¿YAAN wa mejen paalal a kʼaj óol ku tuklikoʼob jach yaan u muukʼoʼob yéetel mantatsʼ táan u kaxtikoʼob baʼateʼel?... ¿Uts ta tʼaan wa a biskaba tu yéeteloʼob? ¿Wa maas uts ta tʼaan a biskaba yéetel le utstakoʼob yéetel maʼatech u kaxtikoʼob baʼateloʼ?... Jesús, le Maʼalob j-Kaʼansajoʼ, tu yaʼalaj: «Kiʼimak u yóol le máaxoʼob ku meyajoʼob utiaʼal ka yanak jeetsʼeliloʼ, tumen tiʼ letiʼobeʼ yaan u yaʼalaʼal u paalaloʼob Dios» (Mateo 5:9).

² Baʼaleʼ ¿máasaʼ yaan kʼiineʼ yaan máakoʼobeʼ ku beetkoʼob k-tsʼíikil yoʼolal baʼax ku beetkoʼob?... Le oʼolal yaan kʼiineʼ ku taaktal k-sutik u jeel tiʼob. Tiʼ u disipuloʼob Jesuseʼ úuchtiʼob bey le táan u binoʼob tu kaajil Jerusalenoʼ. Paʼatik in jáan tsikbaltiktech.

³ Le tsʼoʼok u jóokʼol u binbaloʼoboʼ, aʼalaʼabtiʼob tumen Jesús ka xiʼikoʼob tiʼ junpʼéel chan kaaj yaan  Samaria utiaʼal u kaxtikoʼob tuʼux u pʼáatloʼob junpʼéel áakʼab. Baʼaleʼ le máakoʼob teʼ chan kaajoʼ maʼ utschaj tu tʼaanoʼobiʼ, tumen yaanal u religionoʼob. Tsʼoʼoleʼ le samaritanoʼoboʼ maʼatech u lúubul utsil tiʼob le máaxoʼob ku binoʼob Jerusalén u adorartoʼob Diosoʼ.

⁴ Wa tiʼ teech ka úuchuk beyoʼ, ¿baʼax jeʼel a beetkeʼ? ¿Jeʼel wa a kʼuuxil kaʼacheʼ? ¿Jeʼel wa u taaktal a sutik u jeeleʼ?... Leloʼ letiʼe baʼax taakchaj u beetik Santiago yéetel Juanoʼ. Tu yaʼaloʼob tiʼ Jesús: «¿A kʼáat wa ka k-aʼal ka éemek kʼáakʼ teʼ kaʼan utiaʼal ka xuʼulsaʼakoʼoboʼ?». Le oʼolal tu tsʼáaj u kʼaabaʼtoʼob «u Paalal u Kíilbal Cháak». Jesuseʼ tu yaʼalajtiʼob maʼ maʼalob ka u beetoʼob beyoʼ (Lucas 9:51-56; Marcos 3:17).

⁵ U jaajileʼ yaan kʼiineʼ ku beetaʼaltoʼon kʼaas tumen uláakʼ máakoʼob. Maʼ xaaneʼ yaan mejen paalaloʼobeʼ maʼ tu chaʼikoʼob a báaxal tu yéeteloʼob. Maʼ xaaneʼ jeʼel tak u yaʼalikoʼobtecheʼ: «Maʼ k-kʼáat ka taalakech wayeʼ». ¿Máasaʼ ku yaatal t-óol ken aʼalaʼaktoʼon beyoʼ? Maʼ xaaneʼ ku taaktal k-sutik u jeel baʼax ku beetaʼaltoʼon. Baʼaleʼ ¿maʼalob wa ka k-beete?...

⁶ Taas a Biblia utiaʼal k-xokik Proverbios, capítulo 24, versículo 29. Teʼeloʼ ku yaʼalik: «Mix bikʼin a tuklik a sutik u jeel loob, tiʼ máax tu beetaj tiʼ teech beyoʼ».

⁷ ¿Bix a naʼatik le baʼax ku yaʼalik le tekstoaʼ?... U kʼáat u yaʼaleʼ maʼ unaj k-sutik u jeel baʼax ku beetaʼaltoʼoniʼ. Maʼ unaj k-beetik kʼaas tiʼ wa máax tumen tsʼoʼok u beetiktoʼon kʼaasiʼ. ¿Kux túun wa yaan máax ku kaxtiktech baʼateʼel? Maʼ xaaneʼ ku pochʼkech utiaʼal u beetik a tsʼíikil, wa ku cheʼejtikech wa ku yaʼalik saajkech. Chéen tukult wa ku yaʼaliktech sajluʼumech. ¿Baʼax unaj a beetik? ¿Unaj wa a ketik tiʼ?...

⁸ Koʼox kaʼa ilik baʼax ku yaʼalik le Bibliaoʼ. Kaxt Mateo, capítulo 5, versículo 39. Jesuseʼ ku yaʼaliktoʼon: «Maʼ a sutkeʼex u jeel le loob ku  beetaʼalteʼexoʼ, baʼaxeʼ máax ku lajkech ta x-noʼoj pʼuʼukeʼ, sut uláakʼ u tséel a pʼuʼuk tiʼ». ¿Baʼax a tuklik tu yóotaj u yaʼal Jesús yéetel le tʼaanoʼobaʼ? ¿U kʼáat wa u yaʼal wa ku loʼoxol juntséel a pʼuʼukeʼ, unaj a sutik le uláakʼ juntséeloʼ?...

⁹ Maʼatech, maʼ le tu yóotaj u yaʼal Jesusiʼ. Junpuul laajeʼ chéen bey jeʼex ka léenchʼintaʼak máakeʼ, maʼ jeʼex junpuul looxeʼ. Le máax ku lajkoʼon wa ku léenchʼintikoʼonoʼ chéen táan u kaxtik baʼateʼel. U kʼáat ka kʼuuxilnakoʼon. Baʼaleʼ ¿baʼax jeʼel u yúuchul wa k-kʼuuxil yéetel k-túulchʼintik xaneʼ?... Maʼ xaneʼ yaan k-baʼateʼel tu yéetel.

¹⁰ Baʼaleʼ Jesuseʼ maʼ u kʼáat ka baʼatelnak u disipuloʼobiʼ. Le oʼolal tu yaʼalaj wa k-laʼajal tumen wa máaxeʼ, maʼ unaj k-sutik u jeeliʼ. Maʼ unaj k-kʼuuxiliʼ mix k-baʼateʼel. Tumen wa k-beetkeʼ k-eʼesik beyoʼon jeʼex le máax kaxtik le baʼateloʼ.

 ¹¹ Wa ka káajak junpʼéel baʼateleʼ, ¿baʼax a tuklik maas maʼalob ka a beete?... Maas maʼalob ka lukʼkechiʼ. Maʼ xaan xaneʼ le máax kaxtik le baʼateloʼ ku kaʼa léenchʼintikech. Baʼaleʼ maʼ xaaneʼ maʼ tu seguer u beetik mix baʼal. Wa ka lukʼleʼ maʼ u kʼáat u yaʼal wa saajkechiʼ, baʼaxeʼ ku yeʼesik techeʼ a kʼáat a beet baʼax maʼalob.

¹² Baʼaleʼ ¿baʼax jeʼel u yúuchul wa ka baʼateʼel yéetel ka ganarnakecheʼ? ¿Baʼax jeʼel u yúuchul ken tsʼoʼokkeʼ?... Le máax ta ganartoʼ maʼ xaaneʼ jeʼel u suut yéetel u amigoʼob utiaʼal u beettech loob yéetel junpʼéel cheʼ wa yéetel junpʼéel cuchilloeʼ. ¿Tsʼoʼok wa a naʼatik baʼaxten maʼ u kʼáat Jesús ka baʼatelnakoʼoniʼ?...

¹³ ¿Baʼax unaj k-beetik wa k-ilik yaan máaxoʼob táan u baʼateloʼob? ¿Unaj wa k-tsʼáaikba tu tséel junjaatsiʼ?... Le Bibliaoʼ ku yaʼaliktoʼon baʼax unaj k-beetik. Koʼox kaxtik Proverbios, capítulo 26, versículo 17. Ku yaʼalik: «U yokesikuba baʼateʼel tu yoʼolal yaanal máakeʼ bey u maʼachal juntúul peekʼ tu xiknoʼobeʼ».

¹⁴ ¿Baʼax jeʼel u yúuchul wa ka chʼuytal tu xikin juntúul peekʼeʼ? ¿Máasaʼ jeʼel u chiʼikecheʼ? Wa maas táan u tokikuba le peekʼoʼ maas chich unaj a machik utiaʼal maʼ u púutsʼul yéetel maas yaan u pʼuʼujul. Wa ka chaʼikeʼ, maʼ xaaneʼ jeʼel u chiʼikecheʼ. Baʼaleʼ ¿jeʼel wa u páajtal a machik tu xikin tuláakal u kʼiinil a kuxtaleʼ?...

¹⁵ Wa k-oksikba xan ichil junpʼéel baʼateleʼ, chéen t-juunal k-kaxtik talamil. Maʼ xaaneʼ maʼ k-ojel máax káajs le baʼateloʼ wa baʼax  oʼolal ku baʼateloʼob. Maʼ xaaneʼ le máax ku loʼoxloʼ yaan baʼax tu yoklaj. Wa k-áantikeʼ, juntúul j-ookol k-áantik. ¿Máasaʼ maʼ maʼalob ka k-beetiʼ?

¹⁶ Le oʼolaleʼ, ¿baʼax unaj a beetik ken a wil táan u yúuchul baʼateʼel?... Wa teʼ escuelaoʼ, jeʼel u páajtal a bin a waʼal tiʼ le maestrooʼ. Wa maʼ ta escuelaeʼ, jeʼel u páajtal a waʼalik tiʼ a taataʼobeʼ wa tiʼ juntúul policía. Kex taak u baʼateʼel wa máax t-éeteleʼ, maʼ unaj k-ketkiʼ.

¹⁷ Toʼoneʼ k-ilik maʼ k-oksikba tiʼ baʼateʼel, tumen táan k-tsaypachtik Jesús. Beyoʼ k-eʼesik jach chúukaʼan k-óol k-beet baʼax maʼalob. Le Bibliaoʼ ku yaʼalikeʼ u disipuloʼob Jesuseʼ ‹minaʼan baʼax oʼolal u baʼateloʼob, baʼaxeʼ kʼaʼabéet u yeʼesik u yutsiloʼob tiʼ u maasil› (2 Timoteo 2:24).