¿BIX jeʼel k-kiʼimakkúuntik u yóol Dioseʼ? ¿Yaan wa baʼax jeʼel u páajtal k-tsʼáaiktiʼeʼ?... Jéeobaeʼ ku yaʼalik: ‹In tiaʼal tuláakal u baʼalcheʼiloʼob le kʼáaxoʼ› yéetel «in tiaʼal le plata yéetel le orooʼ» (Salmo 24:1; 50:10; Ageo 2:8). Baʼaleʼ yaan baʼax jeʼel u páajtal k-tsʼáaiktiʼeʼ. ¿Baʼax ta tʼaan?...

² Jéeobaeʼ ku chaʼik k-chʼaʼtuklik wa yaan k-meyajtik, wa maʼ. Maʼatech u obligartikoʼon k-beet baʼax u kʼáat. Koʼox ilik wa jeʼel k-naʼatik baʼaxten Dioseʼ tu beetoʼon yéetel u páajtalil k-chʼaʼtuklik k-meyajtik, wa maʼ.

³ Maʼ xaaneʼ a kʼaj óol junpʼéel robot. Lelaʼ junpʼéel baʼal ku beetik chéen le baʼax programartaʼan tiʼ tumen le máax beetoʼ. Le robotoʼ maʼatech u chʼaʼtuklik baʼax ken u beete. Jéeobaeʼ jeʼel kaʼach u páajtal u beetikoʼon jeʼex junpʼéel robot utiaʼal k-beetik chéen le baʼax u kʼáateʼ. Baʼaleʼ maʼ bey úuchik u beetikoʼoniʼ. ¿A wojel wa baʼaxten?... Yaan báaxaloʼobeʼ bey robotoʼobeʼ. Le ken tsʼáankʼabtaʼak u botnileʼ ku beetik le baʼax programartaʼan tiʼ tumen le máax beetoʼ. ¿Tsʼoʼok wa a wilik le báaxaloʼob beyoʼ?... Le báaxaloʼob beyaʼ séeb u náaksik u yóol máak, tumen chéen le baʼax programartaʼan tiʼob ku  beetkoʼoboʼ. Dioseʼ maʼ u kʼáat ka k-meyajt chéen jeʼex le robotoʼob ku beetkoʼob chéen junpʼéel baʼaloʼ. U kʼáat ka k-meyajt tumen k-yaabiltmaj yéetel tumen k-kʼáat k-beet baʼax ku yaʼalik.

⁴ ¿Bix a tuklik u yuʼubikuba Jéeoba, le k-Taata yaan teʼ kaʼan, le ken k-uʼuy u tʼaan tumen tiʼ toʼon ku síijil k-beetkoʼ?... A taataʼobeʼ, ¿bix u yuʼubikubaʼob yoʼolal baʼax ka beetik?... Le Bibliaoʼ ku yaʼalikeʼ le paal ku yuʼubik tʼaanoʼ ‹ku kiʼimakkúuntik u yóol u taata›, baʼaleʼ le paal maʼatech u yuʼubik tʼaanoʼ «ku beetik u yaj óolaloʼob» (Proverbios 10:1). ¿Tsʼoʼok wa a wilik bix u kiʼimaktal u yóol a taataʼob le ken a beet le baʼax ku yaʼalikoʼobtechoʼ?... Baʼaleʼ ¿bix u yuʼubikubaʼob wa maʼ ta wuʼuyik tʼaan?...

⁵ Beoraaʼ koʼox tuukul tiʼ Jéeoba, k-Taata yaan teʼ kaʼanoʼ. Letiʼeʼ ku yaʼalik bix jeʼel k-kiʼimakkúuntik u yóoleʼ. Kaxt ta Biblia u libroil Proverbios 27:11. Teʼeloʼ ku yaʼaliktoʼon Dios: «In xibil paal [wa in x-chʼupul paal], yanak a wojéelajil utiaʼal a beetik u kiʼimaktal in wóol; beyoʼ bíin yanak baʼax in waʼal tiʼ máaxoʼob u kʼáatoʼob u pajoʼob in suʼtal». ¿A wojel wa baʼax u kʼáat u yaʼal u paʼajal u suʼtal Dios?... Jeʼex wa yaan máax aʼalik maʼ tu páajtal a beetik le baʼax ta waʼalaj a beetik kaʼachoʼ, táan u pajik a suʼtal. Satanaseʼ bey u beetik tiʼ Jéeobaoʼ. ¿A wojel wa bixi?... Koʼox ilik.

