XOOK 25

¿Bix jeʼel u xuʼulul in masturbarkinbaeʼ?

«Káaj in masturbarkinba le yaanten ocho añosoʼ. Ka máan kʼiineʼ tin kaneʼ Dioseʼ jach u pʼeek le baʼax kin beetkoʼ, le oʼolal cada ken in kaʼa masturbartinbaeʼ jach ku yaatal in wóol. Kin tuklik kaʼacheʼ Dioseʼ mix bikʼin ken u yaabilten» (Luis).

TEʼ KʼIINOʼOB táan u xuʼulul u beetik u paalil máakoʼ ku káajal u jach tsʼíiboltik u yantaltiʼ relaciones sexuales. Le oʼolal yaʼab táankelem paalaleʼ ku masturbarkubaʼob. * Maʼ xaaneʼ yaan máax jeʼel u yaʼaliktecheʼ le baʼax ka beetkoʼ maʼ jach kʼaasiʼ tumen mix máak ka perjudicartik. Chéen baʼaleʼ yaan baʼax oʼolal maʼ unaj a masturbarkabaiʼ. Ilawil le consejo tu tsʼáaj apóstol Pablooʼ: «Kíimseʼex le tsʼíibolal yaan tiʼ u xéexetʼal a luʼumkabil wíinklileʼexoʼ, jeʼex [...] u tsʼíibolalil u núupchital [máakoʼ]» (Colosenses 3:5). U jaajileʼ kéen u masturbarkuba máakeʼ maʼ táan u kíimsik wa u xuʼulsik u tsʼíibolal u yantaltiʼ relaciones sexualesiʼ, baʼaxeʼ chéen ku maas tsʼíiboltik. Koʼox ilik uláakʼ problemas ku taasik:

● Ku beetik u tuukul máak chéen tu yoʼolal yéetel u beetik chéen le baʼax ku tsʼíiboltikoʼ.

● Ku xuʼulul u respetartik máak u maasil tumen ku tuklikeʼ u biilal máakeʼ chéen utiaʼal ka yanaktiʼ relaciones sexuales.

● Ku xuʼulul u kaxtik máak u yutsil u yíicham wa u yatan le kéen yanaktiʼob relaciones sexualesoʼ.

Yoʼolal tuláakal le problemas ku taasik u masturbarkuba máakoʼ maas maʼalob ka u kan u controlart u tsʼíibolal u yantaltiʼ relaciones sexuales (1 Tesalonicenses 4:​4, 5). ¿Bix túun jeʼel u páajtal a controlarkabaeʼ? Le Bibliaoʼ ku yaʼalikeʼ unaj a kanáantik maʼ a beetik baʼaloʼob jeʼel u yajsik tiʼ teech le tsʼíibolaloʼ (Proverbios 5:​8, 9). Chéen baʼaleʼ, ¿kux túun wa tsʼoʼok u suuktal a masturbarkabaeʼ? Maʼ xaaneʼ tsʼoʼok u taaktal a pʼatik, chéen baʼaleʼ maʼ páajchajkechiʼ. U jaajileʼ chéen chʼaʼabil jeʼel u tuklik máak maʼ kun páajtal u pʼatik le viciooʼ yéetel u tuklik mix bikʼin kun páajtal u kuxtal jeʼex u yaʼalik Dioseʼ. Bey u tuklik kaʼach juntúul xiʼipal ku kʼaabaʼtik Pedro, letiʼeʼ ku yaʼalik: «Le kéen in masturbartinba tu kaʼatéeneʼ jach maʼ maʼalob in wuʼuyikinbaiʼ, kin tuklikeʼ mix baʼal jeʼel u páajtal u yutskíintik le baʼax tsʼoʼok in beetkoʼ. Hasta maʼ tu páajtal kaʼach in orar».

Wa bey xan a wuʼuyikabaoʼ maʼ u lúubul a wóol. Maʼ a tuklik wa tsʼoʼoktech beyoʼ. Yaan táankelem paalaloʼob yéetel nojoch máakoʼobeʼ tsʼoʼok u xuʼulul u masturbarkubaʼob. Wa letiʼob páajchaj u beetkoʼobeʼ, ¡teech xaneʼ jeʼel a páajtaleʼ!

Maʼ a tuklik wa tsʼoʼoktech beyoʼ

Jeʼex tsʼoʼok k-ilkoʼ le máaxoʼob ku masturbarkubaʼoboʼ jach ku yaatal u yóoloʼob yoʼolal le baʼax ku beetkoʼoboʼ. Le Bibliaoʼ ku yaʼalik tiʼ 2 Corintios 7:​11, unaj u «yaatal [u yóol máak] jeʼex uts tu tʼaan Dioseʼ». U jaajileʼ maʼ kʼaas u yuʼubikuba máak beyoʼ tumen jeʼel u yáantaj utiaʼal ka xuʼuluk u masturbarkubaeʼ. Chéen baʼaleʼ wa ku píitmáan u yaatal u yóol máakeʼ jeʼel tak u tuklik tsʼoʼoktiʼ beyoʼ (Proverbios 24:10).

