Maʼ úuch tsʼoʼokok u yokjaʼeʼ, Jesúseʼ káaj u kʼaʼaytik: «U Reinoil kaʼaneʼ tsʼoʼok u náatsʼal». U discípuloʼobeʼ binoʼob kʼaʼaytaj tu yéetel tiʼ tuláakal Galilea yéetel Judea. Ka suunaj Jesús tu kaajil Nazareteʼ, bin teʼ sinagogaoʼ, tu chʼaʼaj le rollo tu tsʼíibtaj Isaíasoʼ, ka tu kʼaʼam xokaj: ‹Jéeobaeʼ tsʼoʼok u tsʼáaikten u poder utiaʼal in tsikbaltik le jatsʼuts baʼaloʼob ken u beetoʼ›. ¿Baʼax tu yóotaj u yaʼale? Le máakoʼoboʼ u kʼáat kaʼach u yiloʼob le milagroʼob ku beetik Jesúsoʼ. Chéen baʼaleʼ tiʼ letiʼeʼ maʼ tsʼaʼab espíritu santo chéen utiaʼal u beetik milagroʼobiʼ. Le baʼax maas unaj u beetkoʼ u kʼaʼaytik le baʼax ken u beet le Reinooʼ. Tu tsʼookeʼ tu yaʼalaj tiʼ le máaxoʼob chʼenxikintikoʼ: «Bejlaʼeʼ táan u béeytal le baʼax táant in xokikaʼ».

Ka tsʼoʼokeʼ Jesúseʼ bin tu Kʼáaʼnáabil Galilea. Teʼeloʼ tu yilaj kantúul u discípuloʼob ku chuk kayoʼobiʼ ka tu yaʼalajtiʼob: ‹Koʼoteneʼex tin paach ka in weʼesteʼex bix jeʼel a chukikeʼex máakoʼobeʼ›. Le j-chuk kayoʼoboʼ u kʼaabaʼobeʼ Pedro, Andrés, Santiago yéetel Juan. Letiʼobeʼ tu séebaʼanil tu pʼatoʼob u chuk kayoʼobeʼ ka binoʼob yéetel Jesús. Binoʼob tiʼ tuláakal Galilea táan u kʼaʼaytikoʼob u Reino Jéeoba. Kʼaʼaytajnajoʼob tiʼ sinagogaʼob, mercadoʼob yéetel teʼ calleʼoboʼ. Jeʼel tuʼuxak ka xiʼikoʼobeʼ yaʼab máak ku bin tu paachoʼob. Le baʼaxoʼob ku yaʼalaʼal yoʼolal Jesúsoʼ kʼuch ojéeltbil tuláakal tuʼux, tak tu náanach luʼumil Siria.

Ka máan kʼiineʼ Jesúseʼ tu tsʼáaj páajtalil tiʼ jujuntúul u discípuloʼob utiaʼal u tsʼakikoʼob kʼojaʼanoʼob yéetel utiaʼal u jóoʼskoʼob demonioʼob. Uláakʼoʼobeʼ tu láakʼintoʼob kʼaʼaytaj Jesús tiʼ nukuch kaajoʼob yéetel tiʼ kajtaliloʼob. Anchaj xan junmúuchʼ koʼoleloʼob bin tu yéetel, jeʼex María Magdalena, Juana, Susana yéetel uláakʼ koʼoleloʼob. Letiʼobeʼ tu tsʼáajoʼob baʼax kʼaʼabéet tiʼ Jesús yéetel tiʼ u discípuloʼob.

Ka tsʼoʼok u kaʼansik u discípuloʼobeʼ, tu túuxtoʼob kʼaʼaytaj. Le táan u máanoʼob Galileaoʼ yaʼab uláakʼ máaxoʼob tu beetubaʼob discípuloʼob tiʼ Jesús, ka okjaʼanajoʼob. Yaʼab máak u kʼáat kaʼach u beetuba u discípulo Jesús, le oʼolal letiʼeʼ tu ketoʼob yéetel junpʼéel kool kʼaʼabéet u séeb joʼochol. Tu yaʼalaj: «Kʼáat óolteʼex tiʼ u Yuumil le baʼax pakʼaʼan ka u túuxt u maasil máakoʼob utiaʼal le cosechaoʼ». Tsʼoʼoleʼ tu yéeyaj 70 discípuloʼobeʼ  ka tu túuxtoʼob kʼaʼaytaj kaʼakaʼatúulil tiʼ tuláakal Judea. Tu kʼaʼaytoʼob u Reino Dios tiʼ tuláakal máak. Ka suunajoʼobeʼ taakchaj u jach tsikbaltikoʼob tiʼ Jesús bix biniktiʼob. Le Kʼaasilbaʼaloʼ maʼ páajchaj u beetik mix baʼal utiaʼal u xuʼulul le kʼaʼaytajoʼ.

Jesúseʼ tu kaʼansaj tubeel u discípuloʼob utiaʼal u seguer u kʼaʼaytajoʼob kéen tsʼoʼokok u bin teʼ kaʼanoʼ. Tu yaʼalajtiʼob: ‹Kʼaʼayteʼex tiʼ tuláakal yóokʼol kaab le baʼax ken u beet le Reinooʼ. Kaʼanseʼex u Tʼaan Dios tiʼ le máakoʼoboʼ yéetel tsʼáaʼex u yokjaʼob›.