Le israelitaʼoboʼ lukʼoʼob tu Montañail Sinaí, tsʼoʼoleʼ máanoʼob tu desiertoil Parán tak ka kʼuchoʼob tiʼ junpʼéel lugar ku kʼaabaʼtik Cadés. Teʼeloʼ Jéeobaeʼ tu yaʼalaj tiʼ Moisés: ‹Túuxt 12 máakoʼob, juntúul tiʼ cada tribu utiaʼal u chʼúuktikoʼob u luʼumil Canaán, le luʼum ken in tsʼáa tiʼ le israelitaʼoboʼ›. Moisés túuneʼ tu yéeyaj 12 máakoʼobeʼ ka tu yaʼalajtiʼob: ‹Xeeneʼex Canaán, ileʼex wa maʼalob le luʼum utiaʼal u yúuchul paakʼaloʼ. Ileʼex xan wa muʼukʼaʼan wa débil le máakoʼoboʼ, bey xan wa kajaʼanoʼob tiʼ najoʼob beetaʼan de nookʼ wa tiʼ nukuch kaajoʼob›. Ichil le 12 máakoʼob bin u chʼúuktoʼob u luʼumil Canaánoʼ tiaʼan Josué yéetel Calebiʼ.

Ka máan 40 díaseʼ le máakoʼob binoʼob chʼúukoʼ suunajoʼob. Tu taasoʼob higoʼob, granadaʼob yéetel uvaʼob, tsʼoʼoleʼ tu yaʼaloʼob: ‹Jach maʼalob u luʼumil Canaán. Chéen baʼaleʼ le máaxoʼob kajaʼanoʼoboʼ jach yaan u muukʼoʼob yéetel le kaajoʼoboʼ baʼpachtaʼan tumen kaʼanal pakʼoʼob›. Caleb túuneʼ tu yaʼalaj: ‹Koʼoneʼexiʼ. ¡Jeʼel k-ganarkoʼobeʼ!›. ¿A wojel wa baʼaxten tu yaʼalaj Caleb leloʼ? Tumen letiʼ yéetel Josuéeʼ confiarnajoʼob tiʼ Jéeoba. Chéen baʼaleʼ le uláakʼ 10 máakoʼob binoʼob chʼúukoʼ tu yaʼaloʼob: ‹Maʼ unaj k-bin baʼateʼel tu yéeteloʼobiʼ. Le máakoʼob teʼeloʼ jach nojoch u wíinkliloʼob, bey giganteʼobeʼ. Toʼoneʼ beyoʼon máas wa grilloʼob tu tséeloʼobeʼ›.

Le israelitaʼoboʼ lúub u yóoloʼob, káaj u tsʼíikiloʼob yéetel joʼopʼ u yaʼalikoʼob: ‹Koʼoneʼex yéeyik juntúul máax nuʼuktikoʼon utiaʼal k-suuteʼex Egipto. ¿Baʼax tiaʼal k-bin Canaán wa chéen yaan k-kíimsaʼaliʼ?›. Josué yéetel Calebeʼ tu yaʼaloʼob: ‹Maas maʼalob ka k-uʼuy u tʼaan Jéeoba. Letiʼeʼ yaan u  kanáantkoʼon. Maʼ a chʼaʼikeʼex saajkil›. Chéen baʼaleʼ le israelitaʼoboʼ maʼ tu beetoʼob u cuentail le baʼax tu yaʼalaj Josué yéetel Caleboʼ, hasta taakchaj u kíimskoʼob.

¿Baʼax túun tu beetaj Jéeoba? Letiʼeʼ tu yaʼalaj tiʼ Moisés: ‹Teneʼ yaʼab baʼaloʼob maʼalobtak tsʼoʼok in beetik yoʼolal le israelitaʼoboʼ, chéen baʼaleʼ letiʼobeʼ láayliʼ maʼ tu yuʼubikoʼob in tʼaaneʼ. Le oʼolal yaan in pʼatkoʼob 40 años teʼ desiertoaʼ hasta ken kíimkoʼob. Chéen u paalaloʼob, bey xan Josué yéetel Caleb yaan u kajtaloʼob teʼ luʼum tin waʼalaj in tsʼáaik tiʼ le israelitaʼoboʼ›.