Romanos 7:1-25
7 Sukuʼuneʼex, ¿maʼ wa a wojleʼexeʼ máakeʼ esclavizartaʼan tumen le Ley tuláakal u kʼiiniloʼob u kuxtaloʼ? (Táan in tʼaan yéetel máaxoʼob u kʼaj óoloʼob le leyoʼ).
2 Tuukulneneʼex tiʼ lelaʼ: juntúul koʼolel tsʼokaʼan u beeleʼ tiʼ yaan yáanal u ley u yíicham ichil tuláakal le kʼiinoʼob kuxaʼan u yíichamoʼ, chéen baʼaleʼ wa ku kíimil u yíichameʼ ku pʼáatal minaʼan yáanal u ley u yíicham.+
3 Le oʼolaleʼ wa ku tsʼoʼokol u beel yéetel yaanal xiib kex kuxaʼan u yíichameʼ táan u kʼebantal.*+ Chéen baʼaleʼ wa ku kíimil u yíichameʼ ku pʼáatal minaʼan yáanal u ley u yíicham, bey túunoʼ wa ku tsʼoʼokol u beel yéetel yaanaleʼ maʼ táan u kʼebantaliʼ.+
4 Le oʼolaleʼ, in sukuʼuneʼex, jeʼex yanil kaʼachoʼ, teʼexeʼ tsʼokaʼan a beeleʼex kaʼach yéetel le Leyoʼ, chéen baʼaleʼ leloʼ xuʼul úuchik u kʼubik u kuxtal* Cristo. Lelaʼ úuch utiaʼal ka yanakeʼex yáanal u páajtalil Cristo+ le máax kaʼa kuxkíintaʼaboʼ,+ utiaʼal beyoʼ ka k-beeteʼex baʼax uts tu tʼaan Dios.+
5 Chéen baʼaleʼ le esclavoʼon kaʼach tiʼ k-kʼeban wíinkliloʼ, le kʼaakʼas tsʼíibolaloʼob chíikpajoʼob tu yoʼolal le Leyoʼ ku túulchʼintkoʼonoʼob kaʼach k-beet baʼaloʼob kʼaastak ku bisik máak tiʼ kíimil.+
6 Chéen baʼaleʼ beoraaʼ tsʼoʼok k-luʼsaʼal yáanal le Leyoʼ,+ tumen le Leyoʼ tsʼoʼok u pʼáatal minaʼan u páajtalil t-óokʼol. Beoraaʼ esclavoʼon, chéen baʼaleʼ maʼ tumen táan u nuʼuktikoʼon le úuchben Ley tsʼíibtaʼanoʼ,+ baʼaxeʼ tumen letiʼe espíritu santo nuʼuktikoʼonoʼ.+
7 ¿Baʼax túun ken k-aʼale? ¿Yaan wa k-aʼalik maʼ maʼalob* le Leyoʼ? ¡Jach junpuliʼ maʼ! U jaajileʼ, wa maʼ tu yoʼolal le Leyoʼ bejlaʼa kaʼach maʼ táan in kʼaj óoltik baʼax le kʼebanoʼ;+ tsʼoʼoleʼ wa maʼ u yaʼalik kaʼach le Ley: «Maʼ unaj a tsʼíiboltik baʼax maʼ a tiaʼaliʼ», bejlaʼa xan maʼ táan in wojéeltik wa kʼaas u tsʼíiboltik máak baʼax maʼ u tiaʼaliʼ.+
8 Chéen baʼaleʼ le kʼebanoʼ tumen tu chʼaʼaj u muukʼ yoʼolal le baʼax ku yaʼalik le leyoʼ, tu beetaj u yantalten jejeláas tsʼíibolaloʼob maʼ maʼalobtakiʼ; tumen le minaʼan kaʼach le leyoʼ kimen kaʼach le kʼebanoʼ.+
9 U jaajileʼ teneʼ kuxaʼanen kaʼach x-maʼ leyil; chéen baʼaleʼ le ka tsʼaʼab in kʼaj óolt le leyoʼ, le kʼebanoʼ kuxlaji, chéen baʼaleʼ teneʼ kíimen.+
