Lucas 24:1-53
24 Pero jach jaʼatskab tu yáax kʼiinil le semanaoʼ le koʼoleloʼoboʼ bin u bisoʼob teʼ muknal le kiʼibok xíiwoʼob tu xaʼakʼtoʼoboʼ.+
2 Le ka kʼuchoʼobeʼ tu yiloʼob luʼsaʼan le tuunich yaan kaʼach tu jool le muknaloʼ.+
3 Le ka ookoʼobeʼ maʼ tu yiloʼob u wíinklil Yuumtsil Jesúsiʼ.+
4 Teʼ súutuk jach péeknajaʼan u yóoloʼoboʼ téek chíikpaj kaʼatúul máakoʼob táan u léembal u nookʼoʼob waʼalakbaloʼob tu yiknaloʼob.
5 Le koʼoleloʼobaʼ jach sajakchajoʼobeʼ ka tu chinaj u yichoʼob. Le máakoʼob túunoʼ tu yaʼaloʼobtiʼob: «¿Baʼaxten ka kaxtikeʼex ichil le kimenoʼob le máax kuxaʼanoʼ?+
6 Letiʼeʼ minaʼan wayeʼ, tsʼoʼok u líiʼsaʼal. Kʼaʼajakteʼex le baʼax tu yaʼalajteʼex le tiaʼan kaʼach Galileaoʼ.
7 Letiʼeʼ tu yaʼaleʼ u Paal máakeʼ yaan u kʼuʼubul tu kʼab le j-kʼeban máakoʼoboʼ yéetel yaan u kíimsaʼal tiʼ cheʼ, chéen baʼaleʼ tu yóoxpʼéel kʼiineʼ yaan u líiʼsaʼal».+
8 Ka túun kʼaʼaj tiʼ le koʼoleloʼob le baʼaxoʼob u yaʼalmaj Jesúsoʼ.+
9 Ka jóokʼoʼob tiʼ le muknaloʼ bin u tsikbaltoʼob tiʼ le 11 apóstoloʼob tuláakal le baʼaloʼobaʼ bey xan tiʼ u maasil discípuloʼoboʼ.+
10 Le koʼoleloʼobaʼ María Magdalena, Juana yéetel María u maama Santiago. Le u maasil koʼoleloʼob yanoʼob kaʼach tu yéeteloʼoboʼ tu tsikbaltoʼob xan tiʼ le apóstoloʼob le baʼax úuchoʼ.
11 Chéen baʼaleʼ letiʼobeʼ maʼ tu creertoʼob le baʼax tu yaʼalaj le koʼoleloʼobaʼ, utiaʼaloʼobeʼ bey junpʼéel baʼal maʼ tu páajtal u yúuchleʼ.
12 Chéen baʼaleʼ Pedroeʼ líikʼeʼ ka bin áalkabil yiknal le muknaloʼ, ka chʼeenebnaj ichileʼ chéen le nookʼoʼob ikil toʼobik Jesús tu yiloʼ. Le ka lukʼeʼ jach jakʼaʼan u yóol yéetel táan u tuukul tiʼ le baʼax úuchoʼ.
13 Teʼ kʼiin jeʼeloʼ kaʼatúul tiʼ le discípuloʼoboʼ táan u binoʼob tiʼ junpʼéel chan kajtalil ku kʼaabaʼtik Emaús, lelaʼ kex 11 kilómetros yanil kaʼach tiʼ Jerusalén.
14 Letiʼobeʼ táan kaʼach u tsikbaltikoʼob tu baatsiloʼob tuláakal le baʼaxoʼob tsʼoʼok u yúuchloʼ.
15 Le táan kaʼach u bin u tsikbaloʼoboʼ náatsʼ Jesúseʼ ka joʼopʼ u xíimbal tu yéeteloʼob.
16 Chéen baʼaleʼ letiʼobeʼ maʼ páajchaj u kʼaj óoltikoʼobiʼ.+
17 Letiʼeʼ tu yaʼalajtiʼob: «¿Baʼax le ka bin a tsikbaltikeʼexaʼ?». Letiʼob túuneʼ waʼalajoʼob, tu yichoʼobeʼ chíikaʼan lubaʼan u yóoloʼob.
18 Le discípulo ku kʼaabaʼtik Cleopasoʼ tu núukajtiʼ: «¿Chéen wa jáan taaljaʼanech kajtal Jerusalén yéetel maʼatech a tsikbal yéetel mix máak,* le oʼolal maʼ a wojel baʼaxoʼob tsʼoʼok u yúuchul Jerusalén teʼ kʼiinoʼobaʼ?».
