XOOK 21
¿Bix k-kaʼansik u Reino Dios?
Maʼ kun xáantaleʼ u Reino Dioseʼ yaan u luʼsik tuláakal le problemasoʼ. ¡Jach jatsʼuts le baʼax kun úuchloʼ! Le oʼolal taak k-tsʼáaik u yojéelt le máakoʼoboʼ. Jesúseʼ tu yaʼalaj tiʼ u discípuloʼob ka u kaʼansoʼob tiʼ tuláakal máak le baʼaxoʼob ken u beet u Reino Diosoʼ (Mateo 28:19, 20). ¿Baʼax tsʼoʼok u beetik u testigoʼob Jéeoba utiaʼal u tsʼoʼokbeskoʼob le baʼax tu yaʼalaj Jesúsoʼ?
1. ¿Bix u béeytal Mateo 24:14 teʼ kʼiinoʼobaʼ?
Jesúseʼ tu yaʼaleʼ «le baʼaloʼob maʼalobtak ken u beet le Reinooʼ yaan u tsikbaltaʼal tiʼ tuláakal yóokʼol kaab» (Mateo 24:14). Toʼon u testigoʼon Jéeobaeʼ jach kiʼimak k-óol ikil k-beetik le meyajaʼ. Tiʼ tuláakal yóokʼol kaabeʼ k-kaʼansik le baʼaloʼob maʼalobtak ken u beet u Reino Dios ich maas tiʼ 1,000 idiomaʼoboʼ. Jach yaʼab meyaj kʼaʼabéet u beetaʼal utiaʼal u tsʼoʼokbesaʼal le meyajaʼ. Chéen yéetel u yáantaj Jéeoba ku páajtal u beetaʼal.
2. ¿Baʼax k-beetik utiaʼal k-kaʼansik le máakoʼoboʼ?
Jeʼex le cristianoʼob teʼ yáax siglooʼ toʼon xaneʼ k-bin k-kaʼans le máakoʼob «joonaj joonajil[oʼ]» (Hechos 5:42). Ikil k-beetik beyoʼ ku béeytal k-kaʼansik u millonesil máakoʼob cada año. Chéen baʼaleʼ como bejlaʼaʼ óoliʼ maʼ tuláakal máak kulaʼan tu yotocheʼ ku kʼaʼabéettal k-bin kaʼansaj teʼ tuʼux yaʼab u máan máakoʼ. Mantatsʼ táan k-kaʼansik tiʼ le máakoʼob máax Jéeoba yéetel baʼaxoʼob ken u beete.
3. ¿Máaxoʼob unaj u kaʼanskoʼob baʼax ken u beet u Reino Dios?
Tuláakal u discípuloʼob Jesús unaj u kaʼanskoʼob baʼax ken u beet u Reino Dios. Toʼoneʼ jach kʼaʼanaʼan k-ilik k-beetik le meyajoʼ tumen jeʼel u salvartik u kuxtal le máakoʼoboʼ (xok 1 Timoteo 4:16). Maʼatech k-boʼotaʼal ikil k-kaʼansik le máakoʼoboʼ. Le Bibliaoʼ ku yaʼalik: «Le baʼax tsʼaʼabteʼexoʼ siibil úuchik u beetaʼalteʼex, le oʼolal siibil xan unaj a beetkeʼex» (Mateo 10:7, 8). Tsʼoʼoleʼ kex mix máak u kʼáat u yuʼub baʼax k-tsikbaltikeʼ k-ojleʼ le baʼax k-beetkoʼ utiaʼal k-adorartik Jéeoba yéetel utiaʼal k-beetik u kiʼimaktal u yóol.
UTIAʼAL A MAAS NAʼATIK
Koʼox ilik baʼax táan u beetik u testigoʼob Jéeoba utiaʼal u kaʼanskoʼob le máakoʼoboʼ yéetel bix u yáantaʼaloʼob tumen Jéeoba.
K-kaʼansaj tiʼ tuláakal yóokʼol kaab: A) Costa Rica, B) Estados Unidos, C) Benín, D) Tailandia, E) Yap (Micronesia), F) Suecia
4. K-kaʼansik tuláakal máak
Kex jeʼel tuʼuxak ka yanak le máakoʼoboʼ u testigoʼob Jéeobaeʼ ku yilik u binoʼob utiaʼal u kaʼanskoʼob. Chaʼanteʼex le VIDEOOʼ, kéen tsʼoʼokkeʼ ka tsikbaltikeʼex lelaʼ:
-
Tiʼ le baʼax ku beetik u testigoʼob Jéeoba utiaʼal u kaʼanskoʼob le máakoʼoboʼ, ¿máakalmáak maas jatsʼuts a wilkiʼ?
Xokeʼex Mateo 22:39 yéetel Romanos 10:13-15, kéen tsʼoʼokkeʼ ka tsikbaltikeʼex lelaʼ:
-
¿Bix k-eʼesik yaabilaj tiʼ le máakoʼob le kéen k-tsikbalttiʼob u Reino Diosoʼ?
-
¿Bix u yilik Jéeoba le máaxoʼob kaʼansik le baʼaxoʼob ken u beet u Reinooʼ? (Ilawileʼex versículo 15).