¿Jach wa túun kʼaas u masturbarkuba máak? U jaajileʼ kʼaas tumen ku esclavizartik máak, tsʼoʼoleʼ ku kʼaskúuntik bix u tuukul (Tito 3:3). Chéen baʼaleʼ maʼ igual yéetel u lúubul máak tiʼ núupkʼebaniʼ (Judas 7). Le oʼolaleʼ maʼ a tuklik wa ikil a masturbarkabaeʼ mix bikʼin kan perdonarbil. Tsʼáa a wóol a beet baʼax maʼalob yéetel kan a controlart baʼaxoʼob ka tsʼíiboltik.

Chéen baʼaleʼ wa kex táan a wilik a pʼatik le vicio ka kaʼa lúubuloʼ kʼaʼajaktech baʼax ku yaʼalik Proverbios 24:16: «Tumen juntúul utsul máakeʼ jeʼel u lúubul siete u téeneleʼ, pero yaan u kaʼa líikʼil, pero le kʼasaʼan máakoʼoboʼ yaan u tʼóochpajloʼob kéen taalak yaayaj kʼiinoʼob». Wa yaan kʼiin ka kaʼa lúubul tiʼ le viciooʼ maʼ a tuklik wa jach junpuliʼ tsʼoʼoktech beyoʼ. Baʼaxeʼ tukult baʼax beet a lúubul yéetel baʼax jeʼel u páajtal a beetik utiaʼal maʼ u kaʼa úuchultech beyoʼ.

Tuukulnen xan tiʼ bix u chʼaʼiktoʼon óotsilil Jéeoba yéetel bix u yeʼesiktoʼon yaabilaj. Rey Davideʼ u yojel kaʼach bix u yuʼubikuba máak ikil u lúubul tiʼ baʼax kʼaas. Ilawil baʼax tu tsʼíibtaj: «Jeʼex juntúul taatatsil ku chʼaʼik óotsilil tiʼ u paalaleʼ, Jéeobaeʼ tsʼoʼok u chʼaʼik óotsilil xan tiʼ le máaxoʼob adorarkoʼ. Letiʼeʼ u yojel bix u beetmiloʼon, ku kʼaʼajaltiʼ chéen luʼumoʼon» (Salmo 103:13, 14). Jéeobaeʼ u yojel kʼeban wíinikoʼon, le oʼolaleʼ listo «utiaʼal perdonar» (Salmo 86:5). Chéen baʼaleʼ u kʼáat ka k-tsʼáa k-óol k-pʼat le baʼax kʼaas k-beetkoʼ. Koʼox ilik jujunpʼéel baʼaloʼob jeʼel u yáantkecheʼ.

Ilawil baʼax yéetel ka náaysik a wóol. ¿Ka chaʼantik wa películaʼob yéetel programaʼob ku beetkoʼob u taaktal u yantaltech relaciones sexuales? ¿Ka kaxtik wa baʼaloʼob teʼ Internet ku yajsikoʼob a tsʼíibolaloʼ? Ilawil baʼax tu kʼáataj juntúul tiʼ le máaxoʼob tsʼíibt le Salmosoʼ: «Maʼ a chaʼik u chʼíikil in paakat tiʼ baʼaloʼob mix baʼal u biilal» (Salmo 119:37). *

Tuukulnen tiʼ uláakʼ baʼal. Beet jeʼex juntúul sukuʼun ku kʼaabaʼtik William, letiʼeʼ ku yaʼalik: «Antes tiʼ a bin weenleʼ xok le Bibliaoʼ beyoʼ le u tsʼook baʼax ken a tukult teʼ kʼiinoʼ yaan yil yéetel Dios bey xan yéetel le Bibliaoʼ» (Filipenses 4:8).

Tsikbalt tiʼ wa máax. Kex jach suʼlakecheʼ tsikbalt tiʼ wa máax le baʼax ku yúuchultechoʼ, leloʼ jach jeʼel u yáantkech a pʼat le viciooʼ. Bey tu beetil juntúul xiʼipal ku kʼaabaʼtik Davidoʼ, letiʼeʼ ku yaʼalik: «Tin chʼaʼtuklaj in tsikbaltik tiʼ in taata. Mix bikʼin ken in tuʼubs baʼax tu yaʼalaj. Ka tu yilaj maʼ chéen chʼaʼabil úuchik in tsikbaltiktiʼeʼ samcheʼejnajeʼ ka tu yaʼalajten: ‹Jach kiʼimak in wóol úuchik a tsikbaltikten›. Leloʼ jach tu beetaj u líikʼil in wóol ka tin chʼaʼtuklaj u xuʼulul in masturbarkinba.

