Zacarías 4:1-14
4 Le ángel túun tʼaanaj tin wéeteloʼ suunajeʼ ka tu yajsen, tu yajsen jeʼex u beetaʼal tiʼ juntúul máak táan u weenleʼ.
2 Letiʼ túuneʼ tu yaʼalajten: «¿Baʼax ka wilik?».
Teen túuneʼ tin núukaj: «Táan in wilik junpʼéel candelabro de oro,+ yéetel tu yóokʼoleʼ yaan junpʼéel nuxiʼ tazaiʼ. Teʼ candelabrooʼ yaan siete u pʼéelal lámparaʼobiʼ,+ siete u pʼéelal. Tiʼ cada junpʼéel tiʼ le lámparaʼob yanoʼob teʼ candelabrooʼ yaan junpʼéel tuboiʼ.
3 Tu tséel le candelabrooʼ yaan kaʼakúul olivoiʼ,+ junpʼéeleʼ tiaʼan tu x-noʼoj le nuxiʼ tazaoʼ, yéetel le uláakʼoʼ tiaʼan tu x-tsʼíikeʼ».
4 Teen túuneʼ tin kʼáataj tiʼ le ángel táan kaʼach u tʼaan tin wéeteloʼ: «In yuum, ¿baʼax u kʼáat u yaʼal le baʼaloʼobaʼ?».
5 Le ángeloʼ tu núukajten: «¿Maʼ wa a wojel baʼax u kʼáat u yaʼaloʼobiʼ?».
Teneʼ tin núukajtiʼ: «In yuum, maʼ in wojliʼ».
6 Letiʼ túuneʼ tu yaʼalajten: «Lelaʼ letiʼe baʼax ku yaʼalik Jéeoba tiʼ Zorobabelaʼ: ‹«Le baʼaloʼobaʼ yaan u béeytaloʼob chéen yéetel in poder,+ maʼ yéetel u yáantaj junpʼéel ejércitoiʼ mix yéetel u poder wíinikiʼ»,+ lelaʼ bey u yaʼalik Jéeoba, le máax gobernartik le ángeloʼoboʼ.
7 Kex ka u kʼatuba tu beel Zorobabel+ junpʼéel baʼal jeʼex u nojchil junpʼéel montañaeʼ, yaan u suut bey junpʼéel táax luʼumeʼ.+ Letiʼeʼ yaan u tsʼáaik le tuunich ku bin tu maas kaʼanlil le templooʼ, le táan u beetkoʼ yaan u yawtaʼal: «¡Jach táaj kiʼichkelem! ¡Jach táaj kiʼichkelem!»›».
8 Jéeobaeʼ tu kaʼa tʼaneneʼ ka tu yaʼalaj:
9 «Zorobabel tsʼáa u chuunpakʼiloʼob le najaʼ+ yéetel letiʼ xan ken u tsʼoʼokse.+ Yaan túun a kʼuchul a wojéelteʼ, Jéeoba, le máax gobernartik le ángeloʼoboʼ, letiʼ túuxten ta wiknaleʼex.
10 ¿Yaan wa máax mixbaʼalkúuntik le kʼiin ka káaj le meyajoʼ?+ Wa beyoʼ unaj u kʼexik u tuukul. Le kaaj túunoʼ yaan u kiʼimaktal u yóol, yéetel yaan u yilik junpʼéel plomo tu kʼab Zorobabel, yaan xan u yilaʼal tumen le siete ichoʼoboʼ. Le siete ichoʼobaʼ u yichoʼob Jéeoba, yéetel ku máan u paakatoʼob yóokʼol tuláakal le luʼumoʼ».+
11 Teen túuneʼ tin kʼáatajtiʼ: «¿Baʼax u kʼáat u yaʼal le kaʼakúul olivo yaan tu x-noʼoj yéetel tu x-tsʼíik le candelabrooʼ?».+
12 Teneʼ tin waʼalajtiʼ tu kaʼatéen: «Teneʼ tin wilaj kaʼacháach olivo* ku tsʼáaikoʼob aceite jeʼex u color le orooʼ, yéetel le aceiteaʼ ku yáalkab tiʼ kaʼapʼéel tubo de oro. ¿Baʼax u kʼáat u yaʼal le kaʼacháach olivoaʼ?».
13 Letiʼ túuneʼ tu kʼáatajten: «¿Maʼ wa a wojel baʼax u kʼáat u yaʼaloʼobiʼ?».
Teneʼ tin núukajtiʼ: «In yuum, maʼ in wojliʼ».
14 Le ángeloʼ tu yaʼalajten: «Le baʼaloʼobaʼ letiʼe kaʼatúul máaxoʼob yéeyaʼanoʼob tumen u Yuumil tuláakal le luʼumoʼ, yéetel tiʼ waʼalakbaloʼob tu tséeleʼ».+
Notas
^ Le u mejen kʼab le olivoaʼ chuup yéetel u yichoʼob.
