Teʼ yáax siglooʼ, jujuntúul tiʼ le «apostoloʼob yéetel le ancianoʼob yanoʼob Jerusalenoʼ» meyajnajoʼob bey Cuerpo Gobernanteileʼ, letiʼobeʼ tʼaanajoʼob tu kʼaabaʼ le sukuʼunoʼob yéeyaʼanoʼoboʼ yéetel tu chʼaʼtukloʼob baʼaxoʼob kun beetbil teʼ múuchʼuliloʼoboʼ (Baʼaxoʼob 15:2). Utiaʼal u múuchʼ chʼaʼtuklikoʼob baʼax kun beetbileʼ, tu xakʼaltoʼob le Kiliʼich Tsʼíiboʼoboʼ yéetel tu chaʼaj u nuʼuktaʼaloʼob tumen le kiliʼich muukʼoʼ (Baʼaxoʼob 15:25). Teʼ kʼiinoʼobaʼ bey xan u beetik le Cuerpo Gobernanteoʼ.

Ku meyaj utiaʼal u beetaʼal baʼax u kʼáat Dios. Le sukuʼunoʼob yéeyaʼanoʼob ku meyajoʼob ichil le Cuerpo Gobernanteoʼ jach u yaabiltmoʼob u Tʼaan Dios, yaʼab baʼax u yojloʼob yoʼolal religión bey xan tiʼ le meyajoʼob ku beetaʼaloʼoboʼ. Ku muchʼkubaʼob cada semana utiaʼal u yilkoʼob baʼaxoʼob kʼaʼabéet tiʼ le sukuʼunoʼob tiʼ tuláakal yóokʼol kaaboʼ. Jeʼex u beetaʼal teʼ yáax siglooʼ, le nuʼuktajoʼob ku chʼaʼikoʼob teʼ Bibliaoʼ ku túuxtikoʼob tiʼ cartaʼob wa ku tsʼáaikoʼob yéetel u yáantaj le superintendente viajanteʼob wa yéetel uláakʼ sukuʼunoʼoboʼ. Lelaʼ ku yáantaj utiaʼal ka chʼaʼtuklaʼak yéetel ka beetaʼak junpʼéeliliʼ baʼax ichil u kaajal Dios (Baʼaxoʼob 16:4, 5). Letiʼob ilik xan ka yanak le kaʼansaj ku keʼetel yéetel janaloʼ, ka maas kʼaʼaytaʼak le maʼalob péektsiloʼ yéetel letiʼob ilik bix u meyaj le sukuʼunoʼob tsʼaʼanoʼob teʼ múuchʼuliloʼoboʼ.

Ku chaʼik u nuʼuktaʼal tumen u kiliʼich muukʼ Dios. Le Cuerpo Gobernanteoʼ ku kaxtik u nuʼuktaj Jéeoba, le Máax maas yaan u páajtaliloʼ, yéetel u nuʼuktaj Jesús, u Poolil le múuchʼuliloʼ (1 Corintoiloʼob 11:3; Efesoiloʼob 5:23). Letiʼobeʼ maʼatech u taaskubaʼob nojbaʼalil ichil u kaajal Dios. Jeʼex u maasil sukuʼunoʼob yéeyaʼanoʼoboʼ «ku binoʼob tu paach le Taman [wa Jesús] jeʼel tuʼuxak ka xiʼikoʼ» (Apocalipsis 14:4). Le Cuerpo Gobernanteoʼ jach kiʼimak u yóol yoʼolal le payalchiʼob k-beetik tu yoʼolaloʼoboʼ.

• ¿Máaxoʼob yanoʼob kaʼach ichil le Cuerpo Gobernante teʼ yáax siglooʼ?

• ¿Bix u kaxtik u nuʼuktaj Dios le Cuerpo Gobernante teʼ kʼiinoʼobaʼ?