¿TSʼOʼOK wa u yaʼalaʼaltech ka a beet baʼax maʼ maʼalobiʼ?... ¿Tsʼoʼok wa a retartaʼal utiaʼal ka a beete? ¿Tsʼoʼok wa u yaʼalaʼaltech jeʼel u taasiktech kiʼimak óolal yéetel maʼ kʼaas ka a beeteʼ?... Le máax aʼaliktech beyoʼ táan u túuntik a wóol.

² ¿Baʼax unaj k-beetik ken túuntaʼak k-óol? ¿Unaj wa k-beetik baʼax kʼaas?... Leloʼ maʼ kun utstal tu tʼaan Jéeoba Dios. Baʼaleʼ ¿a wojel wa máax jeʼel u kiʼimaktal u yóoleʼ?... Satanás, le Kʼaasilbaʼaloʼ.

³ Satanaseʼ u enemigo Dios, yéetel k-enemigo xan. Maʼ tu páajtal k-ilik, tumen espíritu, baʼaleʼ letiʼeʼ jeʼel u páajtal u yilkoʼoneʼ. Juntéenjeakileʼ le Kʼaasilbaʼaloʼ tu túuntaj u yóol Jesús, le Maʼalob j-Kaʼansajoʼ. Koʼox ilik baʼax tu beetaj Jesús utiaʼal k-kanik baʼax unaj k-beetik ken túuntaʼak k-óol.

⁴ Jesuseʼ mantatsʼ tu beetaj baʼax u kʼáat Dios, lelaʼ tu yeʼesaj le ka okjaʼanaj teʼ tu áalkab jaʼil le Jordanoʼ. Maʼ úuch okjaʼanak ka túuntaʼab u yóol tumen Satanasiʼ. Le Bibliaoʼ ku yaʼalikeʼ «jeʼepaj túun le kaʼan» tiʼ Jesusoʼ (Mateo 3:16). Maʼ xaaneʼ leloʼ u kʼáat u yaʼaleʼ, káaj u kʼaʼajsik Jesús le bix kuxlik kaʼach teʼ kaʼan yéetel Diosoʼ.

⁵ Ka tsʼoʼok u yokjaʼeʼ, Jesuseʼ bin teʼ desierto utiaʼal u tuukul tiʼ le baʼaxoʼob ku kʼaʼajsikoʼ. Tu beetaj cuarenta kʼiinoʼob yéetel cuarenta áakʼaboʼobiʼ. Tiʼ tuláakal le  kʼiinoʼoboʼ Jesuseʼ maʼ jaaniʼ, le oʼolal jach wiʼijchaji. Letiʼe ka túuntaʼab túun u yóol tumen Satanasoʼ.

⁶ Le Kʼaasilbaʼaloʼ tu yaʼalajtiʼ: «Wa u paalech Dioseʼ, aʼal ka suunak waajil le tuunichoʼobaʼ». ¡Bukaʼaj wal kiʼil jeʼel u jaantik Jesús junxéetʼ waajeʼ! Baʼaleʼ ¿jeʼel wa u páajtal u sutik waajil le tuunichoʼob kaʼachoʼ?... Jeʼeleʼ, tumen letiʼeʼ u Hijo Dios yéetel tsʼaʼan páajtalil tiʼ.

⁷ ¿Jeʼel wa kaʼach a sutik waajil junpʼéel tuunich wa ka aʼalaʼaktech tumen le Kʼaasilbaʼaloʼ?... Jesuseʼ wiʼij kaʼachi. ¿Maʼ wa maʼalob ka u beet kaʼach kex chéen juntéen tumen wiʼijiʼ?... Jesuseʼ u yojel maʼ maʼalob ka meyajnak le páajtalil tsʼaʼan kaʼach tiʼ tumen Jéeoba utiaʼal u beetikoʼ. Unaj u meyajtiʼ utiaʼal u yáantik le máakoʼob u natsʼubaʼob tiʼ u Taataoʼ, maʼ utiaʼal u kaxtik chéen u yutsiliʼ.

⁸ Bey túunoʼ, Jesuseʼ maʼ tu beetaj le baʼax tu yaʼalaj Satanasoʼ, baʼaxeʼ tu yaʼalajtiʼ le baʼax ku yaʼalik le Bibliaoʼ: «Maʼ chéen yéetel waaj unaj u kuxtal wíinikiʼ, baʼaxeʼ tak yéetel tuláakal tʼaan ku jóokʼol tu chiʼ Jéeoba». Jesuseʼ u yojleʼ maas kʼaʼanaʼan u beetik baʼax uts tu tʼaan Jéeoba ke u kaxtik baʼal u jaante.

⁹ Baʼaleʼ le Kʼaasilbaʼaloʼ tu kaʼa túuntaj u yóol. Beoraaʼ tu bisaj Jesús tak Jerusalén ka tu naʼaksaj tu kaʼanlil le templooʼ. Ka tu yaʼalajtiʼ: ‹Wa u paalech Dioseʼ pulaba, tumen le Kiliʼich  Tsʼíiboʼ ku yaʼalikeʼ Dioseʼ yaan u túuxtik u angeloʼob utiaʼal maʼ u yúuchultech loob›.

¹⁰ ¿Baʼaxten tu yaʼalaj Satanás leloʼ?... U kʼáat u túunt u yóol Jesús utiaʼal ka u beet junpʼéel baʼax sajbeʼentsil. Baʼaleʼ Jesuseʼ maʼ tu kaʼa beetaj le baʼax tu yaʼaloʼ, baʼaxeʼ tu yaʼalajtiʼ: «Le Kiliʼich Tsʼíiboʼ ku yaʼalik xan: ‹Maʼ unaj a túuntik u yóol Jéeoba a Diosiʼ›». Jesuseʼ u yojel maʼ maʼalob ka u tsʼáa u kuxtal tu táan kíimil utiaʼal u túuntik u yóol Jéeobaiʼ.

¹¹ Baʼaleʼ Satanaseʼ maʼ tu pʼataj u paach Jesusiʼ. Tu bisaj tiʼ junpʼéel puʼuk jach kaʼanaleʼ ka tu yeʼesajtiʼ tuláakal u reinoiloʼob wa u gobiernoiloʼob yóokʼol kaab. Ka tu yaʼalajtiʼ: «Tuláakal le baʼaloʼobaʼ yaan in tsʼáaiktech wa ka xoltal a adorarten kex chéen juntéen».

¹² Chéen tukult le baʼax tu yaʼalaj u tsʼáaik le Kʼaasilbaʼaloʼ. ¿Jach wa tu jaajil u tiaʼal Satanás tuláakal le reinoʼob, wa u gobiernoʼob wíinikoʼ?... Jesuseʼ maʼ tu yaʼalaj wa maʼ u tiaʼaliʼ. Wa chéen táan u tuus le Kʼaasilbaʼaloʼ tsʼoʼok kaʼach u yaʼalaʼaltiʼ tumen Jesuseʼ. Jeʼex túun k-ilkoʼ, Satanás u gobernanteil tuláakal le yóokʼol kaabaʼ. Tak le Bibliaoʼ ku yaʼalikeʼ letiʼ «u gobernanteil le yóokʼol kaabaʼ» (Juan 12:31).

¹³ ¿Baʼax jeʼel a beetik wa ka u yaʼal le Kʼaasilbaʼal jeʼel u tsʼáaiktech wa baʼax wa ka a adorartoʼ?... Jesuseʼ u yojel maʼ maʼalob ka u adorart le Kʼaasilbaʼal, kex jeʼel baʼalak ka aʼalaʼak u tsʼaʼabaltiʼoʼ. Le oʼolal tu yaʼalajtiʼ: «¡Xeen, Satanás! Tumen le Kiliʼich Tsʼíiboʼ ku yaʼalik: ‹Jéeoba a Dios unaj a adorartik, yéetel chéen letiʼ kʼaʼabéet a meyajtik›» (Mateo 4:1-10; Lucas 4:1-13).

¹⁴ Toʼon xaneʼ láayliʼ ku túuntaʼal k-óoleʼ. ¿A wojel wa bixi?... Koʼox aʼalikeʼ ku beetaʼal wa baʼax chʼujukil tumen a maama yéetel ku yaʼaliktech maʼ unaj a séeb jaantikiʼ. Baʼaleʼ techeʼ jach wiʼijech yéetel jach taak a túuntik. ¿Yaan wa a beetik le baʼax ku yaʼalik a maamaoʼ?... Satanaseʼ maʼ u kʼáat ka a wuʼuy tʼaaniʼ.

 ¹⁵ Kʼaʼajaktech Jesús, letiʼeʼ wiʼij kaʼachi, baʼaleʼ u yojleʼ maas kʼaʼanaʼan u beetik baʼax uts tu tʼaan Dios ke u janal. Teech xaneʼ jeʼel a beetik jeʼex Jesús wa ka wuʼuyik u tʼaan a maamaeʼ.

¹⁶ Maʼ xaaneʼ a wéet paaliloʼobeʼ jeʼel u yaʼalikoʼobtech ka a lukʼ wa baʼax pastillail utiaʼal ka kiʼimakchajak a wóoleʼ. Baʼaleʼ maʼ xaaneʼ le pastillaoʼ droga, jeʼel u kʼojaʼankúunskecheʼ wa jeʼel tak u kíimskecheʼ. Wa maʼ xaan xaneʼ jeʼel u  tsʼaʼabaltech chamal a tsʼuʼutsʼeʼ, lelaʼ láayliʼ jeʼel u beetik kʼaas tiʼ a wíinklileʼ; maʼ xaaneʼ ku yaʼalikoʼobtech: «¡A ke maʼ ta tsʼuʼutsʼik!». ¿Baʼax ken a beete?...

¹⁷ Kʼaʼajaktech baʼax tu beetaj Jesús. Satanaseʼ taak kaʼach u beetik u tsʼáaik u kuxtal Jesús tu táan kíimil le ka tu yaʼalajtiʼ ka u puluba desde tu kaʼanlil le templooʼ. Baʼaleʼ Jesuseʼ maʼ tu beetiʼ. ¿Baʼax jeʼel a beetik wa ka aʼalaʼaktech a beet junpʼéel baʼax kʼaaseʼ?... Jesuseʼ maʼ tu beetaj baʼax tu yaʼalaj Satanasiʼ. Teech xaneʼ maʼ unaj a beetik le baʼaloʼob maʼ maʼalobtak ku yaʼalaʼaltechoʼ.

¹⁸ Maʼ xaaneʼ jeʼel u yaʼalaʼaltech ka a adorart junpʼéel imageneʼ, lelaʼ junpʼéel baʼal ku yaʼalik le Biblia maʼ maʼaloboʼ (Éxodo 20:4, 5). Maʼ xaaneʼ lelaʼ jeʼel u yúuchul ta escuela le táan u beetaʼal junpʼéel kʼiinbesajiloʼ, yéetel ku yaʼalaʼaltecheʼ maʼ kun béeytal a kaʼa okol escuela wa maʼ ta adorartikiʼ. ¿Baʼax ken a beete?...

¹⁹ Wa tuláakal máak beetik baʼax maʼalobeʼ, maʼ talam ken k-beet xaniʼ, baʼaleʼ jeʼel u talamtaltoʼon wa yaʼab máax aʼaliktoʼon ka k-beet baʼax kʼaaseʼ. Maʼ xaaneʼ jeʼel u yaʼalikoʼobtecheʼ maʼ jach kʼaas le baʼax ku beetkoʼoboʼ. Baʼaleʼ u maas kʼaʼanaʼanileʼ: ¿bix u yilik Dios? Letiʼeʼ maas yaʼab baʼax u yojel tiʼ toʼon.

²⁰ Le oʼolaleʼ kex jeʼel baʼalak ka u yaʼal u maasileʼ, chéen unaj k-beetik le baʼaxoʼob ku yaʼalik Dios maʼalobtakoʼ. Beyoʼ yaan k-lúubul utsil tiʼ Dios yéetel maʼ ken k-beet baʼax uts tu tʼaan le Kʼaasilbaʼaloʼ.