⁶ Kʼaʼajaktecheʼ teʼ xookil 8 tiʼ le libroaʼ, t-kaneʼ Satanaseʼ u kʼáat ka uʼuyaʼak u tʼaan tumen tuláakal máak. Letiʼeʼ ku yaʼalikeʼ chéen  k-meyajtik Dios utiaʼal u tsʼáaiktoʼon le kuxtal minaʼan u xuuloʼ. Ka tsʼoʼok u beetik u xuʼulul u yuʼubaʼal u tʼaan Jéeoba tumen Adán yéetel Evaeʼ, le Kʼaasilbaʼaloʼ tu yaʼalaj tiʼ Dios: ‹Le máakoʼoboʼ ku adorartikechoʼob chéen yoʼolal le baʼaxoʼob ka tsʼáaiktiʼoboʼ. Baʼaleʼ wa ka tsʼáaikten u páajtalileʼ, jeʼel in náachkuntik tiʼ tech jeʼel máaxakeʼ›.

⁷ Kex maʼatech u chíikpajal ichil le Biblia le tʼaanoʼobaʼ, ken k-xok u libroil Jobeʼ, ku tsʼáaik k-naʼateʼ, letiʼe baʼax tu yóotaj u yaʼal Satanás tiʼ Diosoʼ. Satanás yéetel Jéeobaeʼ jach u kʼáatoʼob u yiloʼob kaʼach wa yaan u chúukpajal u yóol Job wa maʼ. Koʼox xokik Job capítulo 1 yéetel 2 utiaʼal k-ilik baʼax úuchi.

⁸ Le capítulo 1 tiʼ Joboʼ ku yaʼalikeʼ le ka bin le angeloʼob tu táan Jéeoba teʼ kaʼanoʼ, tiaʼan xan Satanás ichiloʼobeʼ. Ka kʼáataʼabtiʼ tumen Jéeoba: «¿Tuʼux a taal?». Satanaseʼ tu yaʼaleʼ taal xíimbal teʼ Luʼumoʼ. Jéeoba túuneʼ tu kaʼa kʼáatajtiʼ: ‹¿Ta wilaj in  palitsil Job? Letiʼeʼ ku meyajtiken yéetel maʼatech u beetik baʼax kʼaas› (Job 1:6-8).

⁹ Le Kʼaasilbaʼaloʼ ku yilkeʼ maʼ chúukaʼan u yóol Jobiʼ. Le oʼolal tu yaʼalaj: ‹Jobeʼ ku adorartikech tumen maʼalob yanil. Baʼaleʼ wa ku xuʼulul a kanáantikeʼ ku kʼaakʼastʼantikech tu táan a wich›. Jéeobaeʼ tu núukajtiʼ: ‹Maʼalob, beet jeʼel baʼaxak a kʼáat yéetel le baʼaxoʼob yaantiʼoʼ, baʼaleʼ maʼ a beetik mix junpʼéel kʼaas tiʼ letiʼ› (Job 1:9-12).

¹⁰ ¿Baʼax túun tu beetaj Satanás?... Tu beetaj u yokoltaʼal u waakax yéetel u yalakʼ burroʼob yéetel tu beetaj u kíimsaʼal le máaxoʼob kanáantik u yaalakʼoʼoboʼ. Tsʼoʼoleʼ tu beetaj u jaʼatsʼal tumen cháak u yalakʼ tamanoʼob paʼteʼ yéetel le máaxoʼob kanáantikoʼ. Tsʼoʼoleʼ oklaʼab u yalakʼ camelloʼob yéetel kíimsaʼab le máaxoʼob kanáantkoʼoboʼ. Tu tsʼookeʼ Satanaseʼ tu beetaj u taal junpʼéel kʼaʼamkach iikʼ ka tu jutaj le naj tuʼux yaan kaʼach tu diezil u paalaloʼob Joboʼ, ka láaj kíimoʼob. Kex beyoʼ, Jobeʼ maʼ tu xulaj u meyajtik Jéeobaiʼ (Job 1:13-22).

