¿MÁASAʼ a wojel baʼax junpʼéel chíikulal?... Teʼ xookil 46, t-ileʼ Jéeobaeʼ tu tsʼáaj junpʼéel baʼax kun eʼesik mix bikʼin ken u kaʼa xuʼuls tiʼ le yóokʼol kaab yéetel junpʼéel búulkabaloʼ. Le apostoloʼob xanoʼ tu kʼáatoʼob baʼax kun eʼesik tsʼoʼok u suut Jesús yéetel tsʼoʼok u náatsʼal u kʼiinil u xuʼulsaʼal tiʼ le kʼasaʼan yóokʼol kaabaʼ (Mateo 24:3).

² Tumen maʼ tu páajtal u yilaʼal Jesús yéetel tiaʼan teʼ kaʼanoʼ, kʼaʼabéet junpʼéel baʼax ilbil utiaʼal u yeʼesik tsʼoʼok u káajal u gobernar. Jesús túuneʼ tu tsikbaltaj tiʼ u disipuloʼob baʼax unaj u páaʼtkoʼob u yúuchul way Luʼumeʼ. Ken u yiloʼob táan u yúuchleʼ, ku tsʼáaikoʼob cuenta Jesuseʼ tsʼoʼok u suut yéetel tsʼoʼok u káajal u reinar teʼ kaʼanoʼ.

³ Utiaʼal u yilkoʼob u kʼaʼabéetil u kanáantik maʼ u náayal u yóol le disipuloʼoboʼ,  aʼalaʼabtiʼob tumen Jesús: «Ileʼex le higuera yéetel le u maasil cheʼoboʼ. Ken a wileʼex táan u loolankiloʼobeʼ, teʼexeʼ a wojleʼex tsʼoʼok u náatsʼal u kʼiinil u yichankiloʼob». Yaan baʼaxoʼob eʼesik tsʼoʼok u náatsʼal u kʼiinil u yichankil le cheʼoboʼ. Ken xan a wil táan u yúuchul le baʼaxoʼob tu yaʼalaj Jesusoʼ, a wojel tsʼoʼok a náatsʼal le Armagedonoʼ (Lucas 21:29, 30).

⁴ Teʼ táan juʼunaʼ, bey xan le uláakʼoʼob ku segueroʼ ku chíikpajal jujunpʼéel baʼaloʼob eʼesik tsʼoʼok u  náatsʼal u Reino Dios. Le ken úuchuk tuláakal le baʼaloʼobaʼ, u Reino Dios, nuʼuktaʼan tumen Cristo, u Gobernanteileʼ, yaan u xuʼulsik tiʼ tuláakal u gobierno wíinik, jeʼex úuchik k-ilik teʼ xookil 46.

⁵ Chaʼant le dibujoʼoboʼ tsʼoʼoleʼ k-tsikbaltik baʼaxoʼob ku yeʼesaʼaliʼ. Tu libroil Mateo 24:6 tak 14 yéetel Lucas 21:9 tak 11, jeʼel u páajtal a xokik baʼaxoʼob kun ilbileʼ. Ilawil xan le número yaan tu tséeloʼ, láayliʼ letiʼe ku chíikpajal tu káajbal le xóotʼoloʼob utiaʼal u tsoʼolol baʼax u kʼáat u yaʼaloʼ. Koʼox ilik wa táan u béeytal bejlaʼa le baʼaxoʼob tu yaʼalaj Jesusoʼ.

⁶ 1) Jesuseʼ tu yaʼalaj: «Yaan a wuʼuyikeʼex táan u yúuchul baʼateltáambaloʼob [...]. Tumen junpʼéel kaajeʼ yaan u líikʼil tu contra uláakʼ kaaj, junpʼéel reinoeʼ yaan u líikʼil tu contra uláakʼ reino». ¿Tsʼoʼok wa a wuʼuyik u yúuchul tʼaan tiʼ baʼateltáambaloʼob teʼ noticiaʼoboʼ?... Le yáax nojoch baʼateltáambaloʼ anchaj tu jaʼabil 1914 tak 1918, yéetel le u kaʼapʼéeloʼ tu jaʼabil 1939 tak 1945. ¡Mix juntéen yanak kaʼach baʼateltáambaloʼob tiʼ tuláakal yóokʼol kaab beyoʼ! Bejlaʼeʼ yaan baʼateltáambal tuláakal tuʼux. Sáamsamal u yaʼalaʼal tiʼ televisión, tiʼ radio wa tiʼ periódico.

⁷ 2) Jesuseʼ tu yaʼalaj xan: «Yaan u yantal [...] nukuch wiʼijiloʼob tiʼ jejeláas tuʼuxoʼob». Maʼ xaaneʼ a wojel maʼ tuláakal máak yaan baʼal u jaantiʼ. U milesil máakoʼob ku kíimloʼob sáamsamal tumen minaʼan baʼal u jaantoʼob.

⁸ 3) Jesuseʼ tu yaʼalaj xan: «Yaan u yantal pakʼbeʼen kʼojaʼaniloʼob [...] jejeláas tuʼuxoʼob». ¿A wojel wa baʼax le pakʼbeʼen kʼojaʼaniloʼoboʼ?... Kʼaakʼas kʼojaʼaniloʼob ku kíimsik yaʼab máak. Le gripe españolaoʼ, junpʼéel talam kʼojaʼanil tu kíimsaj veinte millones máakoʼob chéen ichil junpʼéel jaʼab. Teʼ kʼiinoʼobaʼ, maʼ xaaneʼ maas yaʼab máakoʼob kun kíimloʼob yoʼolal sida. Tsʼoʼoleʼ le cáncer,  le kʼojaʼaniloʼob tiʼ u puksiʼikʼal máak yéetel uláakʼ kʼojaʼaniloʼoboʼ u milesil máakoʼob ku kíimskoʼob cada jaʼab.

⁹ 4) Jesuseʼ tu yaʼalaj uláakʼ baʼax kun ilbil: «Jejeláas tuʼux ken u tíituba le luʼumoʼ». ¿A wojel wa baʼax le u tíitkuba le luʼumoʼ?... Letiʼe u péek le luʼumoʼ, le oʼolal ken úuchkeʼ ku júutul le najoʼoboʼ, bey túunoʼ ku kíimsik yaʼab máakoʼob. Desde tu jaʼabil 1914, cada jaʼabeʼ yaʼab u tíitkuba le luʼumoʼ. ¿Tsʼoʼok wa a wuʼuyik u yaʼalaʼal?...

¹⁰ 5) Jesuseʼ tu yaʼaleʼ uláakʼ chíikulaleʼ letiʼ «le yaʼab kʼaas kun antaloʼ». Le oʼolal yaʼab u yúuchul ookol yéetel u beetaʼal loob. Tuláakal tuʼux sajak máak u yokol wa máax ookol tu yotoch. Mix juntéen ilaʼak u sen antal kʼasaʼanil yéetel u beetaʼal loobil jeʼex u beetaʼal bejlaʼeʼ.

¹¹ 6) Jesuseʼ tu yaʼalaj junpʼéel baʼax maas nojoch tiʼ le chíikulal yéetel le tʼaanoʼobaʼ: «U maʼalob péektsilil le Reinoaʼ yaan u kʼaʼaytaʼal tiʼ tuláakal yóokʼol kaab utiaʼal ka ojéeltaʼak tumen u kajnáaliloʼob tuláakal kaajoʼob, ken tsʼoʼokkeʼ letiʼ túun ken taalak u xuul» (Mateo 24:14). Wa ka creertik le maʼalob péektsilaʼ, unaj a tsikbaltik tiʼ uláakʼ máakoʼob. Beyoʼ jeʼel a táakpajal utiaʼal u béeytal le chíikulalaʼ.

¹² Yaan máaxoʼob aʼalikeʼ le baʼaxoʼob tu yaʼalaj Jesusoʼ úuch joʼopʼok u yantaloʼob. Baʼaleʼ mix juntéen ilaʼak u yúuchul junpuul yéetel tuláakal tuʼux. Bey túunoʼ, ¿ka naʼatik wa baʼaxoʼob táakaʼan ichil le chíikulaloʼoboʼ?... Tumen táan k-ilik u yúuchul tuláakal le baʼaloʼobaʼ, ku yeʼesikeʼ maʼ kun xáantal ken xuʼulsaʼak tiʼ le kʼasaʼan yóokʼol kaab utiaʼal ka yanak le túumben luʼumoʼ.

¹³ Ka tʼaanaj Jesús tiʼ le chíikulaloʼobaʼ tʼaanaj xan tiʼ junpʼéel baʼax ku yilaʼal cada jaʼab. Tu yaʼalaj: «Maʼ u xuʼulul a kʼáatkeʼex ich oración maʼ u kʼaʼabéettal a púutsʼleʼex tu kʼiinil keʼelil» (Mateo 24:20). ¿Baʼax a tuklik u kʼáat u yaʼal lelaʼ?...

 ¹⁴ Wa ka kʼaʼabéetchajak u púutsʼul wa máax tu kʼiinil keʼeleʼ, maʼ xaaneʼ jach talam yéetel sajbeʼentsil, ¿baʼax a tuklik jeʼel u yúuchultiʼeʼ?... Yaan u talamtal u púutsʼul, wa maʼ xaaneʼ maʼ kun béeytal. ¿Máasaʼ jach óotsil ka kíimik tu yoʼolal le nieve chéen tumen maʼ tu jóoʼsaj u tiempoil utiaʼal u séeb púutsʼuliʼ?...

¹⁵ ¿Ka naʼatik wa baʼax tu yóotaj u yaʼal Jesús le ka tu yaʼalaj maʼ u páaʼtik máak u kʼiinil keʼel utiaʼal u púutsʼuloʼ?... Táan u yaʼalikeʼ, tumen tsʼoʼok u náatsʼal u kʼiinil le Armagedonoʼ, unaj k-tsʼáaik k-óol k-meyajt Dios utiaʼal k-eʼesik k-yaabiltmaj. Wa maʼ k-jáan beetkeʼ, maʼ xaaneʼ yaan k-xantal. Wa ka úuchuktoʼon beyoʼ, yaan u yúuchultoʼon jeʼex le máakoʼob tu kʼiiniloʼob le Búulkabaloʼ, tumen chéen tu yuʼuboʼob le baʼax tu yaʼalaj Noeoʼ, baʼaleʼ maʼ ookoʼob ichil le arcaoʼ.

¹⁶ Beoraaʼ koʼox ilik bix kun pʼáatal le yóokʼol kaab ken tsʼoʼokok le Armagedonoʼ. Yaan k-ilik baʼax ken u beet Dios yoʼolal tuláakal le máaxoʼob meyajtik yéetel yaabiltmil bejlaʼoʼ.