5. K-múul meyaj yéetel Dios
Yaʼab baʼaxoʼob eʼesik Jéeoba nuʼuktik le meyaj k-beetkoʼ. Koʼox ilik baʼax úuch tu luʼumil Nueva Zelanda. Juntéenjeak de tardeeʼ juntúul sukuʼun ku kʼaabaʼtik Pauleʼ jóokʼ kaʼansaj joonaj joonajileʼ ka tu kʼaj óoltaj juntúul señora. Jach teʼ kʼiin jeʼeloʼ le señoraoʼ orarnaj tiʼ Jéeoba utiaʼal u kʼáatik ka xíimbaltaʼak tumen wa máax. Pauleʼ ku yaʼalik: «Jach tres horas tiʼ leloʼ kʼoopnajen tu yotoch».
Xokeʼex 1 Corintios 3:9, kéen tsʼoʼokkeʼ ka tsikbaltikeʼex lelaʼ:
-
Le baʼax úuch tiʼ Pauloʼ, ¿bix u yeʼesik Jéeoba nuʼuktik le kaʼansaj ku beetaʼaloʼ?
Xokeʼex Hechos 1:8, kéen tsʼoʼokkeʼ ka tsikbaltikeʼex lelaʼ:
-
¿Baʼaxten kʼaʼabéettoʼon u yáantaj Jéeoba utiaʼal k-kaʼansik le máakoʼoboʼ?
¿A wojel wa?
Teʼ reuniónoʼob ku yantaltoʼon yáam semanaoʼ ku tsoʼololtoʼon bix unaj k-kaʼansik le máakoʼoboʼ. Wa tsʼoʼok a bin tiʼ junpʼéel tiʼ le reuniónoʼobaʼ, ¿bix ta wilil le baʼaxoʼob ku kaʼansaʼaloʼ?
6. K-kaʼansaj tumen Dios aʼalik
Teʼ yáax siglooʼ anchaj máakoʼob tu yóotoʼob u beetoʼob ka xuʼuluk u kaʼansaj u discípuloʼob Jesús. Le yáax cristianoʼoboʼ tʼaanajoʼob yéetel «le autoridadoʼob utiaʼal ka chaʼabak u máan tsikbaltbil le maʼalob baʼaloʼob ku taal tiʼ Diosoʼ» (Filipenses 1:7). Teʼ kʼiinoʼobaʼ u testigoʼob Jéeobaeʼ láayliʼ bey u beetkoʼoboʼ. a
Xokeʼex Hechos 5:27-42, kéen tsʼoʼokkeʼ ka tsikbaltikeʼex lelaʼ:
-
¿Baʼaxten maʼ tun xuʼulul k-tsikbaltik u Reino Dios tiʼ le máakoʼoboʼ? (Ilawileʼex versículo 29, 38 yéetel 39).
BAʼAX SUUK U KʼÁATAʼAL: «¿Baʼaxten u testigoʼob Jéeobaeʼ ku máanoʼob kaʼansaj joonaj joonajil?».
-
¿Baʼax jeʼel a núukikeʼ?
BAʼAX TSOʼOLI
Jesúseʼ tu yaʼalaj tiʼ u discípuloʼob ka u kaʼansoʼob tiʼ tuláakal yóokʼol kaab baʼax ken u beet u Reino Dios. Utiaʼal u béeytal le meyajaʼ Jéeobaeʼ táan u yáantik u kaajal.
Baʼax ta kanaj
-
¿Bix u kaʼansaʼal tiʼ tuláakal yóokʼol kaab le baʼaxoʼob ken u beet u Reino Diosoʼ?
-
¿Bix k-eʼesik yaabilaj tiʼ le máakoʼob le kéen k-tsikbalttiʼob u Reino Diosoʼ?
-
¿Ku taasik wa kiʼimak óolal ikil u kaʼansik máak u Reino Dios? ¿Baʼaxten bey a tuukuloʼ?
KAN U MAASIL
Ilawil bix u kaʼansaj u testigoʼob Jéeoba teʼ nukuch kaajoʼoboʼ.
¿Baʼax tsʼoʼok u beetik u testigoʼob Jéeoba utiaʼal u kaʼanskoʼob le refugiadoʼoboʼ?
Ilawil bix juntúul koʼoleleʼ jach kiʼimak u yóol ikil u xupkuba u meyajt Jéeoba.
Xok bix u testigoʼob Jéeobaeʼ tsʼoʼok u ganarkoʼob jujunpʼéel juicioʼob utiaʼal ka chaʼabak u kaʼanskoʼob u Reino Dios.
«Le j-kʼaʼaytajoʼoboʼ ku binoʼob tu táan le juezoʼoboʼ» (¡U Reino Dioseʼ táan u gobernar!, xook 13).
a Dios aʼaliktoʼon ka kaʼansajnakoʼon, le oʼolal toʼon u testigoʼon Jéeobaeʼ maʼ kʼaʼabéet k-kʼáatik permiso tiʼ le autoridadoʼob utiaʼal k-kaʼansik baʼax ken u beet u Reinooʼ.
Maʼ xaaneʼ jeʼel u yutstal xan ta wicheʼ
KʼÁATCHIʼOB SUUK U BEETAʼAL
¿Bix u tsʼáaikoʼob xook u testigoʼob Jéeoba yéetel le Bibliaoʼ?
Le xook ku tsʼáaik u testigoʼob Jéeobaoʼ gratis, jeʼel u páajtal a usartik a Bibliaeʼ yéetel jeʼel u páajtal a invitartik wa máax utiaʼal u láakʼintikech teʼ xookoʼ.