19 Jesús túuneʼ tu yaʼalajtiʼob: «¿Baʼaxoʼob túun?». Letiʼobeʼ tu yaʼaloʼobtiʼ: «Le baʼaxoʼob beetaʼab tiʼ Jesús le Nazarenooʼ,+ le máax tu yeʼesaj tu táan Dios yéetel tu táan le máakoʼob juntúul nojoch profeta yoʼolal le nukuch baʼaloʼob tu beetaj yéetel tu yaʼaloʼ.+
20 Letiʼeʼ kʼuʼub tumen u nuuktakil le sacerdoteʼob yéetel le gobernadoroʼob utiaʼal ka kíimsaʼak+ yéetel ka baʼajak tiʼ cheʼoʼ.
21 Toʼoneʼ t-tukleʼ letiʼe máax yéeyaʼan utiaʼal u salvartik kaʼach u kaajil Israeloʼ,+ chéen baʼaleʼ tsʼoʼok óoxpʼéel kʼiin úuchuk tuláakal le baʼaloʼobaʼ.
22 Tsʼoʼoleʼ jujuntúul koʼoleloʼob yaan xan ichiloʼoneʼ tu beetoʼob u jaʼakʼal k-óol tumen jach jaʼatskabeʼ binoʼob yiknal le muknaloʼ,+
23 chéen baʼaleʼ maʼ tu yiloʼob u wíinklil Jesúsiʼ. Ka taaloʼobeʼ tu yaʼaloʼob yaan ángeloʼob tu chíikbesubaʼob tiʼ letiʼob táan u yaʼalikoʼob kuxaʼan bin Jesús.
24 Tsʼoʼoleʼ jujuntúul xan tiʼ le máaxoʼob yanoʼob t-éeteloʼ binoʼob yiknal le muknaloʼ+ ka tu yiloʼob tuláakal jach jeʼex aʼalaʼabiktiʼob tumen le koʼoleloʼoboʼ, chéen baʼaleʼ maʼ tu yiloʼob Jesúsiʼ».
25 Ka túun tu yaʼalajtiʼob: «Máakeʼex minaʼan a naʼateʼex, ¿baʼaxten istikyaj a creerkeʼex tuláakal le baʼaxoʼob tu yaʼalaj le profetaʼoboʼ?
26 ¿Maʼ wa kʼaʼabéet kaʼach u muʼyajtik Cristo le baʼaloʼobaʼ+ bey xan u kʼamik le páajtalil u náajaltmoʼ?».+
27 Ka túun káaj u tsoliktiʼob tuláakal le baʼaxoʼob ku yaʼalik le u Tʼaan Dios tu yoʼolaloʼ, káaj yéetel le baʼaxoʼob tu tsʼíibtaj Moisés yéetel le profetaʼoboʼ.+
28 Le ka náatsʼoʼob túun teʼ chan kajtalil tuʼux ku binoʼoboʼ Jesúseʼ tu beetaj bey maas náach ku bineʼ.
29 Chéen baʼaleʼ letiʼobeʼ tu sen aʼaloʼobtiʼ: «Pʼáatkech t-éetel tumen tsʼoʼok u chíinil kʼiin, taʼaytak u yáakʼabtal». Letiʼ túuneʼ ook teʼ najoʼ ka pʼáat tu yéeteloʼob.
30 Ka kulaj janal tu yéeteloʼobeʼ tu chʼaʼaj le waajoʼ, tu beetaj junpʼéel oración, tsʼoʼoleʼ tu xetʼajeʼ ka tu tʼoxajtiʼob.+
31 Teʼ súutuk jeʼeloʼ tu kʼaj óoltoʼob yéetel tu tsʼáajoʼob cuenta máax letiʼ, chéen baʼaleʼ saʼat tu táan u yichoʼob.+
32 Letiʼob túuneʼ káaj u yaʼalikoʼob: «¿Maʼ wa t-uʼuyaj bey táan u yelel k-puksiʼikʼal le táan u taal u tsikbal t-éetel teʼ bejoʼ, le táan u tsoliktoʼon jach baʼax ku yaʼalik u Tʼaan Diosoʼ?».
33 Teʼ súutuk jeʼeloʼ líikʼoʼobeʼ ka suunajoʼob Jerusalén, teʼeloʼ tu yiloʼob le 11 apóstoloʼob muchʼukbaloʼob yéetel uláakʼ discípuloʼoboʼ.
