Job 4:1-21
4 Elifaz+ le temanita túunoʼ tu yaʼalaj tiʼ Job:
2 «Wa yaan máax u kʼáat u tsoltech wa baʼaxeʼ, ¿jeʼel wa u chúukpajal a wóol a wuʼuyeʼ?
Tumen teneʼ maʼ tu páajtal in makik in chiʼ.
3 U jaajileʼ techeʼ yaʼab máaxoʼob tsʼoʼok a tsolik u nuʼuk tiʼob,yéetel suuk kaʼach a wáantik le máaxoʼob lubaʼan u yóoloʼoboʼ.
4 Le baʼaxoʼob ka waʼalik kaʼachoʼ ku líiʼsik u yóol le máaxoʼob ku tʼóochpajloʼoboʼ,yéetel ka wáantik kaʼach le máaxoʼob taʼaytak u lúubloʼoboʼ.
5 Pero beora tiʼ teech uchaʼanaʼ maʼ ta kaxtik baʼax a beete,bejlaʼa tiʼ teech tocarnajeʼ jach lubaʼan a wóol.
6 ¿Maʼ wa unaj u yantaltech confianza tiʼ Dios ikil a meyajtikiʼ?
¿Maʼ wa unaj u yantaltech esperanza ikil u chúukpajal a wóol a beet baʼax maʼalobiʼ?+
7 Beet uts a máansik ta tuukul lelaʼ: ¿Jeʼel wa u xuʼulsaʼal tiʼ juntúul máak mix baʼal kʼaas u beetmeʼ?
¿Jaytéen a wil u xuʼulsaʼal tiʼ le máaxoʼob toj u kuxtaloʼoboʼ?
8 Teneʼ tsʼoʼok in wilkeʼ le máaxoʼob ku chʼaʼtuklikoʼob* baʼax maʼ maʼalobbey xan le máaxoʼob ku pakʼikoʼob baʼax kʼaasoʼ le xan bíin u jochoʼob.
9 Tak chéen ka táaj ustaʼakoʼob tumen Dioseʼ ku kíimloʼob,le kéen pʼuʼujuk Dioseʼ ku xuʼulultiʼob.
10 Jeʼex k-ojlileʼ le leónoʼ ku yáakam, le táankelem leónoʼ ku jéenkal,chéen baʼaleʼ tak le leónoʼob jach yaan u muukʼoʼobaʼ* ku káachal u kojoʼob.
11 Le leónoʼ ku kíimil wa minaʼan baʼal u jaante,u mejniloʼob túuneʼ ku kʼiʼitpajloʼob.
12 Yaan junpʼéel secreto aʼalaʼabten,chaambelil úuchik u yaʼalaʼal tin xikin.
13 Teʼ hora jach ku tʼúubul u wenel máak de áakʼaboʼteneʼ jach chiʼichnakchajen tu yoʼolal baʼaxoʼob tsʼaʼab in wile,
14 joʼopʼ in sen kikilankil,tak in baakeloʼob káaj u tíitaʼal.
15 Yaan junpʼéel baʼal* máan tu táan in wich,ka xiʼixmukuychaj* in wíinklil.
16 Ka waʼalajeʼ maʼ tin kʼaj óoltaj baʼaxiʼ,chéen tin wilaj yaan baʼax waʼalakbal tin táan.
Ka pʼáat mix junpʼéel ruido yaneʼtin wuʼuyaj u yaʼalaʼal:
17 ‹Juntúul kʼeban máakeʼ, ¿maas wa justo ke Dios?
Juntúul kʼeban wíinikeʼ, ¿maas wa maʼalob baʼax ku beetik ke le Máax Beetmiloʼ?›.
18 Paʼatik in waʼaliktech junpʼéel baʼal: Dioseʼ maʼatech u confiar tiʼ le máaxoʼob meyajtikoʼ.
Tu táan letiʼeʼ mix le ángeloʼob* ku beetkoʼob baʼax tubeeloʼ.
19 ¿Bix kun confiar tiʼ j-kʼeban máakoʼob chéen tiʼ luʼum u taaloʼob,kajaʼanoʼob tiʼ najoʼob beetaʼan yéetel luʼum,+maas séeb jeʼel u puʼuchʼloʼob ke juntúul kʼamaseʼ?*
20 Desde tu sáastal tak tu chíinil kʼiin táan u tsʼatsʼaʼchaʼataʼaloʼob,ku xuʼulsaʼaltiʼob utiaʼal mantatsʼ, pero mix máak tsʼáaik cuenta.
21 ¿Maʼ wa beyoʼob junpʼéel naj de nookʼ ku chʼúukul le kéen jíitsʼtaʼak u suumileʼ?
U jaajileʼ ku kíimloʼob tumen minaʼan u naʼatoʼob.
Notas
^ Ich hebreoeʼ ku yaʼalaʼal kaʼach «ku ararkoʼob».
^ Wa «le táankelem leónoʼob tsʼoʼok u chowaktal u tsoʼotsel u pooloʼoboʼ».
^ Wa «junpʼéel espíritu».
^ Wa «erizarnaj».
^ Wa «mensajeroʼob».
^ Tuláakʼ tuʼuxeʼ ku yaʼalaʼal «x-tuyul».
