XOOK 8

¿Bix juntúul maʼalob amigo?

Brittanyeʼ ku yaʼalik: «Wa kʼuuxilnajaʼaneneʼ kʼaʼabéet in waʼalik tiʼ wa máax baʼax ku yúuchulten. Wa tristeʼeneʼ kʼaʼabéet u líiʼsaʼal in wóol yéetel wa kiʼimak in wóoleʼ kʼaʼabéet xan in tsikbaltik tiʼ wa máax baʼaxten kiʼimak in wóol. Teneʼ kin wuʼuyikeʼ jach kʼaʼabéet in amigoʼob»

YAAN máaxoʼob aʼalikeʼ le mejen paalaloʼoboʼ kʼaʼabéet u yéet báaxaloʼob, pero le táankelmoʼoboʼ kʼaʼabéet u amigoʼob. ¿Baʼax u jelaʼanil le kaʼapʼéel baʼaloʼobaʼ?

Juntúul u yéet báaxal maakeʼ chéen tiaʼan teʼ súutuk táan u yúuchul báaxaloʼ.

Juntúul amigoeʼ maʼ chéen tiaʼan ta wéeteleʼ, baʼaxeʼ ku yáantkech.

Le Bibliaoʼ ku yaʼalikeʼ «juntúul jach maʼalob amigoeʼ ku yeʼesik yaabilaj tiʼ tuláakal súutukil, tu kʼiinil táan u muʼyaj máakeʼ letiʼeʼ bey juntúul sukuʼuneʼ» (Proverbios 17:17). Jeʼex k-ilkoʼ juntúul amigoeʼ tiaʼan t-iknal utiaʼal u yáantkoʼoneʼ maʼ chéen juntúul k-éet báaxaliʼ.

U jaajileʼ jeʼex u bin a nojochtaleʼ yaan u kʼaʼabéettaltech amigoʼob…

1) ... jatsʼuts u modosoʼob.

2) ... ku tsʼáaik ichil u kuxtaloʼob baʼax ku yaʼalik le Bibliaoʼ.

3) ... jeʼel u yáantkechoʼob a beet baʼax maʼalobeʼ.

Beoraaʼ tukle: ¿Bey wa le amigoʼob yaantenoʼ? Koʼox ilik cada junpʼéel tiʼ le baʼaxoʼob ku páaʼtaʼal tiʼ juntúul amigooʼ.

Yáax baʼax ku páaʼtaʼal: Jatsʼuts u modos

Baʼax kʼaʼabéet a wojéeltik. Yaʼab máak jeʼel u yaʼalik a amigoeʼ, pero maʼ tuláakal máak ken u yeʼes wa jach tu jaajil a amigoiʼ. Le Bibliaoʼ ku yaʼalikeʼ «yaan máaxoʼob jeʼel tak u beetkoʼob loob tiʼ u amigoʼobeʼ, pero yaan juntúul amigo maas nojoch u yaabilaj ke jach u sukuʼun máak» (Proverbios 18:24). Maʼ xaaneʼ maʼ úuchuktech la baʼaloʼobaʼ, pero tukult lelaʼ: ¿Tsʼoʼok wa u yantaltech juntúul «amigo» ku yaʼaliktech baʼal ta paach yéetel ku yaʼalik baʼaloʼob maʼ jaajtak ta woʼolaliʼ? Le baʼaloʼobaʼ, ¿máasaʼ jeʼel u beetik u xuʼulul a biskaba tu yéeteleʼ? * Kʼaʼajaktecheʼ le baʼax maas importanteoʼ letiʼe ka yanaktech maʼalob amigoʼoboʼ maʼ letiʼe bukaʼaj amigoʼob yaantechoʼ.

Baʼax jeʼel a beetkeʼ. Yanaktech amigoʼob jatsʼuts u modosoʼob.

«Tuláakal máak ku tʼaan maʼalob yoʼolal Fiona. Teneʼ in kʼáat xan ka tʼaanak le máakoʼob tin woʼolal beyoʼ. Jach táaj jatsʼuts in wilik u modos» (Yvette, 17 años).

