Romanos 5:1-21
5 Beora tsʼoʼok u yaʼalaʼal toj k-kuxtal tu yoʼolal k-fejeʼ,+ kiʼimakchajak k-óol yoʼolal le jeetsʼelil yaantoʼon* yéetel Dios tu yoʼolal k-Yuumtsil Jesucristooʼ.+
2 Tu yoʼolal xan Jesucristoeʼ, k-fejeʼ ku tsʼáaiktoʼon u páajtalil k-natsʼikba tu yiknal Dios utiaʼal k-kʼamik u nojoch utsil, lelaʼ letiʼe yaantoʼon beoraaʼ.+ Kiʼimakchajak xan k-óol* tumen táan k-páaʼtik k-nojbaʼalkúuntaʼal tumen Dios.
3 Maʼ chéen leloʼ, baʼaxeʼ kiʼimakchajak xan k-óol* kéen muʼyajnakoʼon,*+ tumen k-ojleʼ le baʼaxoʼob k-muʼyajtikoʼ ku beetik u yantaltoʼon chúukaʼan óolal.+
4 Le chúukaʼan óolaloʼ ku beetik k-kʼaʼamal tumen Dios,+ le k-kʼaʼamal tumen Diosoʼ ku beetik u yantaltoʼon esperanza,+
5 yéetel le esperanzaoʼ maʼ tu pʼatkoʼon ich suʼtsilil;+ tumen yoʼolal le espíritu santo tsʼoʼok u tsʼaʼabaltoʼonoʼ Dioseʼ tsʼoʼok u chupik k-puksiʼikʼal yéetel u yaabilaj.+
6 Tumen u jaajileʼ kex j-kʼeban máakoʼon* kaʼacheʼ+ Cristoeʼ kíim tu yoʼolal le kʼasaʼan máakoʼob le ka tu chukaj u kʼiiniloʼ.
7 Tumen u suukileʼ mix máak ku tsʼáaik u kuxtal yoʼolal juntúul máak toj u kuxtal. Chéen baʼaleʼ yoʼolal juntúul máak utseʼ maʼ xaaneʼ yaan máax jeʼel u yóotik u tsʼáa u kuxtal tu yoʼolaleʼ.
8 Dioseʼ tu yeʼesajtoʼon u yaabilaj, tumen kex j-kʼeban máakoʼon kaʼacheʼ Cristoeʼ kíim t-oʼolal.+
9 Chéen baʼaleʼ tumen tsʼoʼok u yaʼalaʼal toj k-kuxtal yoʼolal u kʼiʼikʼeleʼ+ maas yaan k-salvartaʼal tiʼ u pʼujaʼanil Dios tu yoʼolal Cristo.+
10 Tumen wa kex u enemigoʼon Dios kaʼach béeychaj k-kaʼa bisikba tu yéetel úuchik u kíimil u Paaloʼ,+ beora túun táan k-bisikba tu yéetelaʼ maas jeʼel u salvarkoʼon tu yoʼolal u kuxtal u Paaloʼ.
