¿TSʼOʼOK wa a wuʼuyik u yaʼalaʼal yaan u xuʼulsaʼal le yóokʼol kaabaʼ?... Bejlaʼeʼ jach yaʼab u yaʼalaʼal. Yaan máaxoʼob tuklikeʼ wíinik kun xuʼulsik yéetel junpʼéel nojoch baʼateʼel wa yéetel bomba atómica. Yaan máakoʼob tuklik xaneʼ Dios kun xuʼulsik le kiʼichkelem Luʼumaʼ, bey xan le kaʼan chuup yéetel jatsʼuts eekʼoʼob wa estrellaʼoboʼ. Kux teech, ¿baʼax ka tuklik tu yoʼolal?...

² Jeʼex tsʼoʼok k-kanikoʼ, le Bibliaoʼ ku tʼaan tiʼ bix kun xuʼulsbil yóokʼol kaab. Ku yaʼalikeʼ «le yóokʼol kaabaʼ táan u bin u xuʼulultiʼ» (1 Juan 2:17). A tuklikeʼ, ¿táan wa u yaʼalik yaan  u xuʼulsaʼal tiʼ le Luʼumaʼ?... Maʼatech, le Bibliaoʼ ku yaʼalikeʼ Dioseʼ tu beetaj le Luʼum «utiaʼal ka yanak u kajnáaliloʼob[oʼ]», utiaʼal ka kajlak yéetel kiʼimak óolal máakiʼ (Isaías 45:18). Salmo 37:29, ku yaʼalik: «Le utsil máakoʼoboʼ bíin u tiaʼalintoʼob le luʼumaʼ; tiʼ bíin kajlakoʼob utiaʼal jaʼaboʼob minaʼan u xuul[iʼ]». Le oʼolal le Bibliaoʼ ku yaʼalikeʼ le Luʼumaʼ yaan u pʼáatal utiaʼal mantatsʼ (Salmo 104:5; Eclesiastés 1:4).

³ Wa le u xuul yóokʼol kaab maʼ táan u tʼaan tiʼ u xuʼulsaʼal le Luʼumaʼ, ¿baʼax túun u kʼáat u yaʼale?... Utiaʼal k-ojéeltik baʼax u kʼáat u yaʼaleʼ, koʼox ilik baʼax úuch tu kʼiiniloʼob Noé. Le Bibliaoʼ ku yaʼalik: «Xuʼulsaʼab tiʼ le úuchben yóokʼol kaab le ka beetaʼab u búulul ich jaʼoʼ» (2 Pedro 3:6).

⁴ ¿Yaan wa máax tu salvartuba le ka taal le Búulkabal tu kʼiiniloʼob Noeoʼ?... Le Bibliaoʼ ku yaʼalikeʼ Dioseʼ «tu kanáantaj Noé, juntúul máax tu kʼaʼaytaj toj kuxtal, paʼteʼ yéetel uláakʼ siete máakoʼob le ka tu taasaj le Búulkabal yóokʼol junpʼéel luʼum tuʼux kajaʼan máakoʼob ku binoʼob tu contraoʼ» (2 Pedro 2:5).

⁵ Bey túunoʼ, ¿letiʼ wa le Luʼum xuʼulsaʼaboʼ, wa letiʼe kʼasaʼan máakoʼoboʼ?... Le Bibliaoʼ ku yaʼalikeʼ ‹xuʼulsaʼab tiʼ le kʼasaʼan máakoʼob ku binoʼob tu contra Diosoʼ›. Kʼaʼajak xan techeʼ Noeeʼ kʼaj óoltaʼab bey ‹juntúul máax ku kʼaʼaytajeʼ›. ¿Baʼax a tuklik tu kʼaʼaytaj?... Tu yaʼalaj tiʼ u maasil táan u náatsʼal u kʼiinil u xuʼulsaʼal le «luʼum» tiʼ le kʼiinoʼob jeʼeloʼ.

⁶ Juntéenjeakileʼ Jesuseʼ tu yaʼalaj tiʼ u disipuloʼob le baʼax ku beetik le máakoʼob tu kʼiiniloʼob le Búulkabaloʼ: «Teʼ kʼiinoʼob táanil tiʼ u taal le Búulkabaloʼ, le máakoʼoboʼ táan u jaanloʼob, táan u yukʼuloʼob, le xiiboʼob yéetel le koʼoleloʼoboʼ táan u tsʼoʼokol u beeloʼob, tak teʼ kʼiin ka ook Noé ichil le arcaoʼ maʼ tu beetoʼob u cuentail baʼax aʼalaʼabtiʼobiʼ, tak le kʼiin ka taal le Búulkabaloʼ ka túun láaj  xuʼulsaʼaboʼob». Jesuseʼ tu yaʼaleʼ láayliʼ xan bey kun úuchul tiʼ le máakoʼob teʼ kʼiinoʼobaʼ (Mateo 24:37-39).

⁷ Le baʼax tu yaʼalaj Jesusoʼ ku yeʼesikeʼ yaan baʼax jeʼel k-kanik tiʼ le baʼaxoʼob ku beetik kaʼach le máakoʼob táanil tiʼ le Búulkabaloʼ. Teʼ xookil 10 tiʼ le libroaʼ, t-ilaj le baʼaxoʼob ku beetkoʼob kaʼachoʼ. ¿Kʼajaʼan wa tech?... Yaan tiʼ le xiiboʼoboʼ jach kʼasaʼanoʼob yéetel ku sen beetkoʼob loob. Baʼaleʼ jeʼex úuchik u yaʼalik Jesuseʼ, u maas yaʼabil le máakoʼoboʼ maʼ tu beetoʼob u cuentail le baʼax tu kʼaʼaytaj Noeoʼ.

⁸ Baʼaleʼ kʼuch u kʼiinil u yaʼalik Jéeoba tiʼ Noé yaan u xuʼulsik tiʼ le kʼasaʼan máakoʼob yéetel junpʼéel Búulkabaloʼ. Tu yaʼaleʼ le jaʼoʼ yaan u bulik tuláakal le Luʼumaʼ, yéetel tak u maas kaʼanlil le witsoʼoboʼ. Jéeobaeʼ tu yaʼalaj tiʼ Noé ka u beet junpʼéel nojoch arca. Le arcaoʼ bey junpʼéel nojoch caja chowak, jeʼex a wilik teʼ táan juʼun 238.

⁹ Dioseʼ tu yaʼalaj tiʼ Noé ka u beet junpʼéel nojoch arca utiaʼal u yokol letiʼ yéetel u familia bey xan yaʼabkach baʼalcheʼob utiaʼal u salvarkubaʼob. Noé yéetel u familiaeʼ yaʼab meyaj tu beetoʼob. Tu chʼakoʼob nukuch cheʼob yéetel tu jóoʼsoʼob u tablail utiaʼal u beetkoʼob le arcaoʼ. Máan yaʼab jaʼaboʼob ka tu tsʼoʼoksoʼob, tumen jach nojoch.

¹⁰ ¿Kʼajaʼan wa tech baʼax uláakʼ tu beetaj Noé le táan u beetik le arcaoʼ?... Kʼaʼaytajnaj utiaʼal u yaʼalik tiʼ le máakoʼob táan u taal junpʼéel búulkabaloʼ. ¿Creertaʼab wa baʼax tu yaʼalaj? Chéen u familia creerte. U maasil máakoʼoboʼ chéen chʼíikoʼob tiʼ yaanal baʼaloʼob. ¿Kʼajaʼan wa tech baʼax ku yaʼalik Jesús táan u beetkoʼob?... Táan u jaanloʼob, táan u yukʼuloʼob yéetel táan u tsʼoʼokol u beeloʼob. Letiʼobeʼ ku tuklikoʼobeʼ maʼalob baʼax ku beetkoʼob, le oʼolal maʼ tu jóoʼsoʼob tiempo utiaʼal u yuʼubikoʼob baʼax tu yaʼalaj Noeiʼ. Koʼox ilik baʼax úuchtiʼob.

¹¹ Ka tsʼoʼok u yokol Noé yéetel u familia ichil le arcaoʼ, kʼaʼal u joonajil tumen Jéeoba. Le u maasil máakoʼoboʼ maʼ tu creertoʼob wa yaan  u taal le Búulkabaloʼ. Chéen ka káaj u kʼáaxal jaʼ, baʼaleʼ maʼ jeʼex suukil u kʼáaxal bejlaʼeʼ, baʼaxeʼ maas jach kʼaʼam. Tu séebaʼanileʼ anchaj áalkab jaʼob kʼaʼam u yuʼubaʼal u bin u juum, ku lúuʼsik nukuch cheʼob yéetel chéen bey mix baʼal u bisik le nukuch tuunichoʼoboʼ. ¿Baʼax úuch tiʼ le máaxoʼob maʼ ookoʼob teʼ arcaoʼ?... Jesuseʼ tu yaʼalaj: «Láaj xuʼulsaʼaboʼob». Mix máak tu salvartubaiʼ. ¿Baʼaxten?... Tumen jeʼex tu yaʼalil Jesuseʼ, «maʼ tu beetoʼob u cuentail baʼax aʼalaʼabtiʼobiʼ». Maʼ tu creertoʼob baʼax aʼalaʼabtiʼobiʼ (Mateo 24:39; Génesis 6:5-7).

¹² Baʼaleʼ maʼ u tuʼubultecheʼ Jesuseʼ tu yaʼaleʼ le baʼax úuchoʼ yaan baʼax ku kaʼansiktoʼon. ¿Baʼax túun ku kaʼansiktoʼon?... Le máakoʼoboʼ maʼ chéen tumen kʼasaʼanoʼob xuʼulsaʼabtiʼobiʼ, baʼaxeʼ tumen jach chʼíikoʼob tiʼ uláakʼ baʼaloʼobeʼ minaʼan kaʼach tiempo utiaʼal u kaanbaloʼob tiʼ Dios mix tiʼ baʼax ken u beete. ¿Máasaʼ kʼaʼabéet k-kanáantik maʼ u yúuchultoʼon beyoʼ?...

¹³ A tuklikeʼ, ¿yaan wa u kaʼa xuʼulsaʼal tumen Dios le yóokʼol kaab yéetel junpʼéel búulkabaloʼ?... Maʼatan, letiʼeʼ tu yaʼalaj maʼ ken u kaʼa beete. Tu yaʼalaj: «Tsʼoʼok in tsʼáaik in chéel [wa arco iris] teʼ múuyaloʼoboʼ, yaan u meyaj bey [junpʼéel] chíikulal[eʼ]». Jéeobaeʼ tu yaʼaleʼ le chéeloʼ ku chíikbesikeʼ ‹mix bikʼin kun suut u xuʼuls le kuxtal yéetel junpʼéel búulkabaloʼ› (Génesis 9:11-17).

¹⁴ Le oʼolal jach k-ojel maʼ ken u xuʼuls Dios le yóokʼol kaab yéetel junpʼéel búulkabaloʼ. Baʼaleʼ jeʼex tsʼoʼok k-ilkoʼ, le Bibliaoʼ ku yaʼalikeʼ Dioseʼ yaan u xuʼulsik le yóokʼol kaabaʼ.  ¿Máaxoʼob túun ken u salvartubaʼob?... ¿Letiʼe máaxoʼob wa maʼ tu yóotoʼob kaanbal tiʼ Dios tumen chéen chʼiikloʼob tiʼ uláakʼ baʼaloʼoboʼ? ¿Letiʼe máaxoʼob wa maʼ tu jóoʼsoʼob tiempo utiaʼal u xokikoʼob le Bibliaoʼ? Techeʼ, ¿bix a tuklik?...

¹⁵ ¿Máasaʼ toʼoneʼ k-kʼáat antal ichil le máaxoʼob ken u salvart Diosoʼ?... ¿Máasaʼ jach maʼalob ka beetaʼak tumen k-familia le baʼax tu beetaj u familia Noé, yéetel ka salvartaʼakoʼob xan tumen Jéeobaoʼ?... Baʼaleʼ utiaʼal k-salvartikbaeʼ, yáaxeʼ kʼaʼabéet k-naʼatik bix ken u xuʼuls Dios le yóokʼol kaabaʼ yéetel bix ken u tsʼáa le túumben luʼumoʼ. Koʼox ilik bix ken u beetil.

¹⁶ Le Bibliaoʼ ku yaʼalik tu libroil Daniel, capítulo 2, versículo 44. Le tekstoaʼ ku yaʼalik baʼax kun úuchul: «Tu kʼiiniloʼob u méekʼtáanoʼob le [reyoʼoboʼ], u Diosil kaʼaneʼ bíin u líikʼes junpʼéel [reino] mix bikʼin bíin xuʼulsaʼakiʼ, bíin pʼáatak utiaʼal minaʼan u xuul, mix bíin tʼonkíintaʼak tumen mix junpʼéel múuchʼ kaaj, baʼaleʼ yaan u xuʼulsik junpuliʼ tuláakal le uláakʼ [reinoʼoboʼ]».

¹⁷ ¿Ka naʼatik wa baʼax u kʼáat u yaʼal lelaʼ?... Le Bibliaoʼ ku yaʼalikeʼ u gobierno Dioseʼ yaan u láaj xuʼulsik u gobierno wíinik. ¿Baʼaxten?... Tumen maʼ tu beetkoʼob le baʼax ku yaʼalik le Rey tsʼaʼan tumen Diosoʼ. ¿Máax le Rey u tsʼaamaj Diosoʼ?... Jesucristo.

¹⁸ Jéeoba Dioseʼ yaan u páajtalil u chʼaʼtuklik baʼax gobiernoil maas maʼalob, yéetel tsʼoʼok u yéeyik Jesús, u Hijo, utiaʼal u beet u Reyil. Maʼ kun xáantaleʼ, le Reyaʼ yaan u xuʼulsik tiʼ tuláakal u gobierno wíinik. Tu libroil Apocalipsis, capítulo 19, versículo 11 tak 16, ku yaʼalik bix ken u beetil. Teʼ táan juʼun ku segueroʼ jeʼel u páajtal a wilkeʼ. Le Bibliaoʼ ku yaʼalikeʼ u kʼaabaʼ le baʼatelaʼ Har–Magedón, wa Armagedón, lelaʼ yaan u meyaj utiaʼal u xuʼulsik tuláakal u gobierno wíinik.

¹⁹ Kex Dios aʼalik yaan u xuʼulsik u gobierno wíinik yéetel u Reinoeʼ, ¿ku yaʼalik wa toʼon ka k-áant u xuʼulsoʼob?... Maʼatech,  le Bibliaoʼ ku yaʼalikeʼ le Armagedonoʼ «u baʼatelil u noj kʼiinil le Dios yaan tuláakal páajtalil tiʼoʼ» (Apocalipsis 16:14, 16). Jeʼex túun k-ilkoʼ, le Armagedonoʼ ‹u noj kʼiinil u baʼateʼel Dios›, yéetel u tsʼaamaj Jesucristo utiaʼal nuʼuktik le angeloʼob teʼ baʼateloʼ. ¿Yaan wa u séeb úuchul le baʼatelaʼ? Koʼox ilik wa jeʼel u páajtal k-ojéeltik baʼax kʼiin ken úuchkeʼ.