Salmos 64:1-10
-
U kanáantaʼal máak tiʼ u enemigoʼob
-
«Letiʼob kun kíimsbiloʼob tumen Dios» (7)
-
Utiaʼal máax ku nuʼuktaj. Le kʼaayaʼ David tsʼíibte.
64 In Dios, uʼuy baʼax kin kʼáatiktech.+
Kanáant in kuxtal tiʼ le baʼaxoʼob ku beetik in enemigooʼ.
2 Kanáanten tiʼ le baʼaxoʼob ku chʼaʼtuklik u beetik le kʼasaʼan máakoʼoboʼ.+
Kanáanten tiʼ le yaʼabkach kʼasaʼan máakoʼoboʼ.
3 U yaakʼoʼobeʼ tsʼoʼok u pʼáatal bey junpʼéel espada jach puputsʼkileʼ.
Le baʼaloʼob kʼaastak ku yaʼalikoʼoboʼ beyoʼob flechaʼob ku tsʼáaikoʼob tu tojil máakeʼ.
4 Ku beetkoʼob utiaʼal u chʼinikoʼob juntúul máak inocente,chéen ken jáan chʼiinakoʼob desde tuʼux u taʼakmubaʼoboʼ, jach maʼ saajkoʼobiʼ.
5 Ku beetkoʼob le baʼax kʼaas u chʼaʼtukultmoʼoboʼ,ku tuklikoʼob tuʼux ken u taʼak u trampaʼob.
Ku yaʼalikoʼob: «Mix máak kun ilik tuʼux k-tsʼaamaj».+
6 Mantatsʼ táan u kaxtikoʼob bix jeʼel u beetkoʼob kʼaaseʼ,ku x-mukul tsikbaltikoʼob bix ken u beetiloʼob,+maʼ tu páajtal u yojéeltaʼal baʼax yaan tu puksiʼikʼaloʼob.
7 Chéen baʼaleʼ letiʼob kun kíimsbiloʼob tumen Dios yéetel flechaʼob.+
Chéen ken u yuʼuboʼob u tsʼóopol junpʼéel flecha tiʼob.
8 Tiʼ letiʼob kun bin kʼaasil yoʼolal le baʼax ku chʼaʼtuklikoʼoboʼ.+
Tuláakal máax kun ilkoʼobeʼ yaan u piʼikʼtik u pooloʼob.
9 Tuláakal máak túuneʼ yaan u péek u yóol,yaan u juum u tsikbaltikoʼob le baʼax tu beetaj Diosoʼ,yaan u kʼuchul u naʼatoʼob baʼaxoʼob ku beetik Dios.+
10 Le máax ku beetik baʼax maʼaloboʼ yaan u yutstal tu tʼaan baʼax tu beetaj Jéeoba yéetel yaan u natsʼkuba tu yiknal.+
Le máaxoʼob uts u puksiʼikʼaloʼoboʼ yaan u kiʼimaktal u yóoloʼob.
