Tuláakloʼon unaj k-yéeyik wa yaan k-meyajtik Jéeoba wa Satanás yéetel u kʼasaʼan angeloʼob. Maʼ tu páajtal k-meyajtik tu kaʼatúulal. Baʼaleʼ ¡jach maʼalob ka k-chʼaʼatukult meyajtik Jéeoba!

Jeʼex tsʼoʼok ilkoʼ, le kʼasaʼan angeloʼoboʼ utstutʼaan u tuskoʼob yéetel u beetkoʼob loob tiʼ máak. Jéeobaeʼ maʼ beyiʼ. Letiʼeʼ u yaabilmaj wíinikoʼob jeʼel bix utúul taatatsil u yaabilmaj u paalaloʼobeʼ. Letiʼ tsʼáaik «tuláakal le baʼaloʼob maʼalobtak yéetel chúukaʼantak» yaantoʼonoʼ (Santiago 1:17). Letiʼeʼ ku yeʼesik u yutsil tiʼ wíinik kex ka yanak u muʼyaj tu yoʼolal (Efesios 2:4-7).

Tuukulnen tiʼ baʼax tu beetaj Jesús, u Hijo Dios, le ka kuxlaj way Luʼumeʼ. Letiʼeʼ tu beetaj u tʼaan le tootoʼoboʼ yéetel tu beetaj u paakat le chʼóopoʼoboʼ. Tu tsʼakaj le máaxoʼob yaan lepra tiʼoboʼ bey xan le máaxoʼob móochoʼoboʼ. Tu jóoʼsaj le kʼaakʼas pixanoʼob chukmai jujuntúul máakoʼoboʼ yéetel tu tsʼakaj tuláakal kʼojaʼaniloʼob. Yéetel le páajtalil tsʼaʼabtiʼ tumen Diosoʼ, Jesuseʼ tu kuxkíintaj tak le kimenoʼoboʼ (Mateo 9:32-35; 15:30, 31; Lucas 7:11-15).

Dioseʼ maʼatech u tuskoʼon, letiʼeʼ mantatsʼ ku yaʼalik u jaajil (Números 23:19).

Jeʼex u tʼiʼilil utúul x-yaʼaxkach tu kʼaan ameʼ, bey xan tsʼoʼok u yúuchul tiʼ u millonesi máakoʼob tsʼoʼok u beetaʼal u creerkoʼob baʼaloʼob maʼ jaajtakiʼ. Letiʼobeʼ ku chʼaʼikoʼob saajkil tiʼ le kimenoʼoboʼ. Saajkoʼob tiʼ le kʼasaʼan angeloʼoboʼ. Yéetel saajkoʼob xan u pulyaʼajtaʼaloʼob bey xan tiʼ le tomojchiʼoboʼ. U Kʼaasilbaʼaleʼ tsʼoʼok u beetik u creerkoʼob yéetel u kʼiimbeskoʼob baʼaloʼob maʼ jaajtakiʼ. Baʼaleʼ máaxoʼob meyajtik Dioseʼ maʼatech u chaʼik u táabsaʼaloʼob tumen le baʼaloʼobaʼ.

Jéeobaeʼ maas yaan u páajtalil tiʼ Satanás. Wa ka meyajtik Jéeobaeʼ, letiʼeʼ yaan u kanáantkech tiʼ le kʼasaʼan angeloʼoboʼ (Santiago 4:7). Le pulyaʼajiloʼoboʼ maʼ ken u beetoʼobtech kʼaas. Tu kaajil Nigeriaeʼ, óoxtúul j-meenoʼobeʼ tu yilaj u kíimskoʼob utúul u j-jaajkunaj Jéeoba maʼ tu yóotaj lukʼul tu kaajaloʼobiʼ. Utúul tiʼ le j-meenoʼoboʼ le ka tu yilaj maʼ páajchaj u pulyaʼajtikoʼob le j-jaajkunajoʼ, jach sajakchajeʼ ka bin u yaʼal tiʼ le j-jaajkunaj maʼ u beetaʼal mix baʼal tiʼoʼ.

Wa taak u beetaʼaltech loob tumen le kʼasaʼan angeloʼoboʼ, jeʼel u páajtal a chʼaʼachiʼitik u kʼaabaʼ Jéeobaeʼ, letiʼ túuneʼ yaan u kanáantikech (Proverbios 18:10). Baʼaleʼ utiaʼal ka u kanáantech Dioseʼ kʼaʼabéet a pʼatik tuláakal baʼax yaan u yil yéetel espiritismo bey xan yéetel u adorartaʼal le kʼasaʼan angeloʼoboʼ. Le máaxoʼob meyajt Dios tu úuchben kaajil Efesoeʼ bey tu beetiloʼoboʼ. Tu nikkúuntoʼob tuláakal le u libroiloʼob magia yantiʼoboʼ ka tu láaj tóokoʼob (Hechos 19:19, 20). Bejlaʼeʼ máaxoʼob meyajtik Dioseʼ bey xan  unaj u beetikoʼoboʼ. Ilawil maʼ u yantaltech u libroiloʼob magia, mix baʼaloʼob ku tuklaʼal ku kanáantikoʼob máak wa ku tsʼáaikoʼob suerte, mix uláakʼ baʼaloʼob yaan yil yéetel espiritismo.

Wa a kʼáat lúubul utsil tiʼ Dioseʼ, maʼ chéen unaj a pʼatik le adoración maʼ kʼamaʼan tumen letiʼoʼ mix chéen unaj a pʼatik a beetik baʼaloʼob maʼ maʼalobtakiʼ. Techeʼ kʼaʼabéet xan a adorartik Dios jeʼex utstutʼaanoʼ. Le Bibliaoʼ ku yaʼalik baʼax kʼaʼabéet a beetik:

Way Luʼumeʼ yaan máaxoʼob ku kaʼanskoʼob yéetel ku beetkoʼob baʼax utstutʼaan Satanás yéetel u kʼasaʼan angeloʼob. Baʼaleʼ yaan xan máaxoʼob beetik baʼax utstutʼaan Jéeoba. Letiʼobeʼ kʼaj óolaʼanoʼob bey u j-jaajkunajoʼob Jéeobaeʼ (testigos de Jehová) (Isaías 43:10). Tiʼ tuláakal le Luʼumaʼ yaan óoliʼ siete millones J-jaajkunajoʼob. Tuláakloʼob ku yilkoʼob u beetkoʼob baʼax maʼalob yéetel ku kaʼanskoʼob le baʼax ku yaʼalik le Bibliaoʼ. Óoliʼ tiʼ tuláakal luʼumiloʼobeʼ jeʼel u páajtal a wilkoʼob teʼ tuʼux ku muchʼkubaʼoboʼ, wa ka xiʼikecheʼ jach maʼalob ken u kʼamilechoʼob.

Letiʼobeʼ ku yáantkoʼob uláakʼ máakoʼob utiaʼal ka u meyajtoʼob Dios. Jeʼel u binoʼob ta wotoch utiaʼal u kaʼanskoʼobtech baʼax ku yaʼalik le Bibliaoʼ, yéetel yaan u kaʼanskoʼobtech a adorart Jéeoba jeʼex utstutʼaaneʼ. Techeʼ minaʼan a boʼotik mix baʼal utiaʼal a kaʼansaʼal. U j-jaajkunajoʼob Jéeobaeʼ utstuyich u kaʼanskoʼob baʼax ku yaʼalik le Bibliaoʼ, tumen yaabiltmoʼob u yéet máakiloʼob bey xan Jéeoba.