Oseas 3:1-5
3 Jéeoba túuneʼ tu yaʼalajten: «Xeen, yaabilt tu kaʼatéen le koʼolel yaabiltaʼan tumen uláakʼ xiiboʼ, le koʼolel bin tu paach uláakʼ xiiboʼ.+ Yaabilt jeʼex u yaabiltmil Jéeoba u kajnáaliloʼob Israeloʼ,+ letiʼeʼ u yaabiltmoʼob kex táan u adorarkoʼob uláakʼ diosoʼob+ yéetel kex uts tu tʼaan u kʼubkoʼob tiʼ letiʼob waajoʼob beetaʼan yéetel pasas».
2 Teen túuneʼ tin manaj, tu yoʼolaleʼ tin boʼotaj 15 baʼaloʼob de plata bey xan junpʼéel homer* y medio cebada.
3 Teen túuneʼ tin waʼalajtiʼ: «Yaan a pʼáatal tin wéetel yaʼab tiempo. Techeʼ maʼ unaj a prostituirkabaiʼ,* yéetel maʼ unaj u yantal baʼal a wil yéetel uláakʼ xiibiʼ. Teen xaneʼ maʼ kun antal baʼal in wil ta wéetel».
4 Lelaʼ bey kun úuchloʼ tumen ich yaʼab tiempoeʼ* tu kaajil Israeleʼ maʼ kun antal juntúul reyiʼ,+ mix juntúul príncipeiʼ, maʼ kun kʼubbil sacrificioiʼ, maʼ kun adorarbil mix junpʼéel columnaiʼ, maʼ kun meyaj mix junpʼéel efodiʼ*+ yéetel maʼ kun antal mix junpʼéel imageniʼ.*+
5 Tsʼoʼoleʼ teʼ tu tsʼook kʼiinoʼoboʼ+ u kajnáaliloʼob Israeleʼ yaan u suutoʼob yéetel yaan u kaxtikoʼob Jéeoba u Diosoʼob+ yéetel yaan xan u kaxtikoʼob David u reyoʼob.+ Letiʼobeʼ yaan u yeʼeskoʼob respeto le kéen taalakoʼob tu yiknal Jéeoba utiaʼal ka eʼesaʼak utsil tiʼoboʼ.
Notas
^ Lelaʼ letiʼe bukaʼaj ku bisik junpʼéel nuʼukul de 220 litrosoʼ. Ilawil «Homer», página 2565.
^ Wa «Techeʼ unaj u xuʼulul u yantal baʼal a wil yéetel jejeláas máakoʼob».
^ Ich hebreoeʼ ku yaʼalaʼal kaʼach «yaʼab kʼiinoʼobeʼ».
^ Lelaʼ bey junpʼéel mandileʼ. Ilawil «Efod», página 2562.
^ Ich hebreoeʼ ku yaʼalaʼal kaʼach «terafim». Ilawil «Terafim», página 2582.
