Nehemías 2:1-20
2 Tu mesil Nisán,* teʼ año 20+ táan u gobernar Artajerjesoʼ+ tsʼaʼab vino tu táan, teen túuneʼ jeʼex suukileʼ tin chʼaʼaj le vinooʼ ka tin tsʼáaj tiʼ le reyoʼ.+ Teʼ kʼiin jeʼeloʼ teneʼ jach lubaʼan in wóol, tsʼoʼoleʼ teneʼ mantatsʼ kiʼimak in wóol kaʼachi.
2 Le rey túunoʼ tu yaʼalajten: «¿Baʼaxten lubaʼan a wóol? Si techeʼ maʼ kʼojaʼanechiʼ, in waʼalikeʼ yaan baʼax ku kuup ta puksiʼikʼal». Teʼ súutukoʼ sen sajakchajen.
3 Ka túun tin waʼalaj tiʼ le reyoʼ: «¡Yuum rey, kuxlakech utiaʼal mantatsʼ! Bix maʼ u lúubul in wóol, si le kaaj tuʼux mukaʼan in úuchben láakʼtsiloʼoboʼ juʼujutaʼan yéetel láaj tóokaʼan u joonajiloʼob».+
4 Le rey túunoʼ tu yaʼalajten: «¿Baʼax túun a kʼáat a beete?». Teʼ súutukoʼ orarnajen tiʼ le Dios yaan teʼ kaʼanoʼ.+
5 Ka tsʼoʼokeʼ tin waʼalaj tiʼ le reyoʼ: «In rey, wa maʼalob a wilik yéetel wa ku lúubul utsil ta táan le máax meyajtikechaʼ túuxten tu luʼumil Judá, teʼ kaaj tuʼux mukaʼan in úuchben láakʼtsiloʼoboʼ utiaʼal ka in jel líiʼse».+
6 Le rey túunoʼ tu yaʼalajten mientras kulukbal le reina tu tséeloʼ: «¿Bukaʼaj tiempo kan bin? ¿Baʼax kʼiin a suut?». Le rey túunoʼ tu yilaj maʼalob ka xiʼiken.+ Teen xaneʼ tin waʼalajtiʼ bukaʼaj tiempo kin bin.+
7 Ka tsʼoʼokeʼ tin waʼalaj tiʼ le reyoʼ: «In rey, wa maʼalob a wilkeʼ, tsʼaʼabakten cartaʼob utiaʼal in tsʼáa tiʼ le gobernadoroʼob yanoʼob maas paachil tiʼ le Ríooʼ*+ utiaʼal ka u chaʼob in máan tak ken kʼuchken tu luʼumil Judá,
8 bey xan junpʼéel carta utiaʼal Asaf, le máax kanáantik u kʼaax le reyoʼ, utiaʼal u tsʼáaikten cheʼob utiaʼal u beetaʼal u joonajiloʼob le nuxiʼ naj kaʼanal u pakʼiloʼob+ yaan naatsʼ tiʼ le Templooʼ, bey xan utiaʼal u beetaʼal u baʼpakʼiloʼob le kaajoʼ+ yéetel utiaʼal u beetaʼal le naj tuʼux kin kajtaloʼ». Le rey túunoʼ tu tsʼáajten,+ tumen táan kaʼach u yáantken in Dios.+
9 Ka máan kʼiineʼ kʼuchen yiknal le gobernadoroʼob yanoʼob maas paachil tiʼ le Ríooʼ ka tin kʼubajtiʼob le cartaʼob tu túuxtaj le reyoʼ. Le reyoʼ tu túuxtaj xan tin wéetel u nuuktakil u ejército bey xan soldadoʼob ku binoʼob yóoʼ tsíimin.
10 Lelaʼ kʼuch ojéeltbil tumen Sanbalat+ le oronita yéetel Tobías+ le ammonita+ tsʼaʼan autoridad tiʼoʼ, letiʼobeʼ jach maʼ maʼalob tu yuʼubiloʼob úuchik u taal juntúul máak utiaʼal u beet uts tiʼ u kaajil Israeliʼ.
11 Teneʼ kʼuchen Jerusalén. Ka máan óoxpʼéel kʼiineʼ
12 líikʼen de áakʼab, teen yéetel jujuntúul máakoʼob, chéen baʼaleʼ maʼ tin waʼalaj tiʼ mix máak le baʼax tu tsʼáaj in Dios tin puksiʼikʼal utiaʼal ka in beet tu yoʼolal Jerusalénoʼ, tsʼoʼoleʼ minaʼan kaʼach uláakʼ juntúul baʼalcheʼ tin wiknal chéen le in natʼmoʼ.
