U Reino Dioseʼ táan u gobernar. Maʼ tun xáantaleʼ yaan u kʼexik yaʼab baʼaloʼob way Luʼumeʼ. Techeʼ jeʼel u páajtal a wilik le baʼaloʼob maʼalobtak ken u beet le Reinoaʼ. Koʼox ilik jujunpʼéeliʼ.

1. ¿Bix ken u beet u kaʼa antal justicia yéetel jeetsʼelil way Luʼumeʼ?

Jesúseʼ yaan u láaj xuʼulsik le kʼasaʼan máakoʼoboʼ bey xan le gobiernoʼob tiʼ u guerrail Armagedónoʼ (Apocalipsis 16:14, 16). Yaan u béeytal le profecíaaʼ: «Ichil junpʼíit kʼiineʼ maʼ kun antal kʼasaʼan máakoʼob» (Salmo 37:10). Yéetel u Reino Dioseʼ Jesúseʼ yaan u beetik u yantal jeetsʼelil bey xan justicia tiʼ tuláakal yóokʼol kaab (xok Isaías 11:4).

2. ¿Bix kun kuxtal wíinik le kéen béeyak baʼax u kʼáat Dios way Luʼumeʼ?

Yáanal u Reino Dioseʼ «le máaxoʼob ku beetkoʼob baʼax maʼaloboʼ yaan u pʼáatloʼob way luʼumeʼ, way kun kajtaloʼob utiaʼal mantatsʼeʼ» (Salmo 37:29). Chéen tukult bix le kuxtal tiʼ junpʼéel lugar tuʼux tuláakal máak beetik baʼax maʼalob, tuláakal máak ku yaabiltik Jéeoba, mix máak kun kʼojaʼantal yéetel mix máak kun kíimil. ¿Máasaʼ jach jatsʼuts?

3. ¿Baʼax ken u beet u Reino Dios kéen xuʼulsaʼak le kʼasaʼan máakoʼoboʼ?

Kéen tsʼoʼokok u xuʼulsaʼal le kʼasaʼan máakoʼoboʼ Jesúseʼ yaan u gobernar mil años. Tu yáamil le tiempooʼ Jesús yéetel le 144,000 máakoʼob kun gobernaroʼob tu yéeteloʼ yaan u luʼskoʼob le kʼeban yaan tiʼ wíinikoʼ. Le kéen tsʼoʼokok le tiempo jeʼeloʼ le Luʼumaʼ tsʼokaʼaniliʼ xan u pʼáatal junpʼéel jatsʼuts paraísoeʼ. Yaan u chuʼupul yéetel máakoʼob kiʼimak u yóoloʼob ikil u beetkoʼob baʼax u kʼáat Jéeoba. Kéen tsʼoʼokkeʼ Jesúseʼ yaan u sutik le Reino tiʼ u Taataoʼ. Bey kun santificarbil u kʼaabaʼ Diosoʼ (Mateo 6:9, 10). Yaan u yilaʼaleʼ Jéeobaeʼ jach maʼalob u gobernar yéetel ku kanáantik u kaajal. Tu tsʼookeʼ Jéeobaeʼ yaan u xuʼulsik Satanás yéetel u demonioʼob yéetel jeʼel máaxak ka u tsʼáauba tu contra u gobiernoeʼ (Apocalipsis 20:7-10). Le baʼaloʼob maʼalobtak ken u beet u Reino Diosoʼ mix bikʼin kun xuʼululoʼob.

 UTIAʼAL A MAAS NAʼATIK

4. U Reino Dioseʼ yaan u xuʼulsik u gobierno wíinik

«Máakeʼ mantatsʼ ku pechʼ óoltik u yéet máakil utiaʼal u beetik kʼaas tiʼ» (Eclesiastés 8:9). Chéen baʼaleʼ u Reino Dioseʼ yaan u yutskíintik tuláakal le baʼaloʼob kʼaastak tsʼoʼok u beetik wíinikoʼ.

Xokeʼex Daniel 2:44 yéetel 2 Tesalonicenses 1:6-8, kéen tsʼoʼokkeʼ ka tsikbaltikeʼex lelaʼ:

• ¿Baʼax ken u beet Jéeoba yéetel Jesús tiʼ u gobierno wíinik bey xan tiʼ le máaxoʼob apoyarkoʼ?

• Le baʼax tsʼoʼok a kanik tiʼ Jéeoba yéetel Jesúsoʼ, ¿bix u yeʼesiktech maʼalob tuláakal le baʼax ken u beetoʼoboʼ?

5. Jesúseʼ letiʼe maas maʼalob Reyoʼ

Le kéen reinarnak Jesús way Luʼumeʼ yaʼab baʼax ken u beet yoʼolal wíinik. Chaʼanteʼex le VIDEO utiaʼal a wilkeʼex Jesúseʼ jach u kʼáat u yáant wíinik yéetel Dioseʼ tsʼoʼok u tsʼáaik poder tiʼ utiaʼal u beetik.

Le baʼax tu beetaj Jesús le ka anchaj way Luʼumeʼ tu yeʼesaj baʼax ken u beet u Reino Dios. ¿Tiʼ le promesaʼob ken k-iloʼ máakalmáak maas taak a wilik u béeytaliʼ? Xokeʼex tuláakal le tekstoʼob tuʼux yaan le promesaʼoboʼ.

6. Jach maʼalob kun bin tiʼ wíinik yoʼolal u Reino Dios

 BAʼAX TSOʼOLI

U Reino Dioseʼ yaan u béeykuntik baʼax u kʼáat Jéeoba, yaan u sutik paraísoil le Luʼumaʼ yéetel yaan u beetik u adorartaʼal Jéeoba utiaʼal mantatsʼ.

Baʼax ta kanaj

• ¿Bix kun santificarbil u kʼaabaʼ Jéeoba tumen u Reino?

• ¿Baʼaxten k-creertik u Reino Dioseʼ yaan u béeykuntik le promesaʼob yaan teʼ Bibliaoʼ?

• Tiʼ tuláakal le baʼax ken u beet u Reino Diosoʼ, ¿máakalmáak maas taak a wilik u béeytaliʼ?