Job 17:1-16
17 Tsʼoʼok u xuʼupul in muukʼ, táan u náatsʼal u kʼiinil in kíimil.
Táan u páaʼtiken le cementeriooʼ.+
2 Baʼpachtaʼanen tumen le máaxoʼob burlarkenoʼ,+mantatsʼ kin wilik le baʼaxoʼob ku beetik le terco máakoʼobaʼ.
3 In Dios, prometert yaan a wáantken,tumen ¿máax maas jeʼel u yáantkeneʼ?+
4 Techeʼ ka pixik u tuukuloʼob utiaʼal maʼ u yantal u naʼatoʼob,+beyoʼ minaʼan baʼax oʼolal a nojbaʼalkúuntikoʼob.
5 Yaan máakeʼ ku yaʼalik: ‹Yaʼab baʼaloʼob yaanten utiaʼal in tʼox tiʼ in amigoʼob›,chéen baʼaleʼ maʼ jaajiʼ, tumen u paalaleʼ hasta ku bin u sáasil u yichoʼob tumen wiʼijoʼob.
6 Dioseʼ tsʼoʼok u beetik u yaʼalaʼalten baʼal tumen le kaajoʼoboʼ,+letiʼobeʼ ku túubikoʼob in wich.+
7 Yoʼolal baʼaxoʼob kin muʼyajtikeʼ ku yéeʼjochʼeʼental in paakat,+in kʼaboʼob yéetel in wookoʼobeʼ jach tsʼoʼok u bekʼechtaloʼob.
8 Le máaxoʼob toj u kuxtaloʼoboʼ ku jaʼakʼal u yóoloʼob le kéen u yiloʼob baʼax ku yúuchul,le máax mix baʼal kʼaas ku beetkoʼ ku beetaʼal u muʼyaj tumen le kʼasaʼan máakoʼ.
9 Le utsul máakoʼ mantatsʼ ku bin teʼ maʼalob bejoʼ,+le máax mix baʼal kʼaas ku beetkoʼ ku maas antal u muukʼ.+
10 Teʼexeʼ jeʼel u páajtal a taaleʼex utiaʼal a tʼaaneʼex tu kaʼatéen tin contraeʼ,tumen tsʼoʼok in wilkeʼ mix juntúul tiʼ teʼex yaan a naʼateʼex.+
11 U kʼiiniloʼob in kuxtaleʼ tsʼoʼok u kʼuchul tu xuul,+le baʼaxoʼob kin tuklik in beetik yéetel le baʼaxoʼob kin tsʼíiboltikoʼ maʼ kun béeytaloʼob.+
12 In amigoʼobeʼ tu lugar u yaʼalikoʼob u jaajileʼ chéen baʼaloʼob maʼ jaajtak ku yaʼalikoʼobiʼ,ku yaʼalikoʼob taʼaytak u sáastal, tsʼoʼoleʼ láayliʼ éeʼjochʼeʼeneʼ.
13 Wa kin páaʼtik junpʼíit maaseʼ le Muknaloʼ* yaan u kʼuchul u beetuba in wotoch,+bey túunoʼ ich éeʼjochʼeʼenil kin pektal wenel.+
14 Yaan in wawtik tiʼ le muknaloʼ:+ ‹¡Teech in papá!›,yéetel tiʼ le x-nookʼoloʼ: ‹¡Teech in maama, teech in kiik!›.
15 ¿Tuʼux tsʼoʼok le baʼax kin páaʼtikoʼ?+
Tuláakal máax ilik tsʼoʼokten beyoʼ.
16 Le baʼax kin páaʼtikoʼ yaan u bin teʼ Muknaloʼ,*teen yéetel le baʼax kin páaʼtikoʼ yaan k-bin tu tsʼuʼ le luʼumoʼ».+
