Sauloeʼ síij Tarso, junpʼéel chan kaaj yaan kaʼach tu luʼumil Roma. Letiʼeʼ juntúul fariseo jach u kʼaj óol u ley le judíoʼoboʼ yéetel u pʼekmaj le cristianoʼoboʼ. Jíiltbil u bisik kaʼach le xiiboʼob yéetel le koʼoleloʼob utiaʼal u kʼaʼalaloʼob cárceloʼ. Waʼalaj xan u chaʼant u muruxtuntaʼal discípulo Esteban tumen junmúuchʼ máakoʼob jach pʼujaʼanoʼob.

Chéen baʼaleʼ Sauloeʼ u kʼáat ka kʼaʼalak uláakʼ cristianoʼob maʼ chéen le yanoʼob Jerusalénoʼ. Tu kʼáataj tiʼ u maas nojchil le sacerdoteʼoboʼ ka túuxtaʼak u chʼaʼpacht le cristianoʼob kajaʼanoʼob Damascooʼ. Le jach taʼaytak u kʼuchul Saulo teʼ kaajoʼ juulnaj junpʼéel sáasil tu baʼpach, ka lúubi. Ka tsʼoʼokeʼ tu yuʼubaj junpʼéel tʼaan ku yaʼalik: «Saulo, ¿baʼaxten táan a chʼaʼpachtiken?». Sauloeʼ tu kʼáatajtiʼ: ‹¿Máaxechiʼ?›. Ka núukaʼabtiʼ: ‹Teen Jesús. Xeen Damasco tiʼ kun aʼalbiltech baʼax unaj a beetkiʼ›. Teʼ súutukoʼ Sauloeʼ chʼóopchaji, anchaj u maʼachal u kʼab utiaʼal u bisaʼal teʼ kaajoʼ.

Tu kaajil Damascoeʼ yaan kaʼach juntúul discípulo jach chúukaʼan u yóol ku kʼaabaʼtik Ananías. Ichil junpʼéel náayeʼ Jesúseʼ tu yaʼalajtiʼ: ‹Xeen tu yotoch Judas, teʼ bej ku kʼaabaʼtik Toj Bejoʼ ka a kaxt Saulo›. Ananíaseʼ tu yaʼalaj: ‹Yuumtsil, yaʼab baʼaloʼob tsʼoʼok in wuʼuyik u yaʼalaʼal yoʼolal le máakaʼ. Letiʼeʼ táan u beetik u kʼaʼalal a discípuloʼob›. Chéen baʼaleʼ Jesúseʼ tu yaʼalajtiʼ: ‹Xeen teʼ tuʼux yaan Saulooʼ tumen tsʼoʼok in yéeyik utiaʼal u tsikbaltik teʼ táanxel luʼumiloʼob le jatsʼuts baʼaloʼob ken u beet Diosoʼ›.

Ananíaseʼ bin yiknal Sauloeʼ ka tu yaʼalajtiʼ: ‹Saulo, in sukuʼun, Jesús túuxten utiaʼal ka suunak u sáasilil a wich›. Tu séebaʼanileʼ Sauloeʼ páajchaj u kaʼa paakat. Letiʼeʼ tu kanaj yaʼab baʼaloʼob yoʼolal Jesús yéetel tu beetuba u discípulo. Okjaʼanaji yéetel káaj u predicar teʼ sinagogaʼob yéetel uláakʼ discípuloʼoboʼ. ¡Chéen tukult bix jaʼakʼik u yóol le judíoʼoboʼ! Letiʼobeʼ tu yaʼaloʼob: ‹¿Maʼ wa letiʼe máak ku chʼaʼpachtik kaʼach u discípuloʼob Jesúsoʼ?›.

 Sauloeʼ tres años kʼaʼaytajnaj tiʼ u kajnáaliloʼob Damasco. Le judíoʼoboʼ jach u pʼekmoʼob kaʼachi yéetel tu tuklaj u kíimskoʼob. Chéen baʼaleʼ le sukuʼunoʼoboʼ tu yojéeltoʼobeʼ ka tu yáantoʼob púutsʼul. Tu tsʼáajoʼob Saulo tiʼ junpʼéel xúuxakeʼ ka tu jalkʼesoʼob tiʼ junpʼéel jool yaan tu baʼpakʼil le kaajoʼ.

Ka bin Saulo Jerusaléneʼ taakchaj u yilik le sukuʼunoʼoboʼ. Chéen baʼaleʼ letiʼobeʼ saajkoʼob kaʼach tiʼ. Bernabé, juntúul discípulo jach utseʼ, tu bisaj Saulo yiknal le apóstoloʼoboʼ ka tu tsolajtiʼob jach tu jaajil tsʼoʼok u kʼexik u kuxtal. Sauloeʼ pʼáat tu múuchʼulil Jerusaléneʼ ka káaj u kʼaʼaytik yéetel kiʼimak óolal le jatsʼuts baʼaloʼob ken u beet Diosoʼ. Ka máan kʼiineʼ kʼaj óoltaʼab bey Pabloeʼ.