Tu xokajten jujunpʼéel tekstoʼob utiaʼal maʼ u lúubul in wóol, chéen baʼaleʼ tu xokajten xan jujunpʼéel tekstoʼob ku yeʼesik maʼ maʼalob le baʼax kin beetkoʼ. Le ka tsʼoʼokeʼ tu yaʼalajten ka in wil maʼ in masturbarkinba tu kaʼatéen yéetel ka tsikbalnakoʼon tuláakʼ kʼiin. Tsʼoʼoleʼ tu yaʼalajteneʼ kex ka lúubken tiʼ le viciooʼ maʼ unaj u xuʼulul in tsʼáaik in wóol utiaʼal in xulik». ¿Baʼax utsil túun tu kʼamaj David? Letiʼeʼ ku yaʼalik: «Úuchik in tsikbaltik tiʼ wa máax le baʼax ku yúuchultenoʼ jach tu yáanten». *

TEʼ XOOK KU SEGUEROʼ

¿Jach wa tu jaajil maʼ kʼaas u yantal relaciones sexuales tiʼ máak yéetel jeʼel máaxakeʼ?

[Notas]

TEKSTO JEʼEL U YÁANTAJE

«Náachkuntaba tiʼ le tsʼíibolaloʼob ku taasik le táankelmiloʼ. Xeen tu paach le justiciaoʼ, le fejoʼ, le yaabilajoʼ yéetel le jeetsʼeliloʼ, xeen junmúuchʼ yéetel le máaxoʼob maʼ kʼaschajaʼan u puksiʼikʼaloʼob ku chʼaʼchiʼitkoʼob u kʼaabaʼ Yuumtsiloʼ» (2 Timoteo 2:​22).

BEET LELAʼ

Antes a jach tsʼíiboltik a masturbarkabaeʼ kʼáat u yáantaj Jéeoba. Aʼaltiʼ ka u tsʼáatech «le páajtalil ku píitmáan tiʼ u muukʼ wíinikoʼ» utiaʼal maʼ a lúubul tiʼ le kʼebanoʼ (2 Corintios 4:7).

¿A WOJEL WA

Chéen chʼaʼabil jeʼel u lúubul máak tiʼ le baʼaxoʼob ku tsʼíiboltikoʼ. Chéen baʼaleʼ juntúul máax kʼanchajaʼan u tuukuleʼ yaan u yilik u controlarkuba, maases wa maʼ tu yilaʼal baʼax ku beetik.

LETIʼE BAʼAXOʼOB KEN IN BEETAʼ

¿Baʼax jeʼel in beetik utiaʼal in tuukul tiʼ baʼaloʼob maʼalobtakeʼ? ․․․․․

Wa kin wuʼuyik taak in masturbarkinbaeʼ, ¿baʼax jeʼel in beetik utiaʼal maʼ in lúubul tiʼ le kʼebanoʼ? ․․․․․

¿Bey baʼax jeʼel in kʼáatik tiʼ in taataʼob yoʼolal le masturbacióno’? ․․․․․

¿TECHEʼ BAʼAX KA TUKLIK?

● ¿Baʼaxten kʼaʼabéet k-kʼaʼajsikeʼ Jéeobaeʼ listo «utiaʼal perdonar»? (Salmo 86:5).

● Jéeobaeʼ u beetmaj wíinik yéetel u páajtalil u tsʼíiboltik u yantal relaciones sexuales tiʼ. Chéen baʼaleʼ wa ku yaʼalik unaj u controlartik máak le tsʼíibolal jeʼeloʼ, ¿máasaʼ ku yaʼalik tumen u yojel jeʼel u páajtal k-controlarkeʼ?

[Uláakʼ baʼax ku tsoʼolol]

«Desde ka xuʼul in masturbarkinbaeʼ maʼ chiʼichnak in wuʼuyik in concienciaiʼ. ¡Leloʼ maʼ tu páajtal in ketik yéetel mix baʼal!» (Sara)

[Oochel]

Jeʼex u yúuchul yéetel junpʼéel carreraeʼ wa ka lúubuleʼ ka kaʼa líikʼil utiaʼal u seguer a wáalkab, wa a kʼáat xan a xulik a masturbarkabaeʼ maʼ unaj u xuʼulul a tsʼáaik a wóol utiaʼal a pʼatik le viciooʼ