Apocalipsis 18:1-24
18 Le ka tsʼoʼokeʼ tin wilaj uláakʼ juntúul ángel táan u yéemel kaʼan yéetel nojoch páajtalil. Le luʼum túunoʼ sáasilchaj tu yoʼolal u kiʼichkelem sáasilil le ángeloʼ.
2 Le ángelaʼ yéetel tuláakal u muukʼ tu kʼaʼam aʼalaj: «¡Tsʼoʼok u lúubul! ¡Tsʼoʼok u lúubul le Nojoch Babiloniaoʼ!+ Tsʼoʼok u suut junpʼéel lugar tuʼux ku kajtal demonioʼob, junpʼéel lugar tuʼux ku taʼakikuba kʼasaʼan ángeloʼob* bey xan tuláakal le kʼaakʼas chʼíichʼoʼob pʼektaʼanoʼoboʼ.+
3 Tumen tuláakal le kaajoʼoboʼ káalchajoʼob yéetel u vinoil u tsʼíibolalil u núupkʼebantal.*+ U reyiloʼob yóokʼol kaabeʼ núupkʼebanchajoʼob tu yéetel.+ U comercianteiloʼob yóokʼol kaabeʼ tsʼoʼok u ayikʼaltaloʼob tu yoʼolal le koʼokoj baʼaloʼob ku manik le koʼolel minaʼan u suʼtal utiaʼal u pulik u taakʼinoʼ».
4 Ka tin wuʼuyaj uláakʼ tʼaan teʼ kaʼan táan u yaʼalik: «In kaajal, jóokʼeneʼex+ tiʼ le kaajaʼ utiaʼal maʼ a táakpajleʼex tiʼ u kʼebanoʼob yéetel utiaʼal maʼ a muʼyajtikeʼex le baʼaloʼob kun taal tu yóokʼoloʼ.+
5 Tumen u kʼebanoʼobeʼ tsʼoʼok u niktal yéetel tsʼoʼok u kʼuchul tak teʼ kaʼanoʼ;+ Dios túuneʼ tsʼoʼok u kʼaʼajsik le baʼaloʼob kʼaastak u beetmoʼ.+
6 Suteʼex u jeel tiʼ le baʼax u beetmaj tiʼ uláakʼ máakoʼoboʼ,+ kaʼatéen ka a suteʼex u jeel tiʼ le baʼax u beetmoʼ.+ Teʼ copa+ tuʼux tu preparartaj vinooʼ kaʼatéen ka a prepararteʼex vino utiaʼal a tsʼáaikeʼextiʼ.+
7 Úuchik u jach nojbaʼalkúuntkuba yéetel úuchik u bisik junpʼéel koʼokoj kuxtal ichil x-maʼ suʼtalileʼ, letiʼeʼ jach unaj u muʼyaj yéetel u yokʼol. Letiʼeʼ maʼ tu xuʼulul u yaʼalik ichil u puksiʼikʼal: ‹Kulukbalen bey juntúul reinaeʼ, maʼ kimen in wíichamiʼ yéetel mix bikʼin bíin okʼolnaken›.+
8 Le oʼolaleʼ chéen ichil junpʼéel kʼiin ken taalak tuláakal le baʼax ken u muʼyajtoʼ —kíimil, okʼol yéetel wiʼijil—, le kéen tsʼoʼokkeʼ yaan u tóokaʼal,+ tumen jach nojoch u páajtalil Jéeoba le máax juzgartoʼ.+
9 Le u reyiloʼob yóokʼol kaab núupkʼebanchajoʼob tu yéeteloʼ yaan u yilkoʼob u buutsʼil u tóokaʼal. Le reyoʼobaʼ letiʼe múul kajlajoʼob tu yéetel utiaʼal u biskoʼob junpʼéel koʼokoj kuxtal ichil x-maʼ suʼtaliloʼ. Le kéen u yiloʼob baʼax ku yúuchultiʼeʼ yaan u yokʼoloʼob yéetel yaan u loʼoloxik u tseemoʼob tumen yaachajaʼan u yóoloʼob.
10 Yaan u waʼataloʼob náach tiʼ letiʼ tu yoʼolal u saajkiloʼob tiʼ le baʼax úuchtiʼoʼ, yéetel yaan u yaʼalikoʼob: ‹¡Óotsilech nojoch kaaj!+ ¡Óotsilech Babilonia, le kaaj jach yaan u páajtaliloʼ! ¡Tumen chéen ichil junsúutuk ka juzgartaʼabech tumen Dios!›.
11 U comercianteiloʼob yóokʼol kaabeʼ yaan u yokʼoloʼob yéetel yaan u yaatal u yóoloʼob tumen bejlaʼeʼ mix máak kun manik le jejeláas baʼaloʼob ku konkoʼoboʼ:
12 u jejeláasil baʼaloʼob jeʼex oro, plata, jatsʼuts tuunichoʼob, perlaʼob, maʼalob lino, nookʼ morado,* seda yéetel chak nookʼ. Bey xan tuláakal baʼal beetaʼan yéetel kiʼibok cheʼ, tuláakal baʼax beetaʼan yéetel marfil, kiʼichkelem cheʼob, cobre, fierro yéetel mármol.
13 Bey xan canela, u xaʼakʼiloʼob janal, incienso, kiʼibok aceite, olíbano, vino, u aceiteil oliva, harina, trigo, wakaxoʼob, tamanoʼob, tsíiminoʼob, carretaʼob, esclavoʼob yéetel uláakʼ máakoʼob.
