XOOK 26
¿Baʼaxten jach yaan kʼasaʼanil yéetel ku sufrir máak?
Le kéen úuchuk junpʼéel nojoch loobeʼ yaʼab máakeʼ ku yaʼalik: «¿Baʼaxten ku sufrir máak?». Jach ku líiʼsik k-óol k-ojéeltikeʼ le Bibliaoʼ ku núukik le preguntaoʼ.
1. ¿Baʼax tu beetaj Satanás utiaʼal u yantal kʼasaʼanil?
Le Kʼaasilbaʼaloʼ tu tsʼáajuba tu contra Jéeoba. Letiʼ kaʼacheʼ u kʼáat u gobernart wíinik, le oʼolal tu tusaj Adán yéetel Eva utiaʼal ka u tsʼáaubaʼob xan tu contra Dios. Satanáseʼ tu beetaj u tuklik Eva táan u tuʼusloʼob tumen Jéeoba (Génesis 3:1-5). Bey táan u yaʼaliktiʼ kaʼacheʼ maas jeʼel u kiʼimaktal u yóol wíinik wa maʼ tu yuʼubik u tʼaan Dioseʼ. Le yáax tuus tu yaʼalaj Satanásoʼ letiʼe ka tu yaʼalaj tiʼ Eva maʼ kun kíimiloʼ. Le oʼolal le Bibliaoʼ ku yaʼalikeʼ Satanáseʼ «chéen tuus ku jóokʼol tu chiʼ, letiʼ u taatail le tuusoʼ» (Juan 8:44).
2. ¿Baʼax tu chʼaʼtuklaj u beetik Adán yéetel Eva?
Jéeobaeʼ jach tu yeʼesaj u yutsil tiʼ Adán yéetel Eva. Tu yaʼalajtiʼobeʼ jeʼel u páajtal u jaantikoʼob u yich jeʼel baʼalak cheʼil yaan teʼ jardínoʼ, chéen u yich junpʼéel cheʼ maʼ unaj u jaantikoʼobiʼ (Génesis 2:15-17). Kex beyoʼ Evaeʼ «tu chʼaʼaj u jaante», tsʼoʼoleʼ Adán xaneʼ «káaj u jaantik» (Génesis 3:6). Letiʼob kaʼacheʼ perfectoʼob, le oʼolal maʼ istikyaj u beetkoʼob baʼax maʼalobiʼ. Chéen baʼaleʼ Adán yéetel Evaeʼ maʼ tu yuʼuboʼob u tʼaan Diosiʼ. Bey úuchik u yeʼeskoʼob maʼ u kʼáat ka gobernartaʼakoʼob tumen Diosiʼ. Le baʼax tu beetoʼoboʼ jach tu beetaj u sufriroʼob (Génesis 3:16-19).
3. ¿Baʼax úuch tiʼ wíinik yoʼolal le baʼax tu beetaj Adán yéetel Evaoʼ?
Adán yéetel Evaeʼ kʼebanchajoʼob, le beetik tu máansoʼob le kʼeban tiʼ u paalaloʼoboʼ. Le Bibliaoʼ ku yaʼalik yoʼolal Adán: «Jeʼel bix tu yoʼolal chéen juntúul máak ook le kʼeban way yóokʼol kaab, yéetel tu yoʼolal le kʼeban ook le kíimiloʼ, bey xan úuchik u máan le kíimil tiʼ tuláakal máakoʼ» (Romanos 5:12).
Yaan horaeʼ ku sufrir máak tumen maʼ maʼalob le baʼax ku beetkoʼ wa maʼ maʼalob le baʼax ku beetik u maasiloʼ. Yaan hora xaneʼ ku antal máak teʼ lugar wa teʼ súutukil ku jáan úuchul wa baʼaxoʼ (xok Eclesiastés 9:11).
UTIAʼAL A MAAS NAʼATIK
Koʼox ilik baʼaxten maʼ u culpa Dios le kʼasaʼanil yéetel le baʼaxoʼob beetik u sufrir máakoʼ. Yaan xan k-ilik bix u yuʼubikuba kéen u yil u sufrir máak.
4. ¿Máax beetik u sufrir máak?
Yaʼab máak tuklikeʼ Dios gobernartik le yóokʼol kaabaʼ. Chéen baʼaleʼ, ¿jach wa jaaj beyoʼ? Chaʼanteʼex le VIDEOOʼ.
Xokeʼex Santiago 1:13 yéetel 1 Juan 5:19, kéen tsʼoʼokkeʼ ka tsikbaltikeʼex lelaʼ:
-
¿Tiʼ Dios wa yaan u culpail le baʼaxoʼob ku muʼyajtik máak yéetel le kʼasaʼanil yaan way yóokʼol kaabaʼ?
5. ¿Baʼaxoʼob tsʼoʼok u sen úuchul desde káajak u gobernar Satanás?
Xokeʼex Génesis 3:1-6, kéen tsʼoʼokkeʼ ka tsikbaltikeʼex lelaʼ:
-
¿Baʼax tuusil tu yaʼalaj Satanás? (Ilawileʼex versículo 4 yéetel 5).
-
¿Bix tu tsʼáajil naʼatbil Satanás de ke Jéeobaeʼ maʼ u kʼáat ka xiʼik maʼalobil tiʼ wíinikiʼ?
