Job 18:1-21
18 Bildad+ le suitaoʼ tu yaʼalaj túun:
2 «¿Bukaʼaj tiempo kʼaʼabéet u máan utiaʼal ka xuʼuluk a tʼaan?
Wa ka yanak kex junpʼíit a naʼateʼ jeʼel u páajtal k-tsikbaleʼ.
3 ¿Baʼaxten bey baʼalcheʼ a wilkoʼoneʼ?+
¿Baʼaxten ka taaskoʼon bey minaʼan k-naʼateʼ?
4 Tak ka a xeʼexetʼ a wíinklil tumen pʼujaʼanecheʼ,¿yaan wa u xúumpʼattaʼal le luʼum chéen ta woʼolaloʼ?
¿Yaan wa u péek junpʼéel nuxiʼ tuunich tu lugar chéen ta woʼolal?
5 U jaajileʼ yaan u tuʼupul le sáasil yaan tiʼ le kʼasaʼan máakoʼ,maʼ bin juulnak u kʼáakʼil tu kaʼatéeniʼ.+
6 Yaan u tuʼupul le sáasil yaan tu yotochoʼ, yaan u pʼáatal éeʼjochʼeʼen.
Le lámpara sáasilkuntik u yotochoʼ yaan u tuʼupul.
7 Yaan u pʼáatal maʼ chich u xíimbaliʼ,tiʼ letiʼ kun úuchul le baʼax kʼaas ku tuklik u beetkoʼ.+
8 Yaan u xíimbal tu tojil junpʼéel trampa,yéetel yaan u tʼiʼilil u yookoʼobiʼ.
9 Yaan u kʼaʼalal u tuunkuy tiʼ junpʼéel trampa,yaan u léechtaʼal u yook tumen junpʼéel suum.+
10 Yaan junpʼéel suum taʼakaʼan tuʼux ku máan,tsʼaʼan junpʼéel trampa tu beel.
11 Jeʼel tuʼuxak ka u sutubaeʼ yaan baʼax jaʼasik u yóol,+ku yuʼubik bey jach taʼaytak u maʼachal u yookeʼ.
12 Ku lúubul u muukʼ,le baʼax kun úuchultiʼoʼ+ yaan u beetik u kojkʼalankil.
13 Ku jaantaʼal u yootʼel,junpʼéel yaayaj kʼojaʼanil jaantik u kʼaboʼob yéetel u yookoʼob.
14 Ku jóoʼsaʼal tu yotoch, le tuʼux ku yuʼubikuba seguro kaʼachoʼ,+táan u bisaʼal utiaʼal ka yanaktiʼ junpʼéel yaayaj kíimil.
15 Yaanal máakoʼob kun kajtal tu yotoch,yaan u kʼiʼikʼitaʼal azufre teʼ tuʼux kajaʼanoʼ.+
16 Jeʼex junkúul cheʼeʼ yaan u tijil u mootsyéetel yaan u kíimil u gajosil.
17 Yaan u tuʼubsaʼal wa yanchaj way luʼumeʼ,mix máak kun kʼaʼajsik u kʼaabaʼ.
18 Yaan u luʼsaʼal tuʼux sáasil utiaʼal u bisaʼal tuʼux éeʼjochʼeʼen,yaan u jóoʼsaʼal teʼ maʼalob luʼum tuʼux yaan kaʼachoʼ.
19 Maʼ kun antal u paalal mix u yáabiloʼob,mix máak kun kajtal teʼ tuʼux yaan kaʼachoʼ.
20 Le kéen úuchuk le baʼaloʼob tiʼaʼ, le máaxoʼob kajaʼanoʼob Chikʼinoʼ* yaan u jaʼakʼal u yóoloʼob,le máaxoʼob kajaʼanoʼob Lakʼinoʼ yaan u jach sajaktaloʼob.
21 Bey u yúuchul tiʼ u yotoch le máax ku beetik baʼax kʼaasoʼ,bey xan tiʼ u yotoch le máax maʼ u kʼaj óol Diosoʼ».
Notas
^ Wa «Oeste».