34 Ka túun aʼalaʼab tiʼ le kaʼatúul discípuloʼobaʼ: «¡Le Yuumtsiloʼ jach tu jaajil tsʼoʼok u líiʼsaʼal yéetel tsʼoʼok u chíikbeskuba tiʼ Simón!».+
35 Le kaʼatúul discípuloʼob túunoʼ tu tsikbaltoʼob xan le baʼax úuch le táan u binoʼob teʼ bejoʼ, bey xan bix úuchik u kʼaj óoltikoʼob Jesús le táan u xetʼik le waajoʼ.+
36 Le táan u tʼaanoʼob tiʼ le baʼaloʼobaʼ Jesúseʼ waʼalaj chúumuk tiʼ letiʼobeʼ ka tu yaʼalajtiʼob: «Yanakteʼex jeetsʼelil».+
37 Letiʼob túuneʼ sen sajakchajoʼob, tu tukloʼob juntúul jaʼasaj óol le ku yilkoʼoboʼ.
38 Le oʼolal tu yaʼalajtiʼob: «¿Baʼaxten jach saajkeʼex yéetel ku kaʼapʼéelchajal u yóol a puksiʼikʼaleʼex?
39 Ilawileʼex in kʼaboʼob yéetel in wookoʼob ka a wileʼex jach tu jaajil teen. Macheneʼexiʼ ka a wileʼex, tumen juntúul jaʼasaj óoleʼ minaʼan u bakʼel mix u baakel jeʼex a wilkeʼex yaan tiʼ tenaʼ».
40 Le ka tu yaʼalaj lelaʼ tu yeʼesajtiʼob u kʼaboʼob yéetel u yookoʼob.
41 Chéen baʼaleʼ letiʼobeʼ tumen jach kiʼimak u yóoloʼob yéetel jakʼaʼan u yóoloʼobeʼ láayliʼ maʼ tu páajtal u creerkoʼobeʼ. Le oʼolaleʼ Jesúseʼ tu yaʼalajtiʼob: «¿Yaan wa teʼex baʼal jaantbil wayeʼ?».
42 Letiʼob túuneʼ tu tsʼáajoʼob junxéetʼ kʼáaʼtbil kay tiʼ.
43 Letiʼeʼ tu chʼaʼajeʼ ka tu jaantaj tu táan u yichoʼob.
44 Ka tsʼoʼokeʼ tu yaʼalajtiʼob: «Lelaʼ letiʼe baʼax tin waʼalajteʼex le tiaʼanen kaʼach ta wéeteleʼexoʼ.+ Teneʼ tin waʼalajteʼex yaan u béeytal tuláakal le baʼaxoʼob ku yaʼalaʼal tin woʼolal tu Ley Moisés, tu tsʼíib le Profetaʼoboʼ bey xan teʼ Salmosoʼ».+
45 Ka túun tu jeʼekʼabtaj u tuukuloʼob utiaʼal ka u naʼatoʼob le baʼax u kʼáat u yaʼal u Tʼaan Diosoʼ,+
46 ka tu yaʼalajtiʼob: «Tsʼíibtaʼaneʼ le Cristooʼ yaniliʼ u muʼyaj yéetel u líiʼsaʼal ichil le kimenoʼob tu yóoxpʼéel kʼiinoʼ.+
47 Tu kʼaabaʼeʼ yaan u máan aʼalbil ka u kʼex u tuukul u kajnáaliloʼob tuláakal le kaajoʼob+ utiaʼal ka perdonartaʼakoʼoboʼ.+ Lelaʼ yaan u káajal desde Jerusalén.+
48 Teʼex ken a tsʼáaʼex ojéeltbil le baʼaloʼobaʼ.+
49 Teneʼ yaan in túuxtik ta wóokʼoleʼex le baʼax u yaʼalmaj u tsʼáaik in Taataoʼ, teʼexeʼ pʼáatkeʼex tu kaajil Jerusalén tak ken a kʼameʼex le páajtalil ku taal teʼ kaʼanoʼ».+
50 Ka tsʼoʼokeʼ Jesúseʼ tu bisoʼob tak tu kaajil Betania. Teʼeloʼ letiʼeʼ tu líiʼsaj u kʼaboʼobeʼ ka tu kʼáataj tiʼ Dios ka xiʼik utsil tiʼob.
51 Le táan u beetik lelaʼ luʼsaʼab ichiloʼobeʼ ka joʼopʼ u bisaʼal kaʼan.+
52 Letiʼob túuneʼ xolajoʼob tu táan. Ka tsʼoʼokeʼ suunajoʼob Jerusalén jach kiʼimak u yóoloʼob.+
53 Letiʼob túuneʼ mantatsʼ kaʼach ku binoʼob u alabartoʼob Dios teʼ templooʼ.+
Notas
^ Uláakʼ bix u traducirtaʼaleʼ «¿Chéen wa teech ichil le uʼulaboʼob maʼ a wojel le baʼax tsʼoʼok u yúuchloʼ?».
