¡ILAWIL tuʼux yaan Daniel! Jach bey yaan u jaantaʼaleʼ. ¡Baʼaleʼ mix baʼal ku beetaʼaltiʼ tumen le leónoʼoboʼ! ¿A wojel wa baʼaxten? ¿Máax beet u puʼulul Daniel tu sajkab le leónoʼoboʼ? Koʼox ilik.

Beooraaʼ Darío u reyil Babilonia. Danieleʼ jach uts yéetel jach yaan u naʼat, le oʼolal ku lúubul utsil tiʼ Darío. Darío túuneʼ tu tsʼáaj Daniel u beetuba xan nojoch gobernantei tu reino. Le beetik yaʼab máaxoʼob pʼekt Daniel, ka túun tu beetoʼob lelaʼ:

Binoʼob yiknal Daríoeʼ ka tiaʼaloʼobtiʼ: Yuum rey, toʼoneʼ k-kʼáat ka beet upʼéel ley tuʼux kiaʼalik ich treinta kʼiinoʼobeʼ mix máak ka payalchiʼinak tiʼ mix utúul dios mix tiʼ yaanal máak, chéen tiʼ teech yuum rey. Le máax maʼ ken u beet beyoʼ, ku puʼulul tu sajkab le leónoʼoboʼ. Daríoeʼ maʼ u yojel baʼaxten u kʼáat le máakoʼob ka beetaʼak le leyaʼ. Baʼaleʼ maʼalob tu yuʼubaj, ka túun tu beetaj. Beooraaʼ maʼatan u páajtal u kʼeʼexel.

Ka tu yojéeltaj Daniel baʼax tsʼoʼok u chʼaʼatuklaʼaleʼ, letiʼeʼ bin tu yotocheʼ ka payalchiʼinaj jeʼex suukil u beetkeʼ. Le kʼasaʼan máakoʼoboʼ u yojloʼob Danieleʼ maʼatan u xulik u payalchiʼ tiʼ Jéeoba. Lelaʼ tu beetaj u kiʼimaktal u yóoloʼob, tumen bey jach táan u jóokʼol maʼalobil le baʼax u tukulmoʼob utiaʼal u kíimskoʼob Danieloʼ.

Rey Darío túuneʼ jach okʼom óolchaj ka tu yilaj baʼax ku yúuchul. Baʼaleʼ maʼ tu páajtal u kʼexik le baʼax tsʼoʼok u yaʼalikoʼ, ka yanchaj u yaʼalik ka puʼuluk Daniel ich u sajkab le leónoʼoboʼ. Baʼaleʼ letiʼeʼ tiaʼalaj tiʼ Daniel: Kin páaʼtik ka u kanáantech le Dios ka meyajtikoʼ.

Tiʼe áakʼab jeʼeloʼ Daríoeʼ maʼ páajchaj u weenliʼ tumen jach chiʼichnakchaji. Pʼelak u sáastal túuneʼ bin áalkabil tu jool u sajkab le leónoʼob, jeʼex a wilik teʼ dibujoaʼ. Letiʼ túuneʼ tiaʼalaj: Daniel, ¿tu kanáantech wa a Dios tiʼ le leónoʼoboʼ?

Danieleʼ tu núukaj: In Dioseʼ tu túuxtaj u ángel utiaʼal ka u nupʼ u chiʼ le leónoʼoboʼ yoʼolal maʼ u beetkoʼobten loob.

Le rey túunoʼ jach kiʼimakchaj u yóol. Ka tiaʼalaj ka jóoʼsaʼak Daniel. Ka tsʼoʼokeʼ le kʼasaʼan máakoʼob tu yóotoʼob kaʼach u kíimsoʼob Danieloʼ pulaʼaboʼob ich u sajkab le leónoʼoboʼ. Maʼ jach kúulkoʼob tu taamil le sajkab ka tu pulubaj le leónoʼob tu yóoʼloʼoboʼ ka kaʼakachaʼab u baakeloʼob.

Rey Darío túuneʼ tu beetaj upʼéel ley tuʼux kiaʼalik tiʼ le máaxoʼob ku gobernarkoʼ: Tsikeʼex u Dios Daniel, tumen jach nojoch u páajtalil. Letiʼeʼ tu kanáantaj Daniel utiaʼal maʼ u jaantaʼal tumen le leónoʼoboʼ.