-
Satanáseʼ tu yaʼaleʼ maʼ kʼaʼabéet u gobernartaʼal wíinik tumen Dios utiaʼal u kiʼimaktal u yóoliʼ, ¿jach wa jaaj le baʼax tu yaʼaloʼ?
Xokeʼex Eclesiastés 8:9, kéen tsʼoʼokkeʼ ka tsikbaltikeʼex lelaʼ:
-
Dioseʼ maʼ táan u gobernartik le yóokʼol kaabaʼ, ¿bix u bin tiʼ wíinik ikil u gobernarkuba chéen tu juunal?
-
Adán yéetel Evaeʼ perfectoʼob yéetel kajaʼanoʼob tiʼ junpʼéel paraíso kaʼachi, chéen baʼaleʼ maʼ tu yuʼuboʼob u tʼaan Diosiʼ ka tu tsʼáajubaʼob tu tséel Satanás
-
Úuchik u kʼebantal Adán yéetel Evaeʼ tuláakal máak ku kʼebantal yéetel ku kíimil
-
Jéeobaeʼ yaan u xuʼulsik le kʼebanoʼ, le muʼyajoʼ yéetel le kíimiloʼ; tuláakal máak yaan u pʼáatal perfectoil yéetel yaan u kuxtal tiʼ junpʼéel paraíso
6. Jéeobaeʼ ku yaatal u yóol kéen u yil u sufrir máak
¿Chéen wa táan u yilik Dios u sufrir máak? Ilawil baʼax tu tsʼíibtaj rey David yéetel apóstol Pedro. Xokeʼex Salmo 31:7 yéetel 1 Pedro 5:7, kéen tsʼoʼokkeʼ ka tsikbaltikeʼex lelaʼ:
-
¿Bix a wuʼuyikaba ikil a wojéeltik Jéeobaeʼ u yojel baʼax problemasil yaantech yéetel ku yaatal u yóol kéen u yil a sufrir?
7. Dioseʼ yaan u luʼsik tuláakal le baʼaloʼob beetik u sufrir máakoʼ
Xokeʼex Isaías 65:17 yéetel Apocalipsis 21:3, 4, kéen tsʼoʼokkeʼ ka tsikbaltikeʼex lelaʼ:
-
Jéeobaeʼ ku yaʼalikeʼ yaan u láaj luʼsik le baʼaloʼob beetik u sufrir máakoʼ. ¿Jatsʼuts wa a wuʼuyik le baʼaloʼob ku prometertik Diosoʼ? ¿Baʼaxten?
¿A wojel wa?
Satanáseʼ tu pʼataj kʼaasil u kʼaabaʼ Jéeoba le ka tu yaʼalaj kʼasaʼan yéetel maʼ maʼalob u gobernariʼ. Maʼ tun xáantaleʼ Jéeobaeʼ yaan u luʼsik tuláakal le baʼaloʼob beetik u sufrir wíinikoʼ, bey ken u yeʼesil maʼ jaaj le baʼax aʼalaʼab tu contraoʼ. Yaan u yeʼesik xaneʼ u gobiernoeʼ letiʼe u maas maʼalobiloʼ. Jeʼex k-ilkoʼ jach táaj importante u santificartaʼal u kʼaabaʼ Jéeoba (Mateo 6:9, 10).
BAʼAX SUUK U YAʼALAʼAL: «Deporsi Dioseʼ tu beetaj wíinik utiaʼal u sufrir».
-
Techeʼ, ¿baʼax ka tuklik yoʼolal le baʼax ku yaʼalaʼaloʼ?
BAʼAX TSOʼOLI
Tuláakal le baʼaloʼob kʼaastak yéetel tuláakal le muʼyajiloʼ u culpa Satanás, Adán yéetel Eva. Jéeobaeʼ jach u yaabiltmoʼon, le oʼolal yaan u luʼsik tuláakal le baʼax beetik k-muʼyajoʼ.
Baʼax ta kanaj
-
¿Baʼax tuusil tu yaʼalaj Satanás tiʼ Eva?
-
¿Baʼax úuch tiʼ wíinik yoʼolal le baʼax tu beetaj Adán yéetel Evaoʼ?
-
¿Baʼaxten k-aʼalik ku yaatal u yóol Jéeoba kéen u yil u sufrir máak?
KAN U MAASIL
Ilawil bix u tsolik le Biblia baʼax le kʼebanoʼ.
Ojéelt baʼax tu yaʼalaj Satanás tu jardínil Edén.
«¿Baʼaxten ku chaʼik Dios k-muʼyaj?» (U Pʼíich Tulumil Kanan, 1 tiʼ enero tiʼ 2014)
Ojéelt u núukil junpʼéel pregunta ku beetik yaʼab máak.
«¿Baʼaxten Dioseʼ tu chaʼaj u kíimsaʼal yaʼab judíoʼob teʼ Holocaustooʼ?» (Xok teʼ jw.org)
Ilawil baʼax tu kanaj juntúul máak jach yaʼab baʼaloʼob tu muʼyajtaj.
Maʼ xaaneʼ jeʼel u yutstal xan ta wicheʼ
KʼÁATCHIʼOB SUUK U BEETAʼAL
¿Bix u tsʼáaikoʼob xook u testigoʼob Jéeoba yéetel le Bibliaoʼ?
Le xook ku tsʼáaik u testigoʼob Jéeobaoʼ gratis, jeʼel u páajtal a usartik a Bibliaeʼ yéetel jeʼel u páajtal a invitartik wa máax utiaʼal u láakʼintikech teʼ xookoʼ.
