18 Xookil

 Maʼ u xuʼulul a beetkaba u amigo Dios

Maʼ chéen chʼaʼabil u biskuba máak mantatsʼ yéetel u amigoiʼ. Wa ka wilik a biskaba mantatsʼ yéetel Dioseʼ yaʼab utsiloʼob ken a kʼame. Jesuseʼ tu yaʼalaj tiʼ u disipuloʼob: «Le jaaj túunoʼ bíin u jáalkʼabteʼex» (Juan 8:32). ¿Baʼax u kʼáat u yaʼal le tʼaanoʼobaʼ?

Jeʼel u páajtal a jáalkʼabtaʼal tiʼ yaʼab baʼaloʼob bejlaʼeʼ. Jeʼel u páajtal a jáalkʼabtaʼal wa a náachkuntaʼal tiʼ le kaʼansajoʼob maʼ jaajtak ku taal tiʼ Satanasoʼ. Tsʼoʼoleʼ jeʼel xan u páajtal a jáalkʼabtaʼal tiʼ le chiʼichnakil yaan tiʼ le máaxoʼob maʼ u kʼaj óoloʼob Jéeobaoʼ (Romailoʼob 8:22). U amigoʼob Dioseʼ tsʼoʼok u jáalkʼabtaʼaloʼob tiʼ u saajkilil le kíimloʼ (Hebreob 2:14, 15).

Teʼ paraísooʼ yaan a jáalkʼabtaʼal tiʼ tuláakal baʼal kʼaas. ¿Máasaʼ jach yaan u kiʼimaktal a wóol ken jáalkʼabtaʼakech tiʼ tuláakal le baʼaloʼob kʼaastakoʼ? Teʼ paraísooʼ maʼ kun antal baʼateloʼobiʼ, kʼojaʼaniloʼob mix máakoʼob kʼasaʼantakoʼobiʼ. Maʼ kun antal óotsilil mix wiʼijiliʼ. Mix máak kun chʼíijil yéetel mix máak kun kíimil, tiʼ mix baʼal ken a chʼaʼa saajkil yéetel maʼ kun beetbil kʼaas tiʼ mix máakiʼ. Le Bibliaoʼ ku yaʼalik: «Ka jeʼik a kʼabeʼ, yéetel maʼalob óolaleʼ ka naʼajkunsik tuláakal le kuxaʼan baʼaloʼoboʼ» (Salmo 145:16).

 U amigoʼob Dioseʼ yaan u kuxtaloʼob utiaʼal minaʼan u xuul. Le kuxtal minaʼan u xuuloʼ letiʼe siibal ken u tsʼáa Dios tiʼ u amigoʼoboʼ (Romailoʼob 6:23). ¡Chéen tukult bukaʼaj jaʼtsil u kuxtal máak minaʼan u xuul!

Yaan u yantaltech tiempo utiaʼal a beetik yaʼab baʼaloʼob. Maʼ xaaneʼ yaan u taaktal a kanik paax, a kanik a pintart jatsʼuts cuadroʼob wa a beetik uláakʼ baʼaloʼob. Maʼ xaaneʼ, yaan u taaktal a maas kaambal tiʼ bix u kuxtal le baʼalcheʼoboʼ yéetel tiʼ bix le cheʼoboʼ. Maʼ xaan xaneʼ yaan u taaktal a bin xíimbal tuláakʼ luʼumiloʼob utiaʼal a kʼaj óoltik uláakʼ máakoʼob. Tumen yaan u yantaltoʼon kuxtal minaʼan u xuuleʼ yaan u páajtal k-beetik tuláakal le baʼaloʼobaʼ.

Yaan u yantaltech tiempo utiaʼal a kʼaj óoltik uláakʼ máakoʼob. Tumen yaan a kuxtal minaʼan u xuuleʼ, yaan u páajtal a kʼaj óoltik uláakʼ máakoʼob u yaabilmoʼob Dios. Yaan a kʼaj óoltik bix u modosoʼob, baʼax u yojel u beetoʼob yéetel yaan xan a beetkaba u amigoʼob. Yaan a yaabilkoʼob yéetel letiʼobeʼ yaan xan u yaabiltkechoʼob (1 Corintoiloʼob 13:8). Tumen yaan a kuxtal utiaʼal minaʼan u xuuleʼ, yaan u páajtal a biskaba maʼalob yéetel tuláakal le máakoʼoboʼ. U maas maʼalobileʼ, yaan a biskaba maas maʼalob yéetel Dios jeʼex u bin u máan le jaʼaboʼoboʼ. Le oʼolaleʼ, ¡beetaba u amigo Dios utiaʼal mantatsʼ!