10 Tin wileʼ le ley unaj u bisken tiʼ kuxtaloʼ+ ku bisken tiʼ kíimil.
11 Tumen le kʼebanoʼ tu chʼaʼaj u muukʼ tiʼ le leyoʼ ka tu táabsen, yéetel tu yoʼolal le leyoʼ tu kíimsen.
12 Chéen baʼaleʼ le Leyoʼ santo, le baʼax aʼalaʼab xanoʼ santo, toj yéetel maʼalob.+
13 Chéen baʼaleʼ ¿baʼax túun ken in waʼale? ¿Letiʼe wa in beetik baʼax maʼalob beet in bin tiʼ kíimiloʼ? ¡U jaajileʼ maʼ! Baʼaxeʼ letiʼe kʼeban beetkoʼ. Yoʼolal baʼax maʼalobeʼ le kʼebanoʼ tu beetaj in bin tiʼ kíimil utiaʼal ka chíikpajak jach baʼax le kʼebanoʼ.+ Le ley xanoʼ ku yeʼesikeʼ le kʼebanoʼ jach ku beetik u bin kʼaasil tiʼ máak.+
14 Toʼoneʼ k-ojleʼ le Leyoʼ tiʼ Dios u taal; chéen baʼaleʼ teneʼ chéen juntúul wíiniken konaʼanen tiʼ le kʼebanoʼ.+
15 Tumen le baʼax in kʼáatoʼ maʼ letiʼe baʼax kin beetkoʼ, baʼaxeʼ le baʼax in pʼekmoʼ letiʼe baʼax kin beetkoʼ. Teneʼ maʼ in wojel baʼaxten kin beetik beyoʼ.
16 Chéen baʼaleʼ wa le baʼax maʼ in kʼáat in beet letiʼe baʼax kin beetkoʼ, kin tsʼáaik cuentaeʼ jach maʼalob le baʼax ku yaʼalik le Leyoʼ.
17 Chéen baʼaleʼ beoraaʼ maʼ teen beetik le baʼaloʼobaʼ, baʼaxeʼ letiʼe kʼeban yaan tin wíinklil beetkoʼ.+
18 Tumen in wojleʼ tin wíinklileʼ* minaʼan mix baʼal maʼalobiʼ; tumen kex kin tsʼíiboltik in beetik baʼax maʼalobeʼ maʼ tu páajtal in beetik baʼax kin tsʼíiboltik.+
19 Tumen le baʼax maʼalob kin tsʼíiboltikoʼ maʼ tin beetik, chéen baʼaleʼ le baʼax kʼaas maʼ tin tsʼíiboltikoʼ letiʼe kin beetkoʼ.
20 Bey túunoʼ wa le baʼax kin beetik maʼ letiʼe kin tsʼíiboltikoʼ leloʼ maʼ teen beetkiʼ, baʼaxeʼ letiʼe kʼeban yaan tin wíinklil beetkoʼ.
21 Kin wilik túuneʼ tin wíinklileʼ tiʼ yaan le ley jeʼelaʼ: le kéen in wóot in beet baʼax maʼalobeʼ ku kʼatkuba tin táan le baʼax maʼ maʼaloboʼ.+
22 U jaajileʼ jach ku kiʼimaktal u yóol in puksiʼikʼal yoʼolal u ley Dios,+
23 chéen baʼaleʼ kin tsʼáaik cuentaeʼ tin wíinklileʼ yaan uláakʼ ley ku baʼateʼel tu contra le ley yaan tin tuukuloʼ+ yéetel ku bisken bey esclavo tiʼ u leyil le kʼeban+ yaan tin wíinkliloʼ.
24 ¡Jach óotsilen! ¿Máax kun jáalkʼabtiken tiʼ le wíinklil táan u bisken tiʼ le kíimiloʼ?
25 ¡Gracias tiʼ Dioseʼ yoʼolal k-Yuumtsil Jesucristoeʼ letiʼeʼ yaan u jáalkʼabtiken! Bey túunoʼ, yéetel in tuukuleʼ esclavoen tiʼ u ley Dios, chéen baʼaleʼ yéetel in wíinklileʼ esclavoen tiʼ u leyil le kʼebanoʼ.+
Notas
^ Ich griegoeʼ teʼelaʼ táan u yúuchul tʼaan tiʼ u kʼebantal máak yéetel máax maʼ u núupiʼ.
^ Ich griegoeʼ ku yaʼalaʼal kaʼach «wíinklil».
^ Ich griegoeʼ ku yaʼalaʼal kaʼach «kʼeban».
^ Ich griegoeʼ ku yaʼalaʼal kaʼach «tin bakʼeleʼ».
