Josíaseʼ káaj u reinar tu luʼumil Judá le yaan ocho años tiʼoʼ. Teʼ kʼiinoʼob jeʼeloʼ le máakoʼoboʼ suuk kaʼach u meyajtiʼob magia yéetel ku adorarkoʼob beetbil diosoʼob. Le yaan 16 años tiʼoʼ, Josíaseʼ taakchaj u adorartik Jéeoba jeʼex unaj u beetaʼaloʼ. Ka tu tsʼáaj 20 años tiʼeʼ, káaj u xuʼulsik le beetbil diosoʼob yéetel le altaroʼob yanoʼob tiʼ tuláakal u luʼumil Judáoʼ. Tsʼoʼoleʼ ka tu tsʼáaj 26 años tiʼeʼ, joʼopʼ u yilik bix jeʼel u yutskíintik u templo Jéeobaeʼ.

Ilquías, u nojchil le sacerdoteʼoboʼ, tu kaxtaj teʼ templo u rolloil u Ley Diosoʼ. Maʼ xaaneʼ letiʼe rollo tu tsʼíibtaj Moisésoʼ. Safán, u secretario le reyoʼ, tu bisaj tiʼ Josías le rollooʼ ka joʼopʼ u kʼaʼam xokik u yuʼube. Ka tu yuʼubaj Josías le baʼax táan u xoʼokloʼ tu tsʼáaj cuentaeʼ tsʼoʼok u máan yaʼab años maʼ táan u beetik le kaaj baʼax ku yaʼalik Jéeobaoʼ. Le rey Josías túunoʼ tu yaʼalaj tiʼ Ilquías: ‹Jéeobaeʼ pʼujaʼan t-éetel. Tʼaanen tu yéetel utiaʼal ka u yaʼaltoʼon baʼax unaj k-beetik›. Jéeobaeʼ tu yaʼalaj tiʼ Uldá, le profetisa, ka u yaʼal lelaʼ: ‹U kajnáaliloʼob Judáeʼ tsʼoʼok u pʼatkenoʼob. Yaan in castigarkoʼob, chéen baʼaleʼ maʼ ken in beet le táan u beetik u reyil Josíasoʼ, tumen letiʼeʼ kabal u yóol›.

Le ka tu yuʼubaj rey Josías lelaʼ, bin teʼ templooʼ ka tu muchʼkíintaj u kajnáaliloʼob Judá. Ka tsʼoʼokeʼ tu kʼaʼam xokaj u Ley Dios tu táan le kaajoʼ. Josías yéetel le kaajoʼ tu yaʼaloʼob yaan u beetkoʼob baʼax ku yaʼalik Dios yéetel tuláakal u puksiʼikʼaloʼob.

Tsʼoʼok kaʼach u máan yaʼab años maʼ festejartaʼak le Pascua tumen u kajnáaliloʼob Judáoʼ. Chéen baʼaleʼ Josíaseʼ tu xokaj teʼ Ley unaj u  festejartaʼal cada añooʼ, le oʼolal tu yaʼalaj tiʼ le kaajoʼ: «Festejarteʼex junpʼéel Pascua utiaʼal Jéeoba». Ka tsʼoʼokeʼ Josíaseʼ tu yaʼalaj ka taasaʼak kʼubbil yaʼab kíimsbil baʼalcheʼob yéetel ka yanak junmúuchʼ máakoʼob utiaʼal ka kʼaaynakoʼob teʼ templooʼ. Ka túun tu festejartoʼob le Pascuaoʼ, ka tsʼoʼokeʼ tu beetoʼob u fiestail le Waajoʼob minaʼan u Levadurailoʼ, lelaʼ xáanchaj siete días. Desde ka kíim Samueleʼ, mix juntéen festejartaʼak junpʼéel Pascua beyaʼ. Josíaseʼ jach tu jaajil u yaabiltmaj kaʼach u Ley Dios. Kux túun teech, ¿uts wa ta tʼaan a kaanbal tiʼ Jéeoba?