Satanás yéetel u angeloʼobeʼ jach kʼasaʼanoʼob yéetel jach ku beetkoʼob loob. Úuchjeakileʼ Satanaseʼ tu kíimsaj u yaalakʼoʼob Job, utúul máax meyajt Dios úuchi. Tu kíimsaj xan le máaxoʼob ku meyajoʼob tiʼ Joboʼ yéetel tu kíimsaj tak u paalal Job le ka tu beetaj u taal upʼéel «kʼaʼamkach iikʼ» tu nikaj le naj tuʼux yanoʼoboʼ. Tu tsʼookeʼ Satanaseʼ tu beetaj «u jóokʼol nukuch llagaʼob» tu wíinklil Job (Job 1:7-19; 2:7).

Tu kʼiiniloʼob Jesuseʼ le kʼasaʼan angeloʼoboʼ tu beetoʼob u chʼóoptal yéetel u tóottal jujuntúul máakoʼob (Mateo 9:32, 33; 12:22). Utéenjeakileʼ tu beetoʼob u muʼyaj utúul máak yéetel tu beetoʼob tak u xoʼoxotkuba yéetel tuunich (Marcos 5:5). Tiʼ utúul xiʼipal xaneʼ tu beetoʼob u yawat yéetel u pʼuʼupʼuchkuba luʼum (Lucas 9:42).

Bejlaʼeʼ Satanás yéetel u kʼasaʼan angeloʼobeʼ láayliʼ ku kíimskoʼob máakeʼ. Desde ka jóoʼsaʼaboʼob teʼ kaʼanoʼ, tsʼoʼok u maas jach beetkoʼob u muʼyaj wíinik. Le baʼaxoʼob ku sen úuchul teʼ yóokʼol kaabaʼ  ku yeʼesik bukaʼaj jach kʼasaʼaniloʼob. Ku beetkoʼob u kʼojaʼantal jujuntúul máakoʼob. Yaan máaxoʼob maʼ tu chaʼikoʼob u weenloʼob wa ku beetkoʼob u wayakʼtikoʼob baʼaloʼob kʼaastak. Yaan xan máaxoʼob ku violarkoʼob. Yéetel tiʼ uláakʼoʼobeʼ ku beetkoʼob u chokotal u pooloʼob, wa ku túulchʼinkoʼob utiaʼal ka u kíimsoʼob u yéet máakiloʼob wa ka u kíimsubaʼob letiʼob.

Lintina, utúul koʼolel kajaʼan Surinameʼ, ku yaʼalikeʼ utúul kʼaakʼas pixaneʼ tu kíimsaj 16 utúulul u láakʼtsiloʼob, letiʼ xaneʼ 18 jaʼaboʼob beetaʼab u muʼyaj tumen le kʼaakʼas pixanoʼ. Yoʼolal le baʼax úuchtiʼoʼ, ku yaʼalikeʼ, le kʼasaʼan angeloʼoboʼ «jach utstutʼaan u beetkoʼob u muʼyaj máak tak ken u beetoʼob u kíimil».

Baʼaleʼ Jéeobaeʼ jeʼel u kanáantik máaxoʼob meyajtik utiaʼal maʼ u beetaʼaltiʼob kʼaas tumen Satanás (Proverbios 18:10).