bey xan wa juntúul j-táanxel luʼumil ku kʼubik junpʼéel tóokbil ofrenda+ tiʼ Jéeoba yoʼolal junpʼéel baʼax u prometermaj wa tumen ku síijil tu puksiʼikʼal u tsʼáaikeʼ,+
19 letiʼeʼ unaj u kʼubik juntúul toro wa juntúul táankelem taman wa juntúul chivo, chéen baʼaleʼ le baʼalcheʼ ken u kʼuboʼ unaj tʼaʼaj.+ Wa ku beetik beyoʼ yaan u kʼaʼamal u ofrenda tumen Dios.
20 Maʼ unaj u taasik u kʼub juntúul baʼalcheʼ yaan baʼax uchaʼan tu wíinkliliʼ,+ tumen maʼ kun kʼambil tumen Dios.
21 Wa yaan máax ku kʼubik tiʼ Jéeoba junpʼéel ofrenda utiaʼal múul janal+ yoʼolal junpʼéel baʼax u prometermaj wa tumen ku síijil tu puksiʼikʼal u tsʼáaikeʼ, le wakax wa le taman ken u kʼuboʼ unaj tʼaʼaj. Wa ku beetik beyoʼ yaan u kʼaʼamal u ofrenda tumen Dios. Le baʼalcheʼ ken u kʼuboʼ kʼaʼabéet láaj maʼalob u wíinklil.
22 Le baʼalcheʼ kun kʼubbiloʼ kʼaʼabéet maʼ chʼóopiʼ, kaachal u yook wa u kʼab, xootol u wíinklil, yaan u aaxil, yaan weʼech tu wíinklil wa jokʼaʼan granos tu wíinklil. Maʼ unaj u taasaʼal tiʼ Jéeoba baʼalcheʼob beyaʼ mix u kʼuʼubul tiʼ Jéeoba teʼ altaroʼ.
23 Wa yaan máax u kʼáat u tsʼáa junpʼéel ofrenda tumen ku síijil tu puksiʼikʼal u tsʼáaikeʼ jeʼel u páajtal u kʼubik juntúul toro wa juntúul taman kex maas chowak wa maas kóom junpʼéel u yookeʼ. Chéen baʼaleʼ juntúul baʼalcheʼ beyaʼ maʼ kun kʼambil tiʼ le máak wa táan u kʼubik yoʼolal junpʼéel baʼax u prometermoʼ.
24 Maʼ unaj u taasaʼal tu táan Jéeoba juntúul baʼalcheʼ capartaʼan, puchʼaʼan wa uchaʼan loob tu xiibiliʼ, le baʼalcheʼob beyaʼ maʼ unaj a kʼubkeʼex teʼ luʼum tuʼux kan kajtaleʼexoʼ.
25 Le baʼalcheʼob beyaʼ maʼ unaj u kʼaʼamal tiʼ juntúul j-táanxel luʼumil utiaʼal u kʼuʼubul bey ofrenda tiʼ Dioseʼ, tumen yaan wa baʼax uchaʼan tu wíinkliloʼob. Maʼ kun kʼambiloʼob›».
26 Jéeobaeʼ tu yaʼalaj xan tiʼ Moisés:
27 «Le kéen síijik juntúul chan wakax, juntúul chan taman wa juntúul chan chivoeʼ unaj u pʼáatal siete días yéetel u maama,+ chéen baʼaleʼ le kéen u tsʼáa ocho días tiʼeʼ jeʼel u páajtal u kʼuʼubul bey junpʼéel ofrenda ku tóokaʼal utiaʼal Jéeobaeʼ.
28 Maʼ unaj u kíimsaʼal juntúul toro wa juntúul taman paʼteʼ yéetel u mejnil teʼ mismo díaoʼ.+
29 Wa ka kʼubkeʼex junpʼéel ofrenda tiʼ Jéeoba utiaʼal a tsʼáaikeʼex gracias tiʼeʼ+ unaj a kʼubkeʼex utiaʼal ka lúubkeʼex utsil tu táan.
30 Teʼ mismo día unaj a jaantikeʼexoʼ. Maʼ unaj a pʼatkeʼex mix baʼal tiʼ le ofrenda antes u sáastal tuláakʼ kʼiinoʼ.+ Teneʼ Jéeobaen, teen a Dioseʼex.
31 Unaj a beetkeʼex le baʼax kin waʼalikteʼexoʼ.+ Teneʼ Jéeobaen, teen a Dioseʼex.
32 Maʼ unaj a taaskeʼex suʼtsilil tiʼ in santo kʼaabaʼiʼ,+ baʼaxeʼ unaj a santificarkeneʼex ichil le israelitaʼoboʼ.+ Teneʼ Jéeobaen, le máax táan u santificarkeʼexoʼ,+
33 le máax jóoʼseʼex tiʼ u luʼumil Egipto utiaʼal in weʼesik teen a Dioseʼexoʼ,+ teneʼ Jéeobaen».