¹¹ Ka kaʼa tʼaanaj Jéeoba yéetel Satanaseʼ, tu yaʼalajtiʼeʼ Jobeʼ láayliʼ táan u beetik baʼax maʼalobeʼ. Le Kʼaasilbaʼaloʼ seguernaj u yaʼalik maʼ kun chúukpajal u yóol, le oʼolal tu yaʼalaj tiʼ Dios: ‹Chaʼa in beetik kʼaas tiʼ, utiaʼal a wilik wa maʼ tu kʼaakʼastʼantikech  tu táan a wich›. Jéeoba túuneʼ tu chaʼaj tiʼ Satanás u beetik kʼaas tiʼ Job, baʼaleʼ tu yaʼalajtiʼ bik xiʼik u kíimse.

¹² Satanaseʼ tu beetaj u jóokʼol junpʼéel yaayaj kʼojaʼanil tu wíinklil. Ka tuʼuchaj u wíinklil, le oʼolal mix máak ku taaktal u náatsʼal tu yiknal. Tak u yataneʼ tu yaʼalajtiʼ: «¡Kʼaakʼastʼant [Dioseʼ], ka kíimkech!». Óoxtúul máakoʼob ku yaʼalikoʼob u amigoʼob Jobeʼ bin u xíimbaltoʼob, baʼaleʼ tu beetoʼob u maas lúubul u yóol, tumen tu yaʼaloʼobeʼ táan u muʼyaj yoʼolal baʼaxoʼob kʼaastak u beetmaj. Baʼaleʼ kex beetaʼab u sen muʼyaj tumen Satanaseʼ, Jobeʼ chúukpaj u yóol u meyajt Jéeoba (Job 2:1-13; 7:5; 19:13-20).

¹³ ¿Bix a tuklik tu yuʼubiluba Jéeoba ka tu yilaj u chúukaʼan óolal Job?... Jach kiʼimakchaj u yóol, tumen páajchaj u yaʼalik tiʼ Satanás: ‹¡Ilawil Job! Letiʼeʼ ku meyajtiken, tumen u kʼáat u beete›. ¿Yaan wa a beetik jeʼex Job, le máax meyajnaj tiʼ Jéeoba utiaʼal u yeʼesik tiʼ Satanás chéen táan u tuusoʼ?... ¿Máasaʼ jach jatsʼuts wa ka béeyak k-eʼesik tiʼ le Kʼaasilbaʼal maʼ jaaj wa jeʼel u náachkuntkoʼon tiʼ Jéeobaoʼ? Jesuseʼ bey úuchik u yilkoʼ.

¹⁴ Jesús, le Maʼalob j-Kaʼansajoʼ, maʼ tu chaʼaj u beetaʼal u kʼebantal tumen Satanasiʼ. ¡Chéen tukult bukaʼaj úuchik u kiʼimakkúuntik u yóol u Taata! Jéeobaeʼ páajchaj u yaʼalik tiʼ Satanás: ‹¡Ilawil in Hijo! Letiʼeʼ chúukpaj u yóol u meyajten, tumen u yaabiltmen›. Tukult xan bix tu yuʼubiluba Jesús úuchik u kiʼimakkúuntik u yóol u Taata. Yoʼolal le kiʼimak óolal yanchajtiʼoʼ tu yóotaj tak kíimil tiʼ junpʼéel cheʼ (Hebreoʼob 12:2).

¹⁵ ¿A kʼáat wa a beet jeʼex úuchik u beetik Jesús, le Maʼalob j-Kaʼansaj, utiaʼal a kiʼimakkúuntik u yóol Jéeobaoʼ?... Lelaʼ jeʼel u páajtal a beetik wa ku seguer a kanik baʼax u kʼáat Jéeoba ka a beeteʼ yéetel a tsʼáaik ichil a kuxtal.