U nojchiloʼob le sacerdoteʼoboʼ tu bisoʼob Jesús tu palacio le gobernadoroʼ. Teʼeloʼ Pilatoeʼ tu kʼáatajtiʼob: «¿Baʼax oʼolal ka takikeʼex u pool le máakaʼ?». Letiʼobeʼ tu yaʼaloʼob: «[Tumen] táan u yaʼalik letiʼ le Cristooʼ, juntúul rey bin». Pilatoeʼ tu kʼáataj tiʼ Jesús: «¿Teech wa u rey le judíoʼoboʼ?». Jesúseʼ tu núukaj: «In Reinoeʼ maʼ yóokʼol kaabiliʼ».

Ka tsʼoʼokeʼ Pilatoeʼ tu túuxtaj Jesús yiknal Herodes, u gobernanteil Galilea, utiaʼal u yilik wa yaan baʼax oʼolal u takik u pool. Herodeseʼ tu yilaj mix baʼal kʼaas u beetmaj Jesús, le oʼolal tu kaʼa túuxtaj yiknal Pilato. Pilato túuneʼ tu yaʼalaj tiʼ le máakoʼoboʼ: ‹Mix Herodes, mix teen ilik wa yaan baʼax kʼaas u beetmaj. Yaan in jáalkʼabtik›. Chéen baʼaleʼ le máakoʼoboʼ joʼopʼ u yawtikoʼob: «¡Kíimse! ¡Kíimseʼ!». Le soldadoʼoboʼ tu jaʼajatsʼoʼob, tu túuboʼob yéetel tu loxoʼob Jesús. Tsʼoʼoleʼ tu tsʼáajoʼob xan tu pool junpʼéel corona beetaʼan yéetel kʼiʼixeʼ ka joʼopʼ u burlarkoʼob: «¿Bix sáaschajik tiʼ u Rey le judíoʼoboʼ?». Pilatoeʼ tu kaʼa aʼalaj tiʼ le máakoʼoboʼ: «Teneʼ maʼ tin wilik wa yaan baʼax kʼaas u beetmaj le máakaʼ». Chéen baʼaleʼ letiʼobeʼ joʼopʼ u yawtikoʼob: «¡Chʼuykíintaʼak tiʼ cheʼ!». Le oʼolal Pilatoeʼ tu kʼubaj Jesús utiaʼal ka kíimsaʼak.

Le soldadoʼoboʼ tu bisoʼob Jesús tiʼ junpʼéel lugar ku kʼaabaʼtik Gólgota. Tu bajoʼob tiʼ junpʼéel cheʼeʼ ka tu pʼatoʼob chʼuytaliʼ. Jesús túuneʼ orarnaj tiʼ Jéeoba: «In Yuum, perdonartoʼob tumen maʼ u yojloʼob baʼax ku beetkoʼobiʼ». Le máakoʼoboʼ joʼopʼ u burlarkoʼob Jesús, ka tu yaʼaloʼobtiʼ: «Wa u Paalech Dioseʼ, éemkech teʼ cheʼoʼ»

Juntúul tiʼ le kʼasaʼan máakoʼob chʼuykíintaʼan tu tséel Jesúsoʼ, tu yaʼalajtiʼ: «Kʼaʼajsen le ken ookkech ta Reino». Jesúseʼ tu yaʼalajtiʼ: «Yaan a wantal tin wéetel teʼ Paraísooʼ». Teʼ tarde jeʼeloʼ chéen ka téek éeʼjochʼeʼenchaji, lelaʼ xáanchaj tres horas. Yaan tiʼ le discípuloʼoboʼ pʼáatoʼob waʼatal náatsʼ tiʼ le cheʼ tuʼux tsʼaʼab Jesúsoʼ, teʼeloʼ tiaʼan xan María, u maama Jesúsiʼ. Letiʼeʼ tu yaʼalaj tiʼ Juan ka u kanáant María, bey jeʼex u maamaeʼ.

Tu tsʼookeʼ Jesúseʼ tu yaʼalaj: «¡Tsʼoʼok u béeychajal tuláakal!». Tu chinaj u pooleʼ ka xuʼul u chʼaʼik u yiikʼ. Teʼ súutukoʼ tu tíituba le luʼumoʼ. U cortinail le templo jatsik le Cuarto Santo tiʼ le Cuarto Maas Jach Santooʼ jóokʼ kaʼa  jaats tiʼ. Juntúul tiʼ u nojchil le soldadoʼoboʼ, tu yaʼalaj: «Jaaj bakáan, le máakaʼ u Paal Dios».