Beet lelaʼ:

1. Xok Gálatas 5:​22, 23.

2. Tukle: «¿In amigoʼobeʼ yaantiʼob wa le modos ku taal tiʼ ‹le espíritu santooʼ›?».

3. Tsʼíibt u kʼaabaʼ máax jach a amigoʼob. Tu tséel u kʼaabaʼobeʼ ka tsʼíibtik máakalmáak le modos maas ku yeʼeskoʼoboʼ.

U kʼaabaʼ

․․․․․

U modos

․․․․․

Baʼax jeʼel u yáantkecheʼ: Wa ka wilik maʼ jach jatsʼuts u modos a amigoʼobeʼ maʼ xaaneʼ yaan u kʼaʼabéettal a kaxtik yaanal amigoʼob.

U kaʼapʼéel baʼax ku páaʼtaʼal: Ka u beet baʼaloʼob maʼalobtak

Baʼax kʼaʼabéet a wojéeltik. Wa jach ka desesperar tumen a kʼáat ka yanak a amigoʼobeʼ maʼ xaaneʼ maʼ ken a yéeyoʼob tubeel. Kʼaʼajaktech le baʼax ku yaʼalik le Bibliaoʼ: «Le máax ku biskuba yéetel le j-maʼ naʼatoʼoboʼ yaan u bin kʼaasil tiʼ» (Proverbios 13:20). Le tʼaan «j-maʼ naʼatoʼoboʼ» ku yaʼalik le tekstooʼ maʼ táan u tʼaan tiʼ le paalaloʼob maʼ tu jóoʼskoʼob maʼalob calificación teʼ escuelaoʼ wa tiʼ le máaxoʼob minaʼan u naʼatoʼoboʼ, baʼaxeʼ táan u tʼaan tiʼ le máaxoʼob jach tercoʼoboʼ yéetel ku beetkoʼob baʼaloʼob chéen minaʼan u cuentailoʼ. ¿Máasaʼ maʼ a kʼáat ka yanaktech amigoʼob beyoʼ?

Baʼax jeʼel a beetkeʼ. Yéey tubeel a amigoʼob maʼ a biskaba yéetel jeʼel máaxakeʼ (Salmo 26:4). Leloʼ maʼ u kʼáat u yaʼal wa chéen yéetel junpʼíit máakoʼob ken a bisabaiʼ, baʼaxeʼ kʼaʼabéet a kʼaj óoltik «u jelaʼanil juntúul máak meyajtik Dios tiʼ juntúul máak maʼatech u beetik» (Malaquías 3:​18).

«Jach kiʼimak in wóol tumen in papáʼobeʼ tu yáantenoʼob utiaʼal in kaxtik maʼalob amigoʼob. Beoraeʼ in amigoʼobeʼ igual u edadoʼob tin wéetel yéetel espiritualoʼob» (Christopher, 13 años).

Núuk le preguntaʼobaʼ:

¿Saajkech wa ka u sen aʼalobtech a amigoʼob ka a beet junpʼéel baʼal maʼ maʼalobiʼ?

□ Jaaj

□ Maʼ

¿Maʼ a kʼáat ka kʼaj óoltaʼakoʼob tumen a papáʼob tumen a wojel yaan u yaʼalikoʼobtech maʼ u seguer a biskaba tu yéeteloʼobiʼ?

□ Jaaj

□ Maʼ

Baʼax jeʼel u yáantkecheʼ: Wa yaan a amigoʼob maʼ tu jach beetkoʼob baʼaloʼob maʼalobtakeʼ maʼ xaaneʼ yaan u kʼaʼabéettal a kaxtik amigoʼob jach u kʼubmaj u yóol u meyajtoʼob Jéeoba.

