17 Xookil

 Utiaʼal u yantal a amigoʼobeʼ unaj a biskaba yéetel u maasil

Le yaabilajoʼ ku yáantkech a bisaba yéetel u maasil. Jeʼex kun bin a maas kaambal tiʼ Dioseʼ bey kun bin u maas nojochtal le yaabilaj ka wuʼuyik tu yoʼolaloʼ yéetel bey xan kun bin u maas taaktal a meyajtikoʼ. Le yaabilajoʼ yaan xan u yáantkech a beet le baʼax tu yaʼalaj Jesusoʼ (Mateo 28:19). Wa ka biskaba mantatsʼ yéetel u j-jaajkunajoʼob Jéeobaeʼ yaan u yantaltech le kiʼimak óolal ku yuʼubik le máaxoʼob ku biskubaʼob yéetel Diosoʼ. ¿Baʼax kʼaʼabéet a beetik utiaʼal ka yanakech ichil le máaxoʼob meyajtik Diosoʼ?

Eʼes a yaabilmaj Dios ikil a beetik le baʼaxoʼob ku yaʼalikoʼ. «U yaabiltaʼal Jajal Dioseʼ u yuʼubajtʼantaʼal u yaʼalmajtʼaanoʼob; yéetel u yaʼalmajtʼaanoʼobeʼ maʼ talamoʼobiʼ.» (1 Juan 5:3.)

Tsʼáa ichil a kuxtal le baʼax ka kanikoʼ. Yéetel upʼéel kettʼaaneʼ, Jesuseʼ tu yeʼesaj bix jeʼel u páajtal u beetaʼal lelaʼ. Tu yaʼaleʼ utúul máak yaan u naʼateʼ tu beetaj u yotoch yóokʼol tuunich yéetel utúul máak minaʼan u naʼateʼ tu beetaj yóokʼol arena. Baʼaleʼ ka taal upʼéel kʼaʼamkach iikʼeʼ le naj beetaʼab yóokʼol tuuncheʼ mix baʼal úuchtiʼ, baʼaleʼ le beetaʼab yóokʼol arenaeʼ júuti. Jesuseʼ tu yaʼaleʼ le máaxoʼob ku beetkoʼob le baʼaxoʼob tu kaʼansoʼ beyoʼob jeʼex le máak tu beetaj u yotoch yóokʼol tuunchoʼ. Tu yaʼalaj xaneʼ le máaxoʼob maʼ tu beetkoʼob le baʼaxoʼob tu kaʼansoʼ beyoʼob jeʼex le máak tu beetaj u yotoch yóokʼol arenaoʼ. ¿A kʼáat wa a beetaba jeʼex le máak tu beetaj u yotoch yóokʼol tuunchoʼ? (Mateo 7:24-27.)

 Kʼub a kuxtal tiʼ Dios. Utiaʼal a beetik lelaʼ kʼaʼabéet a beetik upʼéel oración utiaʼal a waʼaliktiʼ a kʼáat a beet tuláakal baʼax ku yaʼalik. Wa ka beetik le baʼax u kʼáat Diosoʼ, yaan a weʼesik ka tsʼoʼokbesik le baʼaxoʼob tu yaʼalaj Jesucristooʼ (Mateo 11:29).

Okjaʼanen. «Okjaʼanakech, tsʼáa xan a woksaj óolal tiʼ u kʼaabaʼ Yuumtsil utiaʼal u pʼoʼik a kʼebanoʼob.» (Beetaʼanoʼob 22:16.)

Kʼub a wóol a meyajt Dios. «Jeʼel baʼalak ka a beeteʼexeʼ, beeteʼex yéetel utsil óolal, bey táan a meyajtikeʼex [Jéeobaeʼ] maʼ máakoʼobiʼ.» (Colosailoʼob 3:23.)