¿TSʼOʼOK wa a janal bejlaʼeʼ?... ¿A wojel wa máax beet le janaloʼ?... Maʼ xaaneʼ a maama wa uláakʼ wa máax. Wa beyoʼ, ¿baʼaxten túun tiʼ Dios unaj k-tsʼáaik u graciasil?... Tumen letiʼ beetik u yichankil le cheʼob utiaʼal k-jaantoʼ. Baʼaleʼ kʼaʼabéet k-tsʼáaik u diosboʼotikil xan tiʼ le máax beetik wa jáalik le jaanloʼ.

² ¿Máasaʼ yaan kʼiineʼ ku tuʼubultoʼon k-tsʼáaik u diosboʼotikil le baʼaxoʼob ku beetik u maasil t-oʼolaloʼ? Ka taal Jesús, le Maʼalob j-Kaʼansaj, way Luʼumoʼ, junjaats máakoʼob yaan lepra kaʼach tiʼobeʼ maʼ tu tsʼáajoʼob u diosboʼotikil tiʼiʼ.

³ ¿A wojel wa bix le lepraoʼ?... Junpʼéel kʼojaʼanil ku beetik u tsʼúukul u bakʼel máak. Tu kʼiiniloʼob Jesuseʼ le máaxoʼob yaan lepra tiʼoboʼ unaj u náachkuntkubaʼob tiʼ u maasil. Wa juntúul máax yaan lepra tiʼ ku yilik táan u náatsʼal wa máaxeʼ, unaj u yaʼaliktiʼ maʼ u náatsʼal tu yiknal. Beyoʼ ku yilaʼal maʼ u páakʼal xan tiʼ u maasil.

⁴ Jesuseʼ jach tu yeʼesaj u yutsil tiʼ le máaxoʼob yaan lepra kaʼach tiʼoboʼ. Juntéenjeakileʼ kʼáat máan ichil junpʼéel chan kaaj utiaʼal u bin Jerusalén. Ka ook teʼ chan kaajoʼ bin diez máakoʼob yaan lepra tiʼob tu yiknal. Letiʼobeʼ tsʼoʼok u yuʼubikoʼobeʼ tsʼaʼan u páajtalil tiʼ Jesús tumen Dios utiaʼal u tsʼakik jeʼel baʼaxak kʼojaʼanileʼ.

⁵ Le máaxoʼob yaan lepra tiʼoboʼ maʼ náatsʼoʼob tu yiknal Jesusiʼ, chan náach pʼáatikoʼob. Baʼaleʼ ku creertikoʼob jeʼel u tsʼaʼakaloʼob  tumen Jesús, le Maʼalob j-Kaʼansajoʼ. Le oʼolal le ka tu yiloʼobeʼ tu yawtoʼobtiʼ: ‹¡Jesús, j-Kaʼansaj, áantoʼoniʼ!›.

⁶ ¿Ka chʼaʼik wa óotsilil tiʼ le kʼojaʼanoʼoboʼ?... Jesuseʼ tu chʼaʼaj óotsilil tiʼob. U yojel jach yaj u tsʼáaik lepra tiʼ máak. Le oʼolal tu núukajtiʼob: «Xeeneʼex ka a weʼesabaʼex tiʼ le sacerdoteʼoboʼ» (Lucas 17:11-14).

⁷ ¿Baʼaxten aʼalaʼabtiʼob tumen Jesús ka xiʼikoʼobiʼ? Yoʼolal le ley u tsʼaamaj Jéeoba tiʼ u kaajal yoʼolal le máaxoʼob yaan lepra tiʼoboʼ. Le leyoʼ ku yaʼalikeʼ le sacerdote tsʼaʼan tumen Diosoʼ letiʼ unaj u yilik u wíinklil le máax yaan lepra kaʼach tiʼ utiaʼal u yaʼaliktiʼ wa tsʼoʼok u yutstaloʼ. Le ken utsakeʼ jeʼel u páajtal u suut kajtal ichil le máaxoʼob maʼ kʼojaʼanoʼoboʼ (Levítico 13:16, 17).

 ⁸ Baʼaleʼ le máaxoʼob yaan lepra kaʼach tiʼoboʼ maʼ utschajkoʼobiʼ. Le oʼolaleʼ, ¿binoʼob wa u yiloʼob le sacerdote jeʼex aʼalaʼabiktiʼob tumen Jesusoʼ?... Binoʼob. Tu creertoʼob jeʼel u tsʼaʼakaloʼob tumen Jesuseʼ. ¿Baʼax túun úuchi?

⁹ Le táan u bin u yiloʼob le sacerdoteoʼ, utschaj u wíinkliloʼob. Letiʼe utsil tu kʼamoʼob úuchik u creertikoʼob jeʼel u tsʼaʼakaloʼob tumen Jesusoʼ. ¡Bukaʼaj wal kiʼimakchajik u yóoloʼobeʼ! Baʼaleʼ ¿baʼax unaj u beetkoʼob kaʼachi? ¿Baʼax jeʼel a beetik kaʼach techeʼ?...