13 De áakʼabeʼ jóokʼen teʼ joonaj ku kʼaabaʼtik u Joonajil táax luʼumoʼ+ ka máanen aktáan tiʼ le lugar ku kʼaabaʼtik u Sayabil le nojoch kaanoʼ ka binen tu tojil le jool ku kʼaabaʼtik u Joonajil le Taʼanoʼ+ ka joʼopʼ in wilik jach bix juʼujutil le pakʼoʼob yaan tu baʼpach Jerusalénoʼ bey xan bix yanil le joonajoʼob tóokaʼanoʼoboʼ.+
14 Tsʼoʼoleʼ máanen naatsʼ tiʼ le Joonaj tuʼux ku síijil jaʼoʼ+ bey xan tiʼ u Tanque le Reyoʼ, chéen baʼaleʼ pʼáat minaʼan tuʼux u máan le baʼalcheʼ in natʼmoʼ.
15 Kex beyoʼ teʼ áakʼaboʼ seguernaj in bin teʼ táax luʼum+ utiaʼal in wilik bix yanil le pakʼoʼoboʼ. Ka tsʼoʼokeʼ suunajeneʼ ka ooken teʼ jool ku kʼaabaʼtik u Joonajil táax luʼumoʼ, bey túun úuchik in suutoʼ.
16 Le máaxoʼob ku nuʼuktajoʼoboʼ+ maʼ tu yojéeltoʼob tuʼux bineniʼ mix le baʼax táan kaʼach in beetkoʼ tumen teneʼ todavía mix baʼal kaʼach in waʼal tiʼ le judíoʼoboʼ, tiʼ le sacerdoteʼoboʼ, tiʼ le tsʼuuloʼoboʼ, tiʼ le máaxoʼob ku nuʼuktajoʼoboʼ mix tiʼ le u maasil máakoʼob táakaʼanoʼob tiʼ le meyajoʼ.
17 Chéen baʼaleʼ ka tsʼoʼokeʼ tin waʼalajtiʼob lelaʼ: «Tak teʼex táan a wilkeʼex bix yaniloʼon, Jerusaléneʼ juʼujutaʼan u pakʼiloʼob yéetel tóokaʼan u joonajiloʼob. Koʼoneʼex jel líiʼsik le pakʼoʼob yaan tu baʼpach Jerusalénoʼ tumen jach suʼtsil bix yaniloʼon».
18 Ka tsʼoʼokeʼ tin waʼalajtiʼob bix úuchik in wáantaʼal tumen in Dios,+ yéetel tin waʼalaj xan tiʼob le baʼax tu yaʼalajten le reyoʼ.+ Letiʼob túuneʼ tu yaʼaloʼob: «Koʼoneʼex káajsik le meyajoʼ». Letiʼobeʼ líikʼ u yóoloʼob* utiaʼal u beetkoʼob le meyajoʼ.+
19 Le ka ojéeltaʼab tumen Sanbalat le oronita, tumen Tobías+ le ammonita+ tsʼaʼan autoridad tiʼoʼ bey xan tumen Guésem le árabeoʼ+ joʼopʼ u burlarkubaʼob tiʼ toʼon+ yéetel u taaskoʼonoʼob mix baʼalil, táan kaʼach u yaʼalikoʼob: «¿Baʼax táan a beetkeʼex beyaʼ? ¿Táan a tsʼáaikabaʼex tu contra le reyoʼ?».+
20 Chéen baʼaleʼ teneʼ tin núukajtiʼob: «Le Dios yaan teʼ kaʼanoʼ letiʼe Máax kun beetik u bintoʼon utsiloʼ.+ Toʼon, le máaxoʼob meyajtikoʼ, yaan k-líikʼil beet le meyajoʼ, pero teʼexeʼ mix baʼal yaan a wileʼex way Jerusaléneʼ, minaʼanteʼex mix junpʼéel derecho way kaajeʼ yéetel mix baʼal yaan a reclamarteʼex».+
Notas
^ Ilawil página 2573.
^ Wa «tuláakʼ u tséel le Éufratesoʼ».
^ Ich hebreoeʼ ku yaʼalaʼal kaʼach «tu muʼukʼaʼankúuntaj u kʼaboʼob».