11 Chéen baʼaleʼ maʼ chéen leloʼ, baʼaxeʼ kiʼimak k-óol ikil k-bisikba yéetel Dios tu yoʼolal k-Yuumtsil Jesucristo tumen tu yoʼolaleʼ tsʼoʼok k-kʼamik u páajtalil k-kaʼa bisikba yéetel Dios.+
12 Le oʼolaleʼ jeʼel bix tu yoʼolal chéen juntúul máak ook le kʼeban way yóokʼol kaab, yéetel tu yoʼolal le kʼeban ook le kíimiloʼ,+ bey xan úuchik u máan le kíimil tiʼ tuláakal máakoʼ tumen tuláakloʼob kaʼach tsʼoʼok u kʼebantaloʼob...+
13 Tumen antes tiʼ u tsʼaʼabal le Leyoʼ yaan kaʼach kʼeban teʼ yóokʼol kaabaʼ, chéen baʼaleʼ wa minaʼan leyeʼ mix máak ku yaʼalaʼal wa yaan u kʼeban.+
14 Chéen baʼaleʼ le kíimiloʼ káaj u reinar desde tu kʼiiniloʼob Adán ka tsʼoʼok tu kʼiiniloʼob Moisés; reinarnaj tak tu yóokʼol le máaxoʼob maʼ kʼebanchajoʼob jeʼex úuchik u kʼebantal Adánoʼ, le máax chíikaʼan tiʼ le máax aʼalaʼan kun taaloʼ.+
15 Chéen baʼaleʼ le baʼax úuch yéetel u kʼeban Adánoʼ maʼ letiʼe baʼax úuch yéetel u siibal Diosoʼ. Tu yoʼolal u kʼeban juntúul máakeʼ yaʼab máakoʼob kíimoʼob. Chéen baʼaleʼ u nojoch utsil Dios bey xan u siibaleʼ jach yaʼab utsil tu taasaj tiʼ yaʼabkach máakoʼob.+ Le siibalaʼ tsʼaʼab junmúuchʼ yéetel u nojoch utsil Dios tu yoʼolal le juntúuliliʼ máakoʼ,+ Jesucristo.
16 Le baʼax xan úuch le ka kʼebanchaj le juntúuliliʼ máakoʼ maʼ letiʼe baʼax úuch yéetel le siibal tu tsʼáaj Diosoʼ.+ Tumen tu yoʼolal u kʼeban juntúul máakeʼ aʼalaʼab j-kʼeban tuláakal máak,+ chéen baʼaleʼ ka tsʼoʼok u kʼebanchajal yaʼabkach máakoʼobeʼ Dioseʼ tu tsʼáaj junpʼéel siibal utiaʼal u yaʼalaʼal toj u kuxtaloʼob.+
17 Tumen wa chéen yoʼolal u kʼeban juntúul máak reinarnaj le kíimiloʼ,+ le máaxoʼob ken u kʼamoʼob le utsiloʼob ken u taas u nojoch utsil Dios yéetel le siibal tu tsʼáaj utiaʼal ka aʼalaʼak toj u kuxtal máakoʼ,+ maas yaan u kuxtaloʼob yéetel u reinaroʼob+ tu yoʼolal Jesucristo, le juntúuliliʼ máakoʼ.+
18 Wa chéen yoʼolal u kʼeban juntúul máak aʼalaʼab yaan u kʼeban tuláakal máakeʼ,+ bey túun xanoʼ chéen yoʼolal junpʼéel baʼax toj beetaʼabeʼ+ yaan u yaʼalaʼal toj u kuxtal tuláakal máak yéetel ku náajmatikoʼob ka kuxlakoʼob.+
19 Jeʼex yaʼab máakoʼob aʼalaʼab yaan u kʼebanoʼob tumen maʼ tu yuʼubaj tʼaan juntúul máakeʼ,+ yaʼab máakoʼob xan kun aʼalbil toj u kuxtaloʼob úuchik u yuʼubik tʼaan le juntúuliliʼ máakoʼ.+
20 Le Ley túunoʼ kʼuch antal utiaʼal ka maas chíikpajak le kʼebanoʼ.+ Chéen baʼaleʼ le tuʼux maas yaʼabchaj le kʼebanoʼ maas yaʼabchaj xan u nojoch utsil Dios.
21 ¿Baʼaxten? Tumen jeʼex úuchik u reinar le kʼeban yéetel le kíimiloʼ+ bey xan kun reinar u nojoch utsil Dios yoʼolal u justicia utiaʼal ka yanak kuxtal minaʼan u xuul tu yoʼolal k-Yuumtsil Jesucristo.+
Notas
^ Uláakʼ bix u traducirtaʼaleʼ «yaantoʼon jeetsʼelil».
^ Uláakʼ bix u traducirtaʼaleʼ «kiʼimak k-óol».
^ Uláakʼ bix u traducirtaʼaleʼ «kiʼimak k-óol».
^ Wa «kéen sufrirnakoʼon».
^ Ich griegoeʼ ku yaʼalaʼal kaʼach «minaʼan k-muukʼ».