14 Jach beyoʼ tuláakal le baʼaloʼob maʼalobtak* ka tsʼíiboltik kaʼachoʼ beoraaʼ minaʼantech, bey xan le kiʼikiʼ janaloʼob yéetel le kiʼichkelem baʼaloʼob yaantech kaʼachoʼ tsʼoʼok u xuʼupul yéetel mix bikʼin kun antaltech tu kaʼatéen.
15 Le máaxoʼob konik kaʼach le baʼaloʼobaʼ, le ayikʼalchajoʼob tu yoʼolal le kaajaʼ, yaan u pʼáatloʼob waʼatal náach tiʼ letiʼ tumen yaan u sajaktaloʼob tiʼ le baʼax úuchtiʼoʼ. Letiʼobeʼ yaan u yokʼoloʼob yéetel tumen yaachajaʼan u yóoloʼobeʼ
16 yaan u yaʼalikoʼob: ‹¡Óotsil, óotsil le nojoch kaaj u búukintmaj kaʼach maʼalob lino, nookʼ morado bey xan chak nookʼoʼ! ¡Óotsil le kaaj u jach jatsʼutskíintmuba kaʼach yéetel adornoʼob de oro, jatsʼuts tuunichoʼob bey xan yéetel perlaʼoboʼ!+
17 ¡Tumen chéen ichil junsúutuk xuʼulsaʼab tiʼ tuláakal le yaʼabkach ayikʼalil yaan kaʼach tiʼoʼ!›.
Tuláakal xan u capitánil barco, tuláakal máax ku viajar tiʼ kʼáaʼnáab, tuláakal le marineroʼob bey xan tuláakal le máaxoʼob ku kaxtik u kuxtaloʼob teʼ kʼáaʼnáaboʼ pʼáatoʼob waʼatal náach tiʼ le kaajoʼ,
18 yéetel kʼaʼam tʼaanajoʼob le ka tu yiloʼob u buutsʼil u tóokaʼaloʼ, ka tu yaʼaloʼob: ‹¿Baʼax kaajil jeʼel u keʼetel yéetel le nojoch kaajaʼ?›.
19 Ka túun tu tosajoʼob luʼum tu pooloʼob. Tumen yaachajaʼan u yóoloʼob yéetel tumen táan u yokʼoloʼobeʼ joʼopʼ u kʼaʼam aʼalikoʼob: ‹¡Óotsil, óotsil le nojoch kaajoʼ, le baʼax oʼolal ayikʼalchaj tuláakal le máaxoʼob yaan u barcoʼob teʼ kʼáaʼnáaboʼ! ¡Tumen chéen ichil junsúutuk ka xuʼulsaʼabi!›.+
20 ¡Kaʼan, kiʼimakchajak a wóol tu yoʼolal le baʼax úuchtiʼoʼ!+ ¡Kiʼimakchajak xan a wóoleʼex, teʼex le máaxoʼob santoʼoboʼ,+ apóstoleʼex yéetel profetaʼex! Tumen Dioseʼ tsʼoʼok u castigartik le kaaj yoʼolal le baʼax tu beetajteʼexoʼ».+
21 Juntúul muʼukʼaʼan ángel túuneʼ tu chʼúuyaj junpʼéel tuunich bey jeʼex u nojoch tuunichil molinoeʼ ka tu píikchʼintaj teʼ kʼáaʼnáab táan u yaʼalik: «Bey xan kun píikchʼintbil Babiloniaoʼ, yaan u píikchʼintaʼal kabal le nojoch kaajoʼ yéetel mix bikʼin kun kaʼa ilbil.+
22 Mix bikʼin kun kaʼa uʼuybil tu kaajil Babilonia u kʼaay le máaxoʼob ku paxkoʼob arpaoʼ, mix le ku paxkoʼob uláakʼ nuʼukuloʼoboʼ, le ku yustikoʼob flautaoʼ mix le ku yustikoʼob trompetaoʼ. Teʼeloʼ maʼ kun kaʼa ilbil juntúul máax ku beetik wa baʼax meyajiliʼ, yéetel mix bikʼin kun kaʼa uʼuybil u juum u tuunichil junpʼéel molino táan u juuchʼiʼ.
23 Mix junpʼéel lámpara kun kaʼa juul u sáasil tu yóokʼol, yéetel ichileʼ mix bikʼin kun kaʼa uʼuybil u tʼaan juntúul noviotsil wa noviatsiliʼ. Tumen u comercianteʼobeʼ letiʼe máaxoʼob maas ayikʼaloʼob way yóokʼol kaabeʼ yéetel tumen tu tusaj tuláakal le kaajoʼob úuchik u beetik u j-meeniloʼ.*+
24 Jach beyoʼ teʼ kaajaʼ tiʼ weʼek u kʼiʼikʼel le profetaʼoboʼ, le máaxoʼob santoʼoboʼ+ bey xan tuláakal le máaxoʼob tsʼoʼok u kíimsaʼaloʼob way luʼumeʼ».+
Notas
^ Uláakʼ bix u traducirtaʼaleʼ «múus iikʼ».
^ Ilawil página 2573.
^ Wa «púrpura».
^ Ich griegoeʼ ku yaʼalaʼal kaʼach «u maʼalob ich le luʼum».
^ Wa «x-espiritistail».
