Jéeoba * Dios tsʼaamil le tsʼoʼokol beeloʼ. Le Bibliaoʼ ku yaʼalikeʼ letiʼ beet le yáax koʼoleloʼ ‹ka tu taasaj tu yiknal le máakoʼ›. Adaneʼ tumen jach kiʼimakchaj u yóoleʼ, tu yaʼalaj: «¡Lelaʼ jach tu jaajileʼ u bakʼel in bakʼel, u baakel xan in baakeloʼob!» (Génesis 2:22, 23). Jéeobaeʼ u kʼáat ka yanak kiʼimak óolal tiʼ le máaxoʼob tsʼokaʼan u beeloʼoboʼ.

Ken tsʼoʼokok u beel máakeʼ, maʼ xaaneʼ ku tuklik mix junpʼéel problema kun antaltiʼ. Baʼaleʼ kex le íichamtsil yéetel le atantsil jach u yaabiltmubaʼoboʼ yaan u yantal problemaʼob tiʼob (1 Corintios 7:28). Le folletoaʼ ku taasik maʼalob tsolxikinoʼob yaan teʼ Bibliaoʼ. Wa ka beetkeʼex baʼax ku yaʼalikeʼ yaan u yantalteʼex kiʼimak óolal (Salmo 19:8-11).

LE BIBLIAOʼ KU YAʼALIK: ‹Le íichamtsiloʼ letiʼ u poolil u familia› (Efesios 5:23).

Wa íichamtsilecheʼ, Jéeobaeʼ ku páaʼtik ka a kanáant a watan yéetel yaabilaj (1 Pedro 3:7). Letiʼeʼ tu beetaj a watan utiaʼal ka u yáantech, tsʼoʼoleʼ u kʼáat ka weʼes tsiikil tiʼ yéetel ka a yaabilte (Génesis 2:18). Le yaabilaj ka wuʼuyik tu yoʼolaloʼ unaj u péeksikech a tsʼáa táanil u yutsil (Efesios 5:25-29).

Wa atantsilecheʼ, Jéeobaeʼ ku páaʼtik ka a weʼes tsiikil tiʼ a wíicham yéetel ka a wáant u nuʼukt a familia (1 Corintios 11:3; Efesios 5:33). Áant u beet le baʼax ku chʼaʼtuklikoʼ, baʼaleʼ unaj a beetik yéetel kiʼimak óolal (Colosenses 3:18). Wa ka beetik lelaʼ, yaan u maas yaabiltikech a wíicham bey xan Jéeoba (1 Pedro 3: 1-6).

BEET LELAʼ:

• Kʼáat tiʼ a núup bix jeʼel a beetkaba juntúul maas maʼalob íichamtsil wa atantsileʼ. Chʼenxikint baʼax ku yaʼalik yéetel ilawil a beetik

• Eʼes paciencia. Yaan u chan máan tiempo ken a kan a bisabaʼex maʼalob

LE BIBLIAOʼ KU YAʼALIK: Maʼ a kaxtik chéen a wutsil, kaxt xan u yutsil a núup (Filipenses 2:3, 4). Tratart a núup bey junpʼéel baʼal koʼoj u tojoleʼ, kʼaʼajaktecheʼ Jéeobaeʼ u kʼáat ka k-eʼes ‹utsil tiʼ u maasil› (2 Timoteo 2:24). Le Bibliaoʼ ku yaʼalikeʼ «le máax chéen ku jáajan tʼaanoʼ bey táan u loʼolomik máak yéetel junpʼéel espadaeʼ, pero u yaakʼ le máax yaan u naʼatoʼ ku tsʼakik le tuʼux uchaʼan looboʼ». Le oʼolaleʼ kanáanteʼex baʼax ka waʼalikeʼex (Proverbios 12:18). U kiliʼich muukʼ Jéeobaeʼ yaan u yáantkeʼex utiaʼal ka tʼaanakeʼex yéetel yaabilaj bey xan yéetel utsil (Gálatas 5:22, 23; Colosenses 4:6).

BEET LELAʼ:

• Táanil tiʼ a tsikbaltik yéetel a núup baʼaloʼob kʼaʼanaʼantakeʼ, kʼáat tiʼ Dios ka u yáantech utiaʼal maʼ a jáan pʼuʼujul yéetel maʼ a pechkaba chéen tiʼ baʼax ka tuklik

• Tukult tubeel baʼax ken a waʼale yéetel bix ken a waʼale

LE BIBLIAOʼ KU YAʼALIK: Ken tsʼoʼokok u beel máakeʼ ku kʼuchul u beetuba juntúuliliʼ yéetel u núup (Mateo 19:5). Baʼaleʼ cada juntúul tiʼ teʼexeʼ maʼ xaaneʼ jelaʼan bix u tuukul. Le oʼolaleʼ kʼaʼabéet u pʼáatal junpʼéeliliʼ bix a tuukuleʼex (Filipenses 2:2). Lelaʼ maases kʼaʼabéet ken a chʼaʼtukleʼex baʼax ken a beeteʼex. Le Bibliaoʼ ku yaʼalik: «U múul tsikbaltaʼal junpʼéel baʼaleʼ letiʼe baʼax beetik u jóokʼol utsiloʼ» (Proverbios 20:18). Chʼaʼex en cuenta baʼax ku yaʼalik le Biblia ken a chʼaʼtukult a beetkeʼex wa baʼaxoʼ (Proverbios 8:32, 33).

BEET LELAʼ:

• Maʼ chéen unaj a tsikbal yéetel a núup tiʼ uláakʼ baʼaloʼobiʼ, aʼal xan tiʼ bix a wuʼuyikaba

• Táanil tiʼ a beetik wa baʼax compromisoileʼ tsikbalt yéetel a núup