¡ILAWIL le baʼax kʼaas ku yúuchlaʼ! Táan u kíimsaʼal Jesús. Chʼuykíintaʼan tiʼ upʼéel cheʼ. Bajaʼan clavos tu kʼaboʼob bey xan tu yookoʼob. ¿Baʼax oʼolal beetaʼab tiʼ Jesús lelaʼ?

Tumen yaan máaxoʼob pʼekmai. ¿A wojel wa máaxoʼobiʼ? Utúul tiʼ letiʼobeʼ letiʼe Kʼaasilbaʼaloʼ. Letiʼ beet u náachtal Adán yéetel Eva tiʼ Jéeoba. Letiʼ xan oks tu tuukul le máaxoʼob pʼekmil Jesús utiaʼal ka u kíimsoʼoboʼ.

Le maʼ bajaʼak Jesús teʼ cheʼoʼ, sen pʼaʼastaʼab tumen le máaxoʼob pʼekmiloʼ. ¿Kʼajaʼan wa tech ka taaloʼob teʼ jardín tiʼ Getsemaní ka tu bisoʼob Jesuseʼ? ¿Máaxoʼob túun pʼekmil? Letiʼe u nuuktakiloʼob le j-kʼiinoʼoboʼ. Koʼox ilik baʼax kun úuchul.

Ka bisaʼab Jesús tumen u nuuktakiloʼob le j-kʼiinoʼoboʼ, u apóstoloʼobeʼ púutsʼoʼob. Sajakchajoʼobeʼ ka tu pʼatoʼob Jesús tu kʼab le máaxoʼob pʼekmiloʼ. Baʼaleʼ apóstol Pedro yéetel Juaneʼ maʼ jach náachchajoʼobiʼ. Joʼopʼ u binoʼob tu paach le máakoʼoboʼ yoʼolal u yilkoʼob baʼax kun úuchul tiʼ Jesús.

Le j-kʼiinoʼoboʼ tu bisoʼob Jesús tu táan Anás, u nojochiloʼob kaʼachoʼ. Baʼaleʼ maʼ xáanchajoʼobiʼ. Ka tsʼoʼokeʼ ka tu bisoʼob Jesús tu yotoch Caifás, u jeel u nojochil le j-kʼiinoʼoboʼ. Teʼeloʼ tiaʼan xan uláakʼ j-kʼiinoʼobiʼ.

Tu yotoch Caifás pʼis óoltaʼab Jesús. Yaan máaxoʼob xan taasaʼab utiaʼal u yaʼaloʼob baʼaloʼob maʼ jaajtak yoʼolal Jesusiʼ. Tuláakal le j-kʼiinoʼoboʼ tiaʼaloʼob: Kʼaʼabéet u kíimsaʼal. Ka tsʼoʼokeʼ ka loʼoloxaʼab Jesús yéetel sen túubaʼab u yich.

Le táan yúuchul lelaʼ, Pedroeʼ tiaʼan tu táankabil le najoʼ. Le áakʼab jeʼeloʼ jach keʼel, le máakoʼob túunoʼ tu tʼaboʼob kʼaʼakʼ. Le táan u kʼíichoʼoboʼ, utúul x-meyajeʼ tu yilaj Pedroeʼ ka tiaʼalaj: Le máakaʼ u yéet máan xan Jesús.

Pedroeʼ tu núukaj: ¡Maʼ jaajiʼ!

Le máakoʼobaʼ óoxtéen tu yaʼaloʼob tiʼ Pedro u yéet máan kaʼach Jesús. Baʼaleʼ Pedroeʼ tiaʼalaj maʼ jaajiʼ. Tu óoxtéen ka tu núukaj Pedroeʼ, tu sutuba Jesús paktik. Pedro túuneʼ jach yajchaj tu yóol úuchik u tuuseʼ, ka bineʼ ka joʼopʼ u yokʼol.

Tu jaʼatskabil vierneseʼ, le j-kʼiinoʼoboʼ tu bisoʼob Jesús teʼ Sanedrinoʼ, u kúuchilil tuʼux ku muchʼkubaʼob. Teʼ túunaʼ tiʼ tu chʼaʼatʼantoʼob baʼax ken u beetoʼob tiʼ Jesusiʼ. Ka túun tu bisoʼob tu táan Poncio Pilato, u jalaʼachil Judea.

Letioʼobeʼ tiaʼaloʼob tiʼ Pilato: Le máakaʼ ku sen beetik baʼaloʼob kʼaastak, kʼaʼabéet u kíimsaʼal. Pilatoeʼ ka tsʼoʼok u kʼáatik u chiʼ Jesuseʼ tiaʼalaj: Teneʼ mix baʼal kʼaas kin wilik u beetmaj. Pilato túuneʼ tiaʼalaj ka bisaʼak Jesús tu táan Herodes Antipas, u jalaʼachil Galilea, baʼaleʼ tiaʼan kaʼach Jerusaleneʼ. Letiʼeʼ tu yilaj xan mix baʼal kʼaas u beetmaj Jesús, ka tiaʼalaj ka bisaʼak tu kaʼatéen yiknal Pilato.

Pilatoeʼ u kʼáat kaʼach u jáalkʼabt Jesús. Baʼaleʼ le máaxoʼob pʼekmil Jesusoʼ u kʼáatoʼob ka chaʼabak Barrabás, utúul j-ookol. Óoliʼ chúumuk kʼiin túuneʼ Pilatoeʼ tu jóoʼsaj Jesús tu táan le kaajoʼ, ka tiaʼalaj: ¡Ileʼex! ¡A reyeʼex! U nuuktakil le j-kʼiinoʼoboʼ tiaʼaloʼob: ¡Jóoʼsej! ¡Ka kíimse! Ka tsʼoʼok túuneʼ, jáalkʼabtaʼab Barrabás, Jesuseʼ bisaʼab kíimsbil.

Táan u káajal u chíinil kʼiin tiʼ upʼéel viernes ka bajaʼab Jesús tiʼ upʼéel cheʼ. Teʼ dibujoaʼ maʼ chíikaʼaniʼ, baʼaleʼ tu x-noʼoj yéetel tu x-tsʼíikeʼ, chʼuykíintaʼab xan kaʼatúul kʼasaʼan máakoʼobiʼ. Le taʼaytak u kíimil Jesusoʼ, utúul tiʼe kʼasaʼan máakoʼoboʼ, tiaʼalaj: Kʼaʼajsen ken okokech ta reino. Jesuseʼ tu núukaj: Tu jaajil kin waʼaliktech yaan a wantal tin wéetel teʼ Paraísooʼ.

¡Jach jatsʼuts baʼax aʼalaʼabtiʼ! ¿Máasaʼ? ¿Tuʼux kun yantal le paraíso tiaʼalaj Jesusoʼ? Tu káajbaleʼ, ¿tuʼux tu beetaj Dios le paraísooʼ? Teʼ Luʼumaʼ. Ken sutaʼak le luʼum paraísoi tumen Jesusoʼ, yaan u kaʼa kuxkíintik le máakaʼ. ¿Máasaʼ jach jatsʼuts le baʼax tu yaʼalajaʼ?