¹⁰ Juntúul tiʼ le máaxoʼob utschajoʼ suunaj u yil Jesuseʼ ka joʼopʼ u kiʼikiʼtʼantik Jéeoba. Leloʼ letiʼe baʼax unaj u beetkoʼ, tumen Dios tsʼáa u páajtalil u tsʼaʼakal. Tsʼoʼoleʼ ka xolaj tu táan Jesuseʼ ka tu tsʼáaj u diosboʼotikil tiʼ. Jach kiʼimakchaj u yóol úuchik u tsʼaʼakal tumen Jesús.

¹¹ ¿Kux túun le uláakʼ nueve máakoʼoboʼ? Jesuseʼ tu yaʼalaj: ‹Tu diezil tsʼaʼakoʼob, ¿máasaʼ? ¿Tuʼux túun tsʼoʼok le uláakʼ nueveoʼ? ¿Chéen wa juntúul suunaj u tsʼáa nojbeʼenil tiʼ Diosaʼ?›.

¹² Beyoʼ. Chéen juntúul tiʼ le diez máakoʼob tu kiʼikiʼtʼantaj Dios yéetel suunaj u tsʼáa u diosboʼotikil tiʼ Jesusoʼ.  Juntúul samaritano, juntúul j-táanxel luʼumil. Le uláakʼ nueveoʼ maʼ tu tsʼáajoʼob u graciasil tiʼ Diosiʼ mix tiʼ Jesús (Lucas 17:15-19).

¹³ ¿Tiʼ máakalmáak tiʼ letiʼob chíikaʼanechiʼ? ¿Máasaʼ k-kʼáat k-beet jeʼex le samaritanooʼ?... Le oʼolaleʼ, le ken beetaʼak baʼax maʼalob t-oʼolaleʼ, ¿baʼax unaj u kʼaʼajaltoʼon?... K-tsʼáaik u diosboʼotikil. Kex u maasil ku tuʼubul u tsʼáaik u diosboʼotikileʼ, toʼoneʼ maʼalob ka k-beete, tumen leloʼ ku kiʼimakkúuntik u yóol Jéeoba Dios bey xan Jesús, u Hijo.

¹⁴ Wa ka a máans ta tuukuleʼ, yaan a tsʼáaik cuentaeʼ, yaʼab máaxoʼob tsʼoʼok u beetkoʼob baʼax maʼalob ta woʼolal. ¿Yaan wa kʼiin tsʼoʼok a kʼojaʼantal?... Maʼ xaaneʼ maʼ tsaʼayak tech junpʼéel talam kʼojaʼanil jeʼex le diez máakoʼob yaan kaʼach lepra tiʼoboʼ, baʼaleʼ tsʼoʼok u tsaʼayal tech seʼen wa tsʼoʼok u yaatal a nakʼ. ¿Kanáantaʼabech wa tumen wa máax?... Maʼ xaaneʼ tsʼaʼabtech tsʼaak yéetel áantaʼabech. ¿Bix ta wuʼuyilaba úuchik a wáantaʼal?...

¹⁵ Le samaritanooʼ tu tsʼáaj u diosboʼotikil tiʼ Jesús úuchik u tsʼaʼakal, leloʼ tu beetaj u kiʼimaktal u yóol Jesús. A tuklikeʼ, ¿jeʼel wa u kiʼimaktal u yóol a taata wa a maama wa ka tsʼáaik u diosboʼotikil tiʼob yoʼolal le baʼax ku beetkoʼob ta woʼolaloʼ?... Jeʼeleʼ.

¹⁶ Yaan máaxoʼob beetik baʼaloʼob maʼalob ta woʼolal sáamsamal wa tuláakal le semanaʼoboʼ. Maʼ xaaneʼ u meyajoʼob yéetel uts tu yich u beetkoʼob. Baʼaleʼ maʼ xaaneʼ jeʼel u tuʼubultech a tsʼáaik u  diosboʼotikil tiʼobeʼ. Maʼ xaaneʼ a maestraeʼ jach ku tsʼáaik u yóol u kaʼansech. Leloʼ u meyaj, baʼaleʼ jeʼel u kiʼimaktal u yóol wa ka tsʼáaik u diosboʼotikil tiʼeʼ.

¹⁷ Yaan kʼiineʼ ku beetaʼaltoʼon uts tumen u maasil. ¿Tsʼoʼok wa u jeʼebel tech joonaj utiaʼal ka ookkech? Ken jaankecheʼ, ¿ku tiʼichʼil wa tech le janal tumen maʼ ta chukikoʼ? Jach maʼalob ka a tsʼáa u diosboʼotikil tak tiʼ baʼaxoʼob mejentak.

¹⁸ Wa ku suuktal k-tsʼáaik u diosboʼotikil le baʼaxoʼob ku beetik u maasil t-oʼolaloʼ, maas jeʼel u kʼaʼajaltoʼon k-tsʼáaik gracias tiʼ Dios, k-Taata yaan teʼ kaʼanoʼ. ¿Máasaʼ jach yaʼab baʼaxoʼob jeʼel u páajtal k-tsʼáaik u graciasil tiʼeʼ? Ku tsʼáaiktoʼon le kuxtaloʼ yéetel tuláakal baʼaloʼob jatsʼutstak. Le oʼolal jach yaan baʼax oʼolal k-tsʼáaik nojbeʼenil tiʼ Dios sáamsamal.