¿AKʼAJ ÓOL wa le koʼolel yaan teʼ dibujoaʼ? U kʼaabaʼeʼ Rebeca. Letiʼeʼ táan u náatsʼal yiknal Isaac. Letiʼobeʼ yaan u tsʼoʼokol u beeloʼob. ¿Bix túun úuchik lelaʼ?

Abraham, u taata Isaaqueʼ, u kʼáat kaʼach utúul x-maʼalob atan utiaʼal Isaac. Maʼ u kʼáat ka tsʼoʼokok u beel yéetel utúul x-canaaneaiʼ, tumen maʼatech u meyajtkoʼob Jéeoba. Le oʼolaleʼ, Abrahameʼ tu tʼanaj u palitsileʼ, ka tiaʼalajtiʼ: In kʼáat ka xiʼikech Arán, tuʼux kajaʼan in láakʼoʼob, utiaʼal a yéeyik utúul koʼolel utiaʼal u tsʼoʼokol u beel yéetel Isaac.

Tu séebaʼanileʼ, u palitsil Abrahameʼ tu chʼaʼaj diez utúulul camelloʼobeʼ ka jóokʼ u bimbal teʼ náanach kaajoʼ. Le ka náatsʼ teʼ tuʼux kajaʼan u láakʼoʼob Abrahameʼ, jeʼel yiknal upʼéel chʼeʼen. Táan u éeʼsameʼental, lelaʼ letiʼe u súutukil u taaloʼob chʼaʼa jaʼ u koʼoleliloʼob le kaajoʼ. U palitsil túun Abrahameʼ tiaʼalaj ich payalchiʼ tiʼ Jéeoba: Le koʼolel ken a yéey utiaʼal tsʼoʼokol u beel yéetel Isaaqueʼ, yaan u tsʼáaik jaʼ in wukʼej bey xan tiʼ le camelloʼoboʼ.

Jach maʼ sáameʼ ka taal Rebeca chʼaʼa jaʼ. Le palitsiloʼ ka túun tu kʼáataj jaʼ tiʼ Rebeca utiaʼal u yukʼej, letiʼ túuneʼ tu tsʼáajtiʼ. Ku tsʼoʼoleʼ ka bin u páayt jaʼ utiaʼal xan u tsʼáa tiʼe camelloʼoboʼ. Jach yaʼab meyaj tu beetaj, tumen le camelloʼoboʼ jach yaʼab u yuʼkoʼob jaʼ.

Ka tsʼoʼok u páay jaʼ Rebecaeʼ, u palitsil Abrahameʼ tu kʼáatchiʼitajtiʼ: Máax a taata. Tu kʼáataj xan wa yaan tuʼux u pʼáatal wenel tu yotochoʼob. Rebecaeʼ tu núukaj: In taataeʼ Betuel, yéetel yaan tuʼux a pʼáatal tin wotoch. U palitsil Abrahameʼ u yojel u taata Betueleʼ Nacor, u sukuʼun Abraham. Le oʼolal xolaj u tsʼáaj nib óolal tiʼ Jéeoba úuchik u yáantaʼal ka kʼuchuk yiknal u láakʼoʼob Abraham.

Tiʼe áakʼaboʼ, u palitsil Abrahameʼ tiaʼalaj tiʼ Betuel yéetel tiʼ Labán, u sukuʼun Rebeca, baʼax óolal kʼuch u xíimbaltoʼob. Letiʼobeʼ tiaʼaloʼob jeʼel u páajtal u bin Rebeca ka tsʼoʼokok u beel yéetel Isaaqueʼ. Baʼaleʼ ¿baʼax tiaʼalaj Rebeca ka xan kʼáataʼabtiʼ? Letiʼeʼ tiaʼaleʼ jeʼel u tsʼoʼokol u beel yéetel Isaaqueʼ. Le oʼolaleʼ, ka sáaschajeʼ naʼakoʼob yóokʼol le camelloʼoboʼ ka tu káajsaj u binoʼob tu kaajil Canaán.

Tsʼoʼok u yáakʼabtal ka kʼuchoʼob. Rebecaeʼ tu yilaj utúul máak ku máan teʼ jáal bejoʼ. Le máakoʼ Isaac. Letiʼeʼ kiʼimakchaj u yóol ka tu yilaj Rebeca. Sara u mama Isaaqueʼ tsʼoʼok óoxpʼéel jaʼaboʼob kíimik, le oʼolaleʼ Isaaqueʼ láayliʼ okʼom óol kaʼacheʼ. Baʼaleʼ beooraaʼ kʼuch u jach yaabilt Rebecaeʼ ka kiʼimakchaj u yóol tu kaʼatéen.