Jeosafateʼ juntúul rey anchaj tu luʼumil Judá, letiʼeʼ tu xuʼulsaj le altaroʼob tuʼux ku adorartaʼal le dios Baaloʼ bey xan le beetbil diosoʼob yaan teʼ luʼum tuʼux kajaʼanoʼ. Jeosafat kaʼacheʼ u kʼáat ka kʼaj óoltaʼak u leyoʼob Jéeoba tumen le máakoʼoboʼ. Le oʼolal tu túuxtaj príncipeʼob yéetel levitaʼob tiʼ tuláakal u luʼumil Judá utiaʼal u kaʼanskoʼob u leyoʼob Jéeoba.

Le kaajoʼob yanoʼob tu baʼpachoʼ saajkoʼob kaʼach u binoʼob baʼateʼel tu contra u kajnáaliloʼob Judá tumen u yojloʼob Jéeobaeʼ ku yáantik u kaajal. Ku biskoʼob tak baʼaloʼob u síiʼob tiʼ le rey Jeosafatoʼ. Chéen baʼaleʼ u kajnáaliloʼob Ammón, Moab yéetel le kaajoʼob yanoʼob tu luʼumil Seíroʼ binoʼob baʼateʼel tu contra Judá. Jeosafateʼ u yojel kʼaʼabéet u kaxtik u yáantaj Jéeoba. Le oʼolal tu muchʼkíintaj tu kaajil Jerusalén tuláakal le xiiboʼob, koʼoleloʼob yéetel paalaloʼoboʼ. Tu táanoʼobeʼ orarnaj beyaʼ: ‹Jéeoba, kʼaʼabéettoʼon a wáantaj utiaʼal k-ganartik le baʼatelaʼ. Beet uts a waʼaliktoʼon baʼax unaj k-beetik›.

Jéeobaeʼ tu yuʼubaj u oracióneʼ ka tu yaʼalajtiʼ: ‹Maʼ a chʼaʼikeʼex saajkil, yaan in wáantkeʼex. Xeeneʼex teʼ tuʼux kun úuchul le baʼateloʼ, maʼ a péekeʼex, ilawileʼex bix ken in salvartileʼex›. ¿Bix kun salvarbiloʼob tumen Jéeoba?

Ka sáaschajeʼ Jeosafateʼ tu yéeyaj máaxoʼob ku kʼaayoʼob yéetel tu yaʼalajtiʼob ka xiʼikoʼob táanil tiʼ le soldadoʼoboʼ. Letiʼobeʼ jóokʼoʼob desde tu kaajil Jerusalén, ka binoʼob Tekoaj, le tuʼux kun antal le baʼateloʼ.

Le máaxoʼob ku kʼaayoʼoboʼ jach kiʼimak u yóoloʼob le táan u kʼaʼamkach kʼaayoʼob utiaʼal u alabarkoʼob Jéeobaoʼ. Le táan u beetkoʼoboʼ Jéeobaeʼ táan kaʼach u baʼateʼel yoʼolal u kaajal. Tu xaʼakʼbesaj u tuukul le ammonitaʼob yéetel le moabitaʼoboʼ, ka joʼopʼ u paklan baʼateloʼob, bey úuchik u láaj kíimloʼoboʼ. Chéen baʼaleʼ Jéeobaeʼ tu kanáantaj u kajnáaliloʼob Judá, le soldadoʼob yéetel le sacerdoteʼoboʼ. Tuláakal le kaajoʼob yanoʼob tu baʼpach Judáoʼ tu yojéeltoʼob le baʼax tu beetaj Jéeobaoʼ. Letiʼobeʼ tu tsʼáajoʼob cuentaeʼ Jéeobaeʼ táan u seguer u kanáantik u kaajal tiʼ le máaxoʼob pʼekmiloʼ. ¿Bix u kanáantik Jéeoba u kaajal? Jejeláas bix u beetik. Maʼ kʼaʼabéet u yáantaj wíinik tiʼiʼ.