U kajnáaliloʼob Nazareteʼ jach péeknajaʼan u yóoloʼob. Táanil tiʼ u tsʼaʼabal u yokjaʼ Jesús tumen Juan kex óoliʼ junpʼéel jaʼab beoraaʼ, letiʼeʼ juntúul carpintero kaʼachi. Baʼaleʼ beoraaʼ tsʼoʼok u kʼaj óoltaʼal yoʼolal le milagroʼob ku beetkoʼ. U kajnáaliloʼob Nazareteʼ jach taak u yilkoʼob u beetik junpʼéel milagro.

Letiʼobeʼ binoʼob teʼ sinagoga táanil tiʼ u bin Jesusoʼ, tumen u yojloʼob suuk u biniʼ. Teʼeloʼ suukaʼan u beetaʼal oración yéetel u xoʼokol le baʼaxoʼob u tsʼíibtmaj Moisesoʼ, lelaʼ «cada Sábado ku xoʼokol kʼaʼam teʼ sinagogaʼoboʼ» (Baʼaxoʼob 15:21). Ku xoʼokol xan le baʼaxoʼob u tsʼíibtmaj le profetaʼoboʼ. Le ka waʼalaj Jesús xookeʼ, maʼ xaaneʼ tu kʼaj óoltaj yaʼab tiʼ le máaxoʼob suuk u binoʼob teʼ sinagogaoʼ. Ka tsʼaʼabtiʼ le rollo u tsʼíibtmaj profeta Isaíasoʼ. Letiʼ túuneʼ tu kaxtaj le tuʼux ku tʼaan tiʼ le Máax yéeyaʼan tumen u kiliʼich muukʼ Jéeobaoʼ, bejlaʼeʼ ku chíikpajal tu libroil Isaías 61:1, 2.

Jesuseʼ tu xokaj le tuʼux ku yaʼalik le Máax yéeyaʼanoʼ yaan u kʼaʼaytik yaan u jáalkʼabtaʼal le bisaʼanoʼob kʼalbiloʼ, le maʼalob péektsil tiʼ le óotsiloʼoboʼ, yaan u tsʼaʼabal u sáasil u yich le chʼóopoʼoboʼ yéetel yaan u kʼaʼaytik u jaʼabil u kaʼa kʼaʼamal máak tumen Jéeoba. Ka tsʼoʼokeʼ Jesuseʼ tu kotsʼaj le rollooʼ ka tu tsʼáaj tiʼ le máax ku yáantaj teʼ sinagogaoʼ, tsʼoʼoleʼ ka kulaji. Tuláakal le máakoʼob yanoʼoboʼ pʼáat chéen táan u paktikoʼob Jesús. Ka tʼaanajeʼ, maʼ xaaneʼ tu maas tsolaj le baʼax tu xokoʼ, tsʼoʼoleʼ ka tu yaʼalaj: «Bejlaʼeʼ táan u béeychajal le tsʼíib táant a wuʼuyikeʼexaʼ» (Lucas 4:21).

Le máakoʼoboʼ jaʼakʼ u yóoloʼob ka tu «yuʼuboʼob le jatsʼuts tʼaanoʼob ku jóokʼol tu chiʼoʼ» yéetel joʼopʼ u yaʼalikoʼob tu baatsiloʼob: «¿Máasaʼ le máakaʼ u paal José?». Baʼaleʼ tumen u yojel Jesús u kʼáat le máakoʼob u yiloʼob u beetik milagroʼoboʼ, tu yaʼalajtiʼob: «Jach in tuklikeʼ yaan a waʼalikeʼexten le kettʼaanaʼ: ‹Doctor, tsʼakaba ta juunal; le baʼaxoʼob t-uʼuyaj ta beetaj Capernaumoʼ, beetoʼob xan way ta kaajaleʼ›» (Lucas 4:22, 23). U yéet kaajaloʼob Jesuseʼ ku tuklikoʼob kaʼacheʼ táanil tu kaajal unaj u káajal u tsʼakik kʼojaʼanoʼob. Le oʼolal tu tukloʼob ku taasaʼaloʼob mix baʼalil tumen Jesús.

Jesuseʼ u yojel baʼax ku tuklikoʼob, le oʼolal tu kʼaʼajsajtiʼob jujunpʼéel baʼaxoʼob uchaʼanoʼob tu kaajil Israel. Letiʼeʼ tu yaʼaleʼ tu kʼiiniloʼob Elíaseʼ anchaj yaʼab koʼoleloʼob kimen u yíichamoʼob, baʼaleʼ Elíaseʼ maʼ túuxtaʼab yiknal mix juntúul tiʼ letiʼobiʼ. Baʼaxeʼ túuxtaʼab yiknal juntúul koʼolel kimen u yíicham tu kaajil Sarepta, tu luʼumil Sidón, teʼeloʼ tu beetaj junpʼéel milagroiʼ (1 Reyes 17:8-16). Tu kʼiiniloʼob xan Eliseoeʼ yaʼab máakoʼob kʼojaʼanoʼob tiʼ lepra yanoʼob tu kaajil Israel, baʼaleʼ mix juntúul tiʼ letiʼob tsʼaʼakoʼob tumen Eliseoiʼ, chéen Naamán, tiʼ u luʼumil Siria (2 Reyes 5:1, 8-14).

¿Baʼax tu beetaj le máakoʼob le ka tu yuʼuboʼob u kʼaʼajsaʼaltiʼob le baʼaxoʼob uchaʼantak ku yeʼesik minaʼan u fejoʼoboʼ? Le máaxoʼob yanoʼob teʼ sinagogaoʼ pʼuʼujoʼob ka tu jóoʼsoʼob Jesús teʼ kaajoʼ. Ka tu bisoʼob tu maas kaʼanlil le puʼuk tuʼux yaan le kaajoʼ ka tu yóotaj u léenchʼintoʼobiʼ. Baʼaleʼ Jesuseʼ púutsʼ tiʼ letiʼob ka bin tu kaajil Capernaum, tu xaman-chikʼin u kʼáaʼnáabil Galilea.