Job 15:1-35
15 Elifaz+ le temanita túunoʼ tu yaʼalaj:
2 «¿Yaan wa u naʼat juntúul máak ku yaʼalik baʼaloʼob mix baʼal u biilal,yéetel ku chupik u puksiʼikʼal yéetel kʼaakʼas tsʼíibolaloʼob?
3 Chéen kunel u tsolik u nuʼuk tiʼ máak wa mix baʼal u biilal baʼax ku yaʼalik,mix junpʼéel utsil ku taasik u jáajan tʼaan.
4 Techeʼ ka beetik u xuʼulul u respetartaʼal Dios,ka beetik u tuklaʼal maʼ jach kʼaʼabéet u chʼaʼabal en cuentaiʼ.
5 Yoʼolal le baʼax maʼ maʼalob ka beetkoʼ ka tʼaan beyoʼ,chéen ka kaxtik baʼax a waʼale.
6 A chiʼ condenarkech, maʼ teeniʼ.
A chiʼ ku tʼaan ta contra.+
7 ¿Teech wa le yáax máak síijoʼ?
¿Yáax wa teech yanchajech tiʼ le puʼukoʼoboʼ?*
8 ¿Ku páajtal wa a wuʼuyik baʼax ku tsikbaltik Dios yéetel u ángeloʼob?
¿Chéen wa teech yaan a naʼat?
9 ¿Baʼax a wojel teech maʼ k-ojel toʼoniʼ?+
¿Baʼax ku páajtal a naʼatik teech maʼ tu páajtal k-naʼatik toʼon?
10 Ichiloʼoneʼ yaan máakoʼob tsʼoʼok u yantal u jaʼabiloʼob bey xan máakoʼob tsʼoʼok u saktal u pooloʼob.+
Letiʼobeʼ maas úuchbenoʼob tak tiʼ a papá.
11 ¿Maʼ wa kiʼimak a wóol táan u líiʼsaʼal a wóol tumen Dios,yéetel táan a tʼaʼanal yéetel yaabilajiʼ?
12 ¿Baʼaxten ka chaʼik a jíitaʼal tumen a puksiʼikʼal?
¿Baʼaxten chíikaʼan u yilaʼal ta wich jach pʼujaʼanech?
13 Techeʼ pʼujaʼanech tu contra Dios,le oʼolal ku jóokʼol ta chiʼ tʼaanoʼob beyoʼ.
14 Juntúul wíinikeʼ, ¿mantatsʼ wa ku beetik baʼax maʼalob?
Juntúul máakeʼ, ¿mantatsʼ toj wa baʼax ku beetik?+
15 Paʼatik in waʼaliktech junpʼéel baʼal: Dioseʼ mix tiʼ u ángeloʼob ku confiar,mix le kaʼan limpio tu táanoʼ.+
16 Le oʼolaleʼ, ¿bix kun confiar tiʼ juntúul kʼasaʼan máak chéen baʼaloʼob kʼaastak ku beetik,+tiʼ juntúul máak ku tsʼíiboltik u beetik baʼax kʼaas jeʼex u tsʼíiboltik máak u yukʼik jaʼeʼ?
17 ¡Chʼenxikinteniʼ!
Nikaʼaj in waʼaltech baʼax tsʼoʼok in wilik.
18 Letiʼe baʼaxoʼob ku tsikbaltik le máaxoʼob yaan u naʼatoʼob yoʼolal u papáʼoboʼ,+le baʼaloʼobaʼ maʼatech u taʼakikoʼob.
19 Chéen tiʼ letiʼob tsʼaʼab le luʼumoʼ,maʼ yanchaj yaanal máakoʼob ichiloʼobiʼ.
20 Juntúul kʼasaʼan máakeʼ ku muʼyaj ichil tuláakal u kʼiiniloʼob u kuxtal,ichil tuláakal le años tsʼaʼan utiaʼal u kuxtaloʼ.
21 Ku sajaktal yoʼolal baʼaxoʼob ku yuʼubik.+
Tu kʼiinil mix baʼal chiʼichnakkúuntikeʼ ku kʼuchul j-ookoloʼob tu yiknal.
22 U yojel maʼ kun púutsʼul tiʼ le kíimiloʼ,+yaan u kíimsaʼal yéetel junpʼéel espada.
23 Le kʼasaʼan máakoʼ táan u máan u kaxt baʼal u jaante, ku yaʼalik: ‹¿Tuʼux yaan?›,u yojel taʼaytak u kʼuchul u kʼiinil u kíimil.
24 Ku jach sajaktal yoʼolal le baʼaxoʼob ku sen tuklikoʼ,ku yuʼubik bey juntúul rey ku líikʼil baʼateʼel tu contraeʼ.
25 Letiʼeʼ ku líiʼsik u kʼab tu contra Dios,ku yóotik baʼateʼel yéetel le Máax jach táaj yaan u poderoʼ,*
26 tumen jach tercoeʼ ku pulkuba baʼateʼel tu yéetel,u chʼaʼamaj junpʼéel escudo jach piim yéetel jach maʼalob.
27 Nuuktak u pʼuʼukoʼob,yéetel nojoch u nakʼ.*
28 Chéen baʼaleʼ kajaʼan tiʼ kaajoʼob yaan u xuʼulsaʼaltiʼob,tiʼ najoʼob tuʼux mix máak kun kaʼa kajtaliʼ,leloʼobaʼ yaan u pʼáatloʼob chéen u níinikal tuunichoʼob.
29 Maʼ kun ayikʼaltal, mix kun niktal u ayikʼalil,junpuliʼ maʼ kun yaʼabtal le baʼaxoʼob yaantiʼoʼ.
30 Maʼ kun púutsʼul tiʼ le kíimiloʼ,letiʼeʼ bey junkúul cheʼ ku tijil u gajosil le kéen juʼuluk tumen kʼáakʼeʼ,*yaan u kíimil le kéen táaj ustaʼak tumen Dios.+
31 Maʼ unaj u tuskuba tu juunal ikil u confiar tiʼ baʼaloʼob mix baʼal u biilaloʼobiʼ,tumen mix junpʼéel utsil ken u taastiʼ.
32 Yaan u kíimil antes tiʼ u kʼuchul u kʼiinil,yaan u pʼáatal jeʼex junkúul cheʼ maʼatech u nojochtal u gajosileʼ.+
33 Yaan u pʼáatal jeʼex junkúul uva ku jutik u yich antes u kʼantaleʼ,wa bey junkúul olivo ku jutik u looleʼ.
34 Tuláakal baʼax ku beetik le kʼasaʼan máakoʼoboʼ maʼ kun jóokʼol utsil.+
U yotoch le máaxoʼob ku chaʼik u maʼanloʼoboʼ yaan u láaj elel.
35 Ichil u puksiʼikʼaloʼobeʼ ku tuklikoʼob baʼaloʼob kʼaastak, le oʼolal ku beetkoʼob kʼaas tiʼ u maasil,mantatsʼ táan u tuklikoʼob bix jeʼel u tuskoʼob máakeʼ».
Notas
^ Wa «cerroʼoboʼ».
^ Wa «ku yóotik u yeʼes maas yaan u muukʼ ke le Máax jach táaj yaan u poderoʼ».
^ Teʼelaʼ táan u yúuchul tʼaan tiʼ le máaxoʼob yaʼab baʼaloʼob yaantiʼoboʼ, le ku beetkoʼob chéen baʼax u kʼáatoʼoboʼ bey xan le jach ku creerkubaʼoboʼ.
^ Lelaʼ u kʼáat u yaʼal minaʼan esperanza u kaʼa maʼalobtal.