U yóoxpʼéel baʼax ku páaʼtaʼal: Ka u yáantech a beet baʼax maʼalob

Baʼax kʼaʼabéet a wojéeltik. Le Bibliaoʼ ku yaʼalik: «Maʼ a tuskabaʼex. U biskuba máak yéetel máaxoʼob kʼasaʼanoʼobeʼ ku kʼaskúuntik u maʼalob modos máak» (1 Corintios 15:33). Bey úuchik tiʼ Laurenoʼ letiʼeʼ ku yaʼalik: «In kʼáat kaʼach ka u bisuba tin wéetel le u maasil x-chʼúupalaloʼoboʼ, pero utiaʼal leloʼ kʼaʼabéet in beetik kaʼach le baʼax ku yaʼalikoʼobtenoʼ. Como chéen tin juunal in wuʼuyikinbaeʼ káaj in beetik le baʼax ku yaʼalikoʼoboʼ utiaʼal u biskubaʼob tin wéetel». Wa ka chaʼik u controlartaʼal tumen u maasil le baʼax ka beetkoʼ yaan a pʼáatal bey jeʼex junpʼéel títere ku suʼusutaʼal tumen u maasileʼ. ¿Bey wa a kʼáat ka úuchuktechoʼ?

Baʼax jeʼel a beetkeʼ. Maʼ u seguer a biskaba yéetel le máaxoʼob taak u kʼexkoʼob bix a modosoʼ bey xan le baʼaxoʼob ka beetkoʼ. Maʼ xaaneʼ yaan u pʼáatal maʼ yaʼab amigoʼob yaantechiʼ, pero maas maʼalob ken a wuʼuyilaba. Tsʼoʼoleʼ yaan u páajtal a kaxtik amigoʼob jeʼel u yáantkechoʼob a beet baʼax maʼalobeʼ (Romanos 12:2).

«Jach in amigo Clint. Letiʼeʼ kʼanchajaʼan u tuukul yéetel ku naʼatik bix in wuʼuyikinba, tsʼoʼoleʼ mantatsʼ táan u líiʼsik in wóol (Jason, 21 años).

Núuk le preguntaʼobaʼ:

¿Ku joʼopʼol wa a kʼexik bix a vestirkaba, a tʼaan yéetel baʼaxoʼob ka beetik chéen utiaʼal a kiʼimakkúuntik u yóol a amigoʼob?

□ Jaaj

□ Maʼ

Tu yoʼolal a amigoʼobeʼ, ¿ku joʼopʼol wa a bin tiʼ lugaroʼob a wojel maʼ unaj a biniʼ?

□ Jaaj

□ Maʼ

Baʼax jeʼel u yáantkecheʼ: Wa ta núukaj «jaaj» tiʼ le preguntaʼob tsʼoʼok k-beetkoʼ kʼáat áantaj tiʼ a papáʼob wa tiʼ máaxoʼob kʼanchajaʼan u tuukuloʼob. Letiʼobeʼ yaan u yáantkechoʼob a yéey amigoʼob jeʼel u yáantkechoʼob a beet baʼax maʼalobeʼ. Wa u testigoʼech Jéeobaeʼ kʼáat áantaj tiʼ juntúul tiʼ le ancianoʼob teʼ múuchʼuliloʼ.

UTIAʼAL A WOJÉELTIK U MAASILEʼ ILAWIL LE LIBRO ICH ESPAÑOL, LO QUE LOS JÓVENES PREGUNTAN. RESPUESTAS PRÁCTICAS (VOLUMEN 2) CAPÍTULO 9

TEʼ XOOK KU SEGUEROʼ

¿Yaan wa kʼiin tsʼoʼok a tsʼaʼabal a prueba wa tsʼoʼok a wuʼuyik taak a beetik baʼaloʼob maʼ maʼalobtakiʼ?

[Nota]

TEKSTO JEʼEL U YÁANTAJE

«Yaan juntúul amigo maas nojoch u yaabilaj ke jach u sukuʼun máak» (Proverbios 18:24).

BEET LELAʼ

Wa ka tsʼáaik a wóol a beet baʼax maʼalobeʼ le máaxoʼob ku kuxtaloʼob xan beyoʼ yaan u taaktal u biskubaʼob ta wéetel. ¡Jach maʼalob ka a kaxt amigoʼob beyoʼ!

¿A WOJEL WA?

Dioseʼ maʼatech u yéeyik tiʼ máax ken u yeʼes u yutsil, pero ku yéeyik máax yéetel ken u bisuba (Salmo 15:​1-5).

¡LETIʼE BAʼAXOʼOB KEN IN BEETAʼ!

¿Baʼax jeʼel in beetik utiaʼal u yantalten maʼalob amigoʼobeʼ? ․․․․․

Lelaʼ u kʼaabaʼ jujuntúul tiʼ le máaxoʼob yaan u edadoʼob taak in maas kʼaj óoltikoʼ: ․․․․․

¿Baʼax preguntail jeʼel in beetik tiʼ in papáʼob utiaʼal ka u yáantenoʼob in kaxt maʼalob amigoʼobeʼ? ․․․․․

TECHEʼ, ¿BAʼAX KA TUKLIK?

● ¿Máakalmáak le modos maas jatsʼuts yaan tiʼ a amigoʼoboʼ?

● ¿Baʼax kʼaʼabéet a beetik utiaʼal ka ilaʼakech bey juntúul maʼalob amigoeʼ?

[Uláakʼ baʼax ku tsoʼolol]

«In papáʼobeʼ tu yaʼaloʼobten ka xuʼuluk in biskinba yéetel le amigoʼob yaanten kaʼachoʼ. Chéen baʼaleʼ teneʼ kin tuklik kaʼacheʼ jach chéen yéetel letiʼob ku páajtal in biskinba maʼalob, pero tin tsʼáaj cuentaeʼ maʼalob le consejo tsʼaʼabtenoʼ tumen maas maʼalob ka in bisinba yéetel máaxoʼob jeʼel u yáantkenoʼob in beet baʼaloʼob maʼalobtakeʼ» (Carlos)

[Cuadro]

Uláakʼ baʼal jeʼel u páajtal a beetkeʼ

Tsikbalnen yéetel a papáʼob. Kʼáattiʼob bix le amigoʼob anchajtiʼob tu táankelmiloʼoboʼ. Wa tu bisubaʼob yéetel máaxoʼob maʼ unajeʼ, ¿baʼaxten tu bisubaʼob tu yéeteloʼob? Kʼáattiʼob baʼax jeʼel a beetik utiaʼal maʼ u yúuchultech beyoʼ.

Bis a amigoʼob utiaʼal u kʼaj óoltaʼaloʼob tumen a papáʼob. Wa maʼ a kʼáat ka kʼaj óoltaʼakoʼobeʼ tukult baʼaxten maʼ a kʼáat ka kʼaj óoltaʼakoʼobiʼ. ¿Yaan wa baʼax ku beetkoʼob maʼ a kʼáat ka ojéeltaʼak tumen a papáʼobiʼ? Wa beyoʼ maʼ xaaneʼ kʼaʼabéet a maas kanáantik máax yéetel ka biskaba.

Chʼenxikint baʼax ku yaʼalik a amigoʼob. Eʼes a kʼáat a wojéelt baʼax ku tuklikoʼob yéetel taak a wáantkoʼob (Filipenses 2:4).

Kan perdonar. Kʼaʼajaktecheʼ a amigoʼobeʼ maʼ perfectoʼobiʼ. Santiago 3:2, ku yaʼalikeʼ «tuláakloʼon k-tʼóochpajal yaʼab u téenel».

Chaʼa u chʼaʼik u yiikʼoʼob. Maʼ tsʼáaj u yantal a amigoʼob ta wiknal tuláakal le tiempooʼ. Wa jach tu jaajil a amigoʼobeʼ yaan u yantaloʼob ta wiknal le kéen kʼaʼabéetchajakoʼ (Eclesiastés 4:​9, 10).

[Oochel]

Wa ka chaʼik u controlartaʼal tumen u maasil le baʼax ka beetkoʼ yaan a pʼáatal bey jeʼex junpʼéel títere ku suʼusutaʼal tumen